AKP បន្ទាយមានជ័យ ថ្ងៃទី២៦ ខែសីហា ឆ្នាំ២០២៦-- លោកជំទាវ ឧត្តមសេនីយ៍ឯក វេជ្ជបណ្ឌិត ប៉ុណ្ណ សំខាន់ អគ្គលេខាធិការនៃអគ្គលេខាធិការដ្ឋាន គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) បានគូសបញ្ជាក់ពីសារៈសំខាន់នៃការបង្កើនការយល់ដឹងរបស់ប្រជាពលរដ្ឋអំពីហានិភ័យនៃការធ្វើចំណាកស្រុក ដោយចាត់ទុកថា ការធ្វើចំណាកស្រុកដោយខ្វះព័ត៌មានត្រឹមត្រូវ និងមិនមានសុវត្ថិភាព អាចធ្វើឱ្យប្រជាពលរដ្ឋប្រឈមនឹងការកេងប្រវ័ញ្ច ការរំលោភសិទ្ធិ និងអំពើជួញដូរមនុស្ស។

ការលើកឡើងនេះធ្វើឡើងក្នុងវេទិកាអប់រំផ្សព្វផ្សាយស្តីពី «ហានិភ័យ និងការបង្ការ ទប់ស្កាត់ការធ្វើចំណាកស្រុកដោយខុសច្បាប់» ដែលរៀបចំឡើងនៅសាលប្រជុំ (ខ) សាលាខេត្តបន្ទាយមានជ័យ ក្នុងគោលបំណងពង្រឹងចំណេះដឹង និងការប្រុងប្រយ័ត្នរបស់ប្រជាពលរដ្ឋ ជាពិសេសប្រជាពលរដ្ឋនៅតំបន់ជាប់ព្រំដែន ដែលមានការធ្វើដំណើរ និងធ្វើចំណាកស្រុកទៅរកការងារនៅក្រៅប្រទេស។

លោកជំទាវ ប៉ុណ្ណ សំខាន់ បានផ្តោតសំខាន់លើការផ្សព្វផ្សាយព័ត៌មានឱ្យបានទូលំទូលាយ និងច្បាស់លាស់ ដើម្បីឱ្យប្រជាពលរដ្ឋអាចសម្គាល់បាននូវហានិភ័យដែលអាចកើតមាននៅពេលធ្វើចំណាកស្រុក និងអាចសម្រេចចិត្តបានត្រឹមត្រូវ មុនពេលចាកចេញពីមូលដ្ឋាន។ ការយល់ដឹងអំពីផ្លូវច្បាប់ កិច្ចសន្យាការងារ សិទ្ធិរបស់ពលករ និងមធ្យោបាយស្វែងរកជំនួយ គឺជាចំណុចសំខាន់សម្រាប់ការពារខ្លួនពីការធ្លាក់ចូលក្នុងបណ្តាញកេងប្រវ័ញ្ច ឬជួញដូរមនុស្ស។

លោកជំទាវបានបញ្ជាក់ថា ការបង្ការ និងទប់ស្កាត់ការធ្វើចំណាកស្រុកដោយខុសច្បាប់ មិនអាចពឹងផ្អែកតែលើការអនុវត្តច្បាប់របស់សមត្ថកិច្ចប៉ុណ្ណោះទេ ប៉ុន្តែត្រូវការការចូលរួមពីគ្រប់ភាគី ពិសេសអាជ្ញាធរមូលដ្ឋាន ស្ថាប័នពាក់ព័ន្ធ អង្គការដៃគូ និងប្រជាពលរដ្ឋ។ ការចែករំលែកព័ត៌មានត្រឹមត្រូវនៅតាមសហគមន៍ នឹងជួយឱ្យប្រជាពលរដ្ឋមានសមត្ថភាពការពារខ្លួន និងជៀសវាងការជឿលើការផ្សព្វផ្សាយការងារដែលមិនមានប្រភពច្បាស់លាស់។ ជាមួយគ្នានេះ ការធ្វើចំណាកស្រុកដោយមិនមានឯកសារត្រឹមត្រូវ ឬតាមរយៈមេខ្យល់ខុសច្បាប់ អាចបង្កឱ្យមានផលវិបាកធ្ងន់ធ្ងរ ដោយសារអ្នកចំណាកស្រុកអាចបាត់បង់ការការពារតាមផ្លូវច្បាប់ ប្រឈមនឹងការឃុំឃាំង ការបង្ខំឱ្យធ្វើការហួសកំណត់ ការមិនទទួលបានប្រាក់ឈ្នួលតាមកិច្ចព្រមព្រៀង និងករណីធ្ងន់ធ្ងរអាចក្លាយជាជនរងគ្រោះនៃអំពើជួញដូរមនុស្ស។

លោកជំទាវ ប៉ុណ្ណ សំខាន់ ក៏បានសង្កត់ធ្ងន់លើតួនាទីរបស់អាជ្ញាធរមូលដ្ឋានក្នុងការចុះផ្សព្វផ្សាយ និងផ្តល់ព័ត៌មានដល់ប្រជាពលរដ្ឋឱ្យបានទាន់ពេលវេលា ព្រមទាំងជំរុញឱ្យមានការសហការជាមួយសមត្ថកិច្ចពាក់ព័ន្ធ ដើម្បីទប់ស្កាត់សកម្មភាពមេខ្យល់ និងការនាំមនុស្សឆ្លងដែនដោយខុសច្បាប់។ ជាពិសេស ត្រូវយកចិត្តទុកដាក់លើក្រុមដែលងាយរងគ្រោះ ដូចជា ស្ត្រី កុមារ និងប្រជាពលរដ្ឋដែលមានជីវភាពខ្វះខាត និងកំពុងស្វែងរកឱកាសការងារ។ សម្រាប់ខេត្តបន្ទាយមានជ័យ ដែលជាខេត្តមានព្រំប្រទល់ជាប់ប្រទេសថៃ និងមានលំហូរប្រជាពលរដ្ឋធ្វើដំណើរឆ្លងកាត់ព្រំដែនជាប្រចាំ ការផ្សព្វផ្សាយអប់រំអំពីការធ្វើចំណាកស្រុកដោយសុវត្ថិភាព មានសារៈសំខាន់ជាពិសេស។ ការផ្តល់ព័ត៌មានមុនពេលចាកចេញ អាចជួយកាត់បន្ថយហានិភ័យ និងធានាថា ប្រជាពលរដ្ឋដែលមានបំណងទៅធ្វើការនៅក្រៅប្រទេស អាចប្រើប្រាស់ផ្លូវស្របច្បាប់ និងទទួលបានការការពារសិទ្ធិរបស់ខ្លួន។

វេទិកាអប់រំផ្សព្វផ្សាយនេះ មិនត្រឹមតែជាការផ្តល់ចំណេះដឹងប៉ុណ្ណោះទេ ប៉ុន្តែជាការពង្រឹង «ប្រព័ន្ធការពារ» នៅមូលដ្ឋាន តាមរយៈការធ្វើឱ្យប្រជាពលរដ្ឋមានព័ត៌មាន មានការប្រុងប្រយ័ត្ន និងចេះជ្រើសរើសផ្លូវច្បាប់។ កាលណាប្រជាពលរដ្ឋមានការយល់ដឹងកាន់តែច្បាស់ អំណាចរបស់មេខ្យល់ និងបណ្តាញជួញដូរមនុស្សក្នុងការបោកបញ្ឆោត និងកេងប្រវ័ញ្ចក៏នឹងត្រូវបានកាត់បន្ថយទៅតាមនោះ។ ដូច្នេះ ការរួមគ្នារបស់អាជ្ញាធរ សមត្ថកិច្ច ស្ថាប័នជំនាញ និងប្រជាពលរដ្ឋ គឺជាគន្លឹះដ៏សំខាន់ក្នុងការបង្កើតបរិយាកាសចំណាកស្រុកប្រកបដោយសុវត្ថិភាព ស្របច្បាប់ និងការពារសិទ្ធិមនុស្ស ព្រមទាំងរួមចំណែកកាត់បន្ថយឱកាសកើតមានអំពើជួញដូរមនុស្ស និងការកេងប្រវ័ញ្ចគ្រប់រូបភាពនៅតាមតំបន់ព្រំដែន៕

ដោយ ឈុន សារ៉ាត