AKP ភ្នំពេញ ថ្ងៃទី២៤ ខែសីហា ឆ្នាំ២០២៦ -- ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បាននិយាយកាលពីថ្ងៃអាទិត្យថា ពេលវេលាដែលប្រាកដនិយមបំផុតសម្រាប់ការដោះស្រាយការទូតដើម្បីបញ្ចប់សង្គ្រាមរបស់រុស្ស៊ីជាមួយអ៊ុយក្រែន គឺចាប់ពីចុងឆ្នាំ២០២៦ ដល់រដូវក្តៅឆ្នាំ២០២៧។

លោក ហ្សេលេនស្គី បានថ្លែងនៅក្នុងពិធីមួយ ដើម្បីប្រារព្ធទិវាទង់ជាតិនៅទីក្រុងគៀវថា ភាគីទាំងពីរនៅតែមានការខ្វែងគំនិតគ្នាលើបញ្ហានៃការដកទ័ពរបស់អ៊ុយក្រែនចេញពីតំបន់ដុនបាស ដែលជាផ្នែកមួយនៃកិច្ចខិតខំប្រឹងប្រែង ដើម្បីឈានដល់ដំណោះស្រាយ។

លោកបាននិយាយថា «យើងជឿជាក់ថា នេះគឺជាដំណាក់កាលសកម្មបំផុត ដែលការទូតអាចនាំទៅដល់ការបញ្ចប់សង្គ្រាម។ វានៅចុងបញ្ចប់នៃឆ្នាំនេះ និងចុងបញ្ចប់នៃរដូវក្តៅឆ្នាំ២០២៧»។

លោកបាននិយាយថា ជម្រើសបទឈប់បាញ់មួយ ដែលកំពុងត្រូវបានពិភាក្សាជាមួយសហរដ្ឋអាមេរិក និងអឺរ៉ុប ពាក់ព័ន្ធនឹងការដកទ័ពទៅវិញទៅមក និងការបង្កើតតំបន់សេដ្ឋកិច្ចគ្មានឧបសគ្គ ដែលគ្រប់គ្រងដោយភាគីទីបី។

លោកបានបន្ថែមថា អ៊ុយក្រែនបានត្រៀមខ្លួនរួចជាស្រេច ដើម្បីពិភាក្សាអំពីការបញ្ឈប់ការវាយប្រហារគ្នាទៅវិញទៅមក ហេដ្ឋារចនាសម្ព័ន្ធថាមពល និងកសិកម្ម៕

ដោយ៖ យា ចិន្ដាខន្ដី (ប្រភព៖ AA-AKP)