AKP បន្ទាយមានជ័យ ថ្ងៃទី២១ ខែសីហា ឆ្នាំ២០២៦--ក្រោមការដឹកនាំបញ្ជាផ្ទាល់ពីលោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត សហការជាមួយស្ថាប័នពាក់ព័ន្ធ នៅថ្ងៃសុក្រ ទី២១ ខែសីហា ឆ្នាំ២០២៦ វេលាម៉ោង ១០:៣០នាទីព្រឹកមិញនេះបានទទួលពលរដ្ឋខ្មែរចំនួន ៥២នាក់ (ស្រី ១៨នាក់ និងកុមារ ០៧នាក់) ដែលបានឆ្លងដែនខុសច្បាប់ និងត្រូវបានអាជ្ញាធរថៃបញ្ជូនត្រឡប់មកប្រទេសកំណើតវិញ។

ការវិលត្រឡប់មកវិញរបស់ពលរដ្ឋទាំង ២៥នាក់នេះ មិនមែនជាការត្រឡប់មកដោយទទេរក្រៀមក្រោះនោះឡើយ ប៉ុន្តែត្រូវបានទទួលស្វាគមន៍យ៉ាងកក់ក្តៅបំផុតពីសំណាក់អាជ្ញាធរមានសមត្ថកិច្ចកម្ពុជា ដែលឆ្លុះបញ្ចាំងពីការយកចិត្តទុកដាក់យ៉ាងខ្លាំងក្លារបស់ រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត របស់សម្តេចមហាបវរធិបតីហ៊ុនម៉ាណែតនាយករដ្ឋមន្ត្រីនៃព្រះរាជាណាកម្ពុជាដែលតែងតែគិតគូរពីសុខទុក្ខ និងសុខុមាលភាពរបស់ប្រជាពលរដ្ឋគ្រប់រូប មិនថានៅទីជិត ឬទីឆ្ងាយ។

សកម្មភាពមនុស្សធម៌ និងការយកចិត្តទុកដាក់ប្រកបដោយក្តីស្រឡាញ់ភ្លាមៗបន្ទាប់ពីបានទទួលពួកគាត់រួចមក ក្រោមការសម្របសម្រួលផ្ទាល់ពីលោកឧត្តមសេនីយ៍ត្រី អុី ចំរើន ប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានរៀបចំផ្តល់នូវ អាហារសម្រន់ (បាយសាច់ជ្រូក និងទឹកសុទ្ធ) ជូនដល់ពលរដ្ឋគ្រប់ៗរូបតាមតម្រូវការជាក់ស្តែង ដើម្បីជួយសម្រាលការឃ្លាន និងកាត់បន្ថយភាពនឿយហត់ក្រោយពីការធ្វើដំណើរដ៏វែងឆ្ងាយ។ សកម្មភាពនេះបានបង្ហាញយ៉ាងច្បាស់ពីស្មារតី "ខ្មែរជួយខ្មែរ" និងការគោរពសេចក្តីថ្លៃថ្នូររបស់មនុស្សជាតិ។

អនុវត្តយ៉ាងខ្ជាប់ខ្ជួនតាមការណែនាំដ៏ខ្ពង់ខ្ពស់របស់ លោកឧត្តមសេនីយ៍ទោ ប្រធាននាយកដ្ឋានច្រកទ្វារទី១ សមត្ថកិច្ចជំនាញប្រចាំប៉ុស្តិ៍បានអនុវត្តនីតិវិធីយ៉ាងហ្មត់ចត់ រៀបចំប្រមូលទិន្នន័យ និងធ្វើសម្រង់សាវតាពលរដ្ឋម្នាក់ៗ ដើម្បីតម្កល់ទុកជាឯកសារនៅអង្គភាព។

រៀបចំមធ្យោបាយដឹកជញ្ជូនពលរដ្ឋទាំងអស់យកទៅប្រគល់ជូន មន្ត្រីនៃមជ្ឈមណ្ឌលសំចតប៉ោយប៉ែត ប្រកបដោយសុវត្ថិភាព ដើម្បីបន្តអនុវត្តនីតិវិធីសង្គមកិច្ច និងសម្របសម្រួលពួកគាត់ក្នុងការវិលត្រឡប់ទៅកាន់ស្រុកកំណើតរៀងៗខ្លួនវិញ។
កិច្ចការងារទាំងនេះ គឺជាសក្ខីភាពបញ្ជាក់ពីការប្តេជ្ញាចិត្តខ្ពស់របស់កងកម្លាំងនគរបាលជាតិ និងស្ថាប័នពាក់ព័ន្ធកម្ពុជា ក្នុងការបំពេញភារកិច្ចការពារ និងថែទាំប្រជាពលរដ្ឋគ្រប់កាលៈទេសៈ ស្របតាមគោលនយោបាយមនុស្សធម៌របស់រាជរដ្ឋាភិបាល៕

ដោយ ឈុន សារ៉ាត