AKP ភ្នំពេញ ថ្ងៃទី២៩ ខែកក្កដា ឆ្នាំ ២០២៦--អង្គភាពប្រឆាំងអំពើពុករលួយ (អ.ប.ព.) បានរៀបចំវគ្គបំប៉ន «តួនាទី ភារកិច្ចមន្ត្រី អ.ប.ព. ដឹកនាំការសង្កេតការណ៍ និងបទប្បញ្ញត្តិពាក់ព័ន្ធនឹងការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦» ជូនក្រុមការងារ អ.ប.ព. ដឹកនាំការសង្កេតការណ៍នៅថ្នាក់កណ្ដាល និងថ្នាក់រាជធានី-ខេត្ត ប្រមាណ ៦០០ រូប។

កិត្តិនីតិកោសល បណ្ឌិត ឱម យ៉ិនទៀង ទេសរដ្ឋមន្ត្រី ប្រធាន អ.ប.ព.បានថ្លែងបញ្ជាក់ក្នុងពិធីនេះថា មន្រ្តី អ.ប.ព. មានតួនាទីសំខាន់ណាស់ ព្រោះជាតំណាងឱ្យភាពស្មោះត្រង់ តម្លាភាព និងភាពយុត្តិធម៌ ដែលត្រូវតែប្រកាន់ខ្ជាប់នូវភាពជាគំរូ ហើយប្រតិបត្តិតាមបទបញ្ជាផ្ទៃក្នុងយ៉ាងម៉ឺងម៉ាត់ មានសីលធម៌ សុភាពរាបសា រាប់អាន ដាក់ខ្លួន មិនជ្រៀតជ្រែកកិច្ចការបច្ចេកទេសរបស់ក្រសួងអប់រំ យុវជន និងកីឡា តែម៉ឺងម៉ាត់ប្រកបដោយភាពឈ្លាសវៃ បត់បែន សំដៅសម្រេចឱ្យបាននូវគោលបំណង គោលការណ៍គ្រឹះ នៃការចូលរួមសង្កេតការណ៍ប្រឡង គឺធានានូវគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន តាមស្មារតីកែទម្រង់របស់រាជរដ្ឋាភិបាល និងក្រសួងអប់រំ យុវជន និងកីឡា «ចេះ គឺជាប់»។

ប្រធានអង្គភាពប្រឆាំងអំពើពុករលួយបានបញ្ជាក់បន្ថែមថាកន្លងមកមានមន្រ្តី អ.ប.ព. និងអ្នកសង្កេតការណ៍ស្ម័គ្រចិត្តរាប់ម៉ឺននាក់បានចូលរួមធ្វើឱ្យមានការផ្លាស់ប្តូរផ្នត់គំនិតប្រឡង ពីការគិត និងទង្វើអកម្ម មកជាប្រឹងប្រែងរៀនឱ្យចេះ បើចេះគឺជាប់។ មន្រ្តី អ.ប.ព. ដឹកនាំការសង្កេតការណ៍ ចូរធ្វើកិច្ចការ ២ ឱ្យបានល្អ សម្រាប់ការចូលរួមបង្ការ ទប់ស្កាត់បាតុភាពមិនប្រក្រតីប្រឆាំងនឹងច្បាប់ស្ដីពីការប្រឆាំងអំពើពុករលួយ និងច្បាប់នានា ព្រមទាំងបទប្បញ្ញត្តិទាំងឡាយ ដែលចែងដោយក្រសួងអប់រំ យុវជន និងកីឡា អំពីការប្រឡង និងការទទួលខុសត្រូវ និងដឹកនាំក្រុមការងារសង្កេតការណ៍ស្ម័គ្រចិត្តរបស់ អ.ប.ព. ឱ្យបានល្អបំផុត ក្នុងការទប់ស្កាត់បាតុភាពខុសច្បាប់ក្នុងការប្រឡងបាក់ឌុប។

ជាមួយគ្នានេះប្រធានអង្គភាពប្រឆាំងអំពើពុករលួយបានបញ្ជាក់បន្ថែមថាមន្រ្តី អ.ប.ព. មានតួនាទីសំខាន់ណាស់ ព្រោះជាតំណាងឱ្យភាពស្មោះត្រង់ តម្លាភាព និងភាពយុត្តិធម៌ វគ្គបំប៉ននេះ រៀបចំឡើងក្នុងគោលបំណងពង្រឹងការយល់ដឹងដល់មន្ត្រីសង្កេតការណ៍ អ.ប.ព. ឱ្យត្រៀមខ្លួនបានយ៉ាងខ្ជាប់ខ្ជួន សម្រាប់ការចូលរួមសង្កេតការណ៍ការប្រឡង ប្រកបដោយវិជ្ជាជីវៈប្រសិទ្ធភាព និងអនុលោមតាមបទប្បញ្ញត្តិជាធរមាន។
គួរបញ្ជាក់ថា៖ ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០ សីហា ២០២៦ មានបេក្ខជនចំនួន ១៥១ ២៣៨ នាក់ , មណ្ឌលប្រឡងចំនួន ២៤៤ មណ្ឌល និងបន្ទប់ប្រឡងចំនួន ៦១០៤ បន្ទប់៕

ដោយ មករា