AKP ភ្នំពេញ ថ្ងៃទី២៤ ខែសីហា ឆ្នាំ២០២៦--មូលនិធិអភវឌ្ឍន៍ជំនាញ SDFនៃក្រសួងហិរញ្ញវត្ថុ បានរៀបចំ «សិក្ខាសាលាស្ដីពីការផ្ទៀងផ្ទាត់ក្រុមជំនាញអាទិភាព សម្រាប់តម្រូវការឧស្សាហ៍កម្មនាពេលបច្ចុប្បន្ន និងអនាគត»។សិក្ខាសាលានេះត្រូវបានរៀបចំឡើងនាថ្ងៃទី២៤ ខែសីហា ឆ្នាំ២០២៦នេះ នៅសណ្ឋាគារហ៊ីម៉ាវ៉ារី ដោយមានការចូលរួមពីតំណាងសមាគមឧស្សាហកម្មប្រមាណជា ៧០នាក់ មកពីវិស័យអាទិភាព រួមមាន កម្មន្តសាល កសិ-ឧស្សាហកម្ម យានយន្ត អេឡិចត្រូនិក ថាមពលស្អាត ភស្តុភារកម្ម និងបច្ចេកវិទ្យាឌីជីថល។

ឯកឧត្តម គី សុខគីម នាយកប្រតិបត្តិ SDF បានគូសបញ្ជាក់ថា លទ្ធផលដែលទទួលបានពីក្រុមហ៊ុន-សហគ្រាសនឹងក្លាយជាមូលដ្ឋានដ៏មានសារៈសំខាន់សម្រាប់ SDF ក្នុងការកំណត់កម្មវិធីគាំទ្រជាយុទ្ធសាស្ត្រឱ្យកាន់តែច្បាស់លាស់ ពាក់ព័ន្ធ និងឆ្លើយតបបានទាន់ពេលវេលា ទៅនឹងការវិវត្តនៃឧស្សាហកម្មកម្ពុជា ដែលកំពុងផ្លាស់ប្តូរឆ្ពោះទៅឧស្សាហកម្មផ្អែកលើជំនាញ, បច្ចេកវិទ្យា និងមូលធន។ សមិទ្ធផលរួមចាប់ពីឆ្នាំ២០១៨ ដល់សីហា ឆ្នាំ២០២៦ ដែល SDF បានគាំទ្រការបណ្តុះបណ្តាលសិក្ខាកាមសរុប ១០១ ២៦៤ នាក់ ដោយសម្រេចបានអត្រាពេញចិត្តពីនិយោជក ៨៩ ភាគរយ ព្រមទាំងជួយឱ្យប្រាក់បៀវត្សបុគ្គលិកកើនឡើងជាមធ្យម ២៧ភាគរយ ក្រោយបញ្ចប់ការបណ្តុះបណ្តាល។ ផ្អែកតាមការវាយតម្លៃផលជះ ៨៩ភាគរយនៃសហគ្រាសបានរាយការណ៍ពីការកើនឡើងផលិតភាព ហើយ ៨៣ភាគរយ នៃសហគ្រាសបានបញ្ជាក់ពីការទទួលបានផលត្រឡប់ជាវិជ្ជមានពីការវិនិយោគ (Return on Investment) ក្រោយទទួលបានការបណ្តុះបណ្តាលដែលគាំទ្រដោយ SDF។

ឯកឧត្តម នាយកប្រតិបត្តិ SDF បន្ថែមថា ក្នុងឆ្នាំ២០២៦ តាមរយៈកិច្ចសហការយ៉ាងជិតស្និទ្ធជាមួយអង្គការអន្តរជាតិខាងការងារ (ILO) និងគ្រឹះស្ថានបណ្តុះបណ្តាលអន្តរជាតិ SDF បានគាំទ្រការបណ្តុះបណ្តាលគ្រូបង្គោលចំនួន ៥ វគ្គ ដែលមានសិក្ខាកាមសរុប ១៣៦ នាក់ មកពីក្រុមហ៊ុនឯកជន និងគ្រឹះស្ថានបណ្តុះបណ្តាល នៅប្រទេសចិនលើជំនាញ Digital Construction, Industrial Robotics, New Energy Vehicle Technology, Advanced EV Maintenance និង Electrician។ ធាតុចូល និងមតិយោបល់ដែលទទួលបានពីសិក្ខាសាលានេះ នឹងជួយពង្រឹង និងពង្រីកកម្មវិធីគាំទ្ររបស់ SDF ដើម្បីចូលរួមដោះស្រាយបញ្ហាកង្វះជំនាញទាំងគុណភាព និងបរិមាណសម្រាប់វិស័យឧស្សាហកម្មគន្លឹះៗរបស់កម្ពុជា ។

សិក្ខាសាលានេះត្រូវបានរៀបចំឡើងក្នុងគោលបំណងបង្ហាញ និងផ្ទៀងផ្ទាត់ពីតម្រូវការព្រមទាំងគម្លាតជំនាញជាក់ស្តែង ប្រមូលអនុសាសន៍សំខាន់ៗដើម្បីតម្រង់ទិសការវិនិយោគលើការអភិវឌ្ឍធនធានមនុស្សឱ្យចំគោលដៅ ព្រមទាំងលើកទឹកចិត្តដល់វិស័យឯកជន ឱ្យចូលរួមកាន់តែសកម្មក្នុងការរួមគ្នារៀបចំ និងសហវិនិយោគលើការបណ្តុះបណ្តាលបុគ្គលិក និងគ្រូបង្គោល ទាំងក្នុងប្រទេស និងក្រៅប្រទេស ៕

ដោយ ណយ នឿន (ប្រភព៖SDF)