AKP ភ្នំពេញ ថ្ងៃទី២៤ ខែសីហា ឆ្នាំ២០២៦--ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា រសៀលថ្ងៃទី២៣ ខែសីហា ឆ្នាំ២០២៦ បានអញ្ជើញពិនិត្យមើលវឌ្ឍនភាពនៃការអនុវត្តគម្រោង «កម្ពុជាក្នុងបេះដូងខ្ញុំ» របស់កម្មវិធី«មនសិការ ពលរដ្ឋល្អ» ប្រចាំវិទ្យាល័យអង្គរ ខេត្តសៀមរាប បន្ទាប់ពីគម្រោង «កម្ពុជាក្នុងបេះដូងខ្ញុំ» ត្រូវបានដាក់បញ្ចូលក្នុងកម្មវិធី «មនសិការ ពលរដ្ឋល្អ»នៅក្នុងឆ្នាំ២០២៥ ដែលជាវិធីសាស្រ្តការសិក្សាគម្រោងអាស្រ័យលើគម្រោង (Project-Based Learning - PBL) និងផ្តល់ឱកាស ដល់យុវជនដែលជាសមាជិកក្លឹបចូលរួមដោះស្រាយនូវបញ្ហាក្នុងមូលដ្ឋានរបស់ខ្លួន តាមរយៈការរៀបចំផែនការសកម្មភាព ការអនុវត្តគម្រោង ការវាយតម្លៃ កម្រិតថ្នាក់រាជធានី-ខេត្ត និងការជ្រើសរើសដើម្បីបំពាក់ជ័យលាភីថ្នាក់ជាតិទៅលើគម្រោងឆ្នើម គម្រោងល្អ និងគម្រោងគំរូ។

នាឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានកោតសរសើរចំពោះកិច្ចខិតខំប្រឹងប្រែងរបស់ក្រុមការងារកម្មវិធី «មនសិការ ពលរដ្ឋល្អ» គម្រោង«កម្ពុជាក្នុងបេះដូងខ្ញុំ» របស់ក្លឹបស្រុកស្រីស្នំ នៃវិទ្យាល័យអង្គរ ដែលមានសមាជិក ១១រូប បានចូលរួមយ៉ាងសកម្មក្នុងគ្រប់ដំណាក់កាលសំខាន់ៗនៃគម្រោងចាប់ពីការសិក្សាបញ្ហា ការរៀបចំផែនការ ការប្រមូលធនធាន ការសម្របសម្រួលការអនុវត្ត តាមដានលទ្ធផលរហូតដល់ការបញ្ចប់។ ឯកឧត្តមបានវាយតម្លៃខ្ពស់ចំពោះការសហការគ្នាដ៏ល្អរវាងក្រុមការងារក្នុងការបន្តចូលរួមលើកកម្ពស់ និងថែរក្សាសមិទ្ធផលដែលបានផ្តួចផ្តើមនៃគម្រោង «ស្នាមញញឹមក្រោមជម្រកក្នុងសហគមន៍យើង» តាមរយៈការរៀបចំសំយ៉ាបរង់ចាំពីរកន្លែងនៅក្លោងទ្វារខាងក្រោយវិទ្យាល័យអង្គរ ដើម្បីបង្កើនកន្លែងជ្រកថ្ងៃជ្រកភ្លៀង និងអង្គុយរង់ចាំប្រកបដោយផាសុកភាព និងសុវត្ថិភាព ព្រមទាំងរួមចំណែកលើកកម្ពស់សណ្តាប់ធ្នាប់ និងកាត់បន្ថយការឈររង់ចាំនៅដងផ្លូវ។

ឯកឧត្តមបណ្ឌិតសភាចារ្យ ហង់ជួន ណារ៉ុន បានរំលេចពីសារៈសំខាន់នៃការរៀនសូត្រតាមរយៈការអនុវត្តគម្រោងដែលបង្កប់នូវបំណិនសតវត្សទី២១ ដែលបានផ្តល់ឱកាសឱ្យយុវជនស្វែងយល់ពីបញ្ហាក្នុងមូលដ្ឋាន អនុវត្តការងារជាក់ស្តែង ចេះរៀបចំផែនការ ធ្វើការជាក្រុមប្រមូលធនធាន សហការជាមួយអ្នកពាក់ព័ន្ធ និងទទួលខុសត្រូវចំពោះដំណោះស្រាយដែលខ្លួនបានផ្តួចផ្តើម៕

ដោយ ចាន់ សុភឿន (ប្រភព៖ ក្រសួងអប់រំ)