AKP ភ្នំពេញ ថ្ងៃទី២៨ ខែកក្កដា ឆ្នាំ២០២៦--ឯកឧត្តមបណ្ឌិតសភាចារ្យ ហ៊ាន សាហ៊ីប ទីប្រឹក្សាផ្ទាល់សម្តេចធិបតី នាយករដ្ឋមន្រ្តី រដ្ឋលេខាធិការនៃក្រសួងសេដ្ឋកិច្ច និង ហិរញ្ញវត្ថុ និង ជាប្រធានក្រុមការងារជំរុញការវិនិយោគក្នុងភូមិភាគឦសាន (ក.វ.ឦសាន) បានដឹកនាំកិច្ចប្រជុំក្រុមការងារជំរុញវិនិយោគក្នុងភូមិភាគឦសាន លើកទី៦ ដោយមានការចូលរួមពីតំណាងក្រសួងស្ថាប័នពាក់ព័ន្ធ និង រដ្ឋបាលខេត្តទាំង ៤ ដែលជាសមាជិកក្រុមការងារ ដើម្បីពិនិត្យ និង អនុម័តគម្រោងវិនិយោគចំនួន ៣ ក្នុងវិស័យកសិកម្ម រួមមាន៖ ការដាំដុះដើមកាហ្វេ និង កាកាវ ការចិញ្ចឹមសត្វចម្រុះ និង សត្តឃាតដ្ឋា និង ការបង្កើតរោងចក្រកែច្នៃផលិតផលកសិកម្ម, ដែលវិនិយោគទាំង ៣ នេះនឹងផ្តល់ឱកាសការងារជូនប្រជាពលរដ្ឋក្នុងតំបន់ប្រមាណ ៧០០ នាក់ និង បន្ថែមមូលធនប្រមាណជា ១០៨ លានដុល្លារអាមេរិក ចូលក្នុងសេដ្ឋកិច្ចកម្ពុជា ។

ក្នុងកិច្ចប្រជុំនេះ ឯកឧត្តមបណ្ឌិតសភាចារ្យ បានបញ្ជាក់ថាទោះបីពិភពលោកកំពុងជួបនូវបញ្ហាប្រឈមជាច្រើន កម្ពុជានៅតែរក្សាបាននូវភាពទាក់ទាញដល់វិនិយោគ ទាំងក្នុងស្រុក និង បរទេស។ ជាក់ស្តែង ក្រុមហ៊ុនចិនធំៗបានបង្ហាញពីគោលបំណងពង្រីកបន្ថែមវិនិយោគរបស់ខ្លួននៅកម្ពុជា នៅក្នុងជំនួបបន្តបន្ទាប់ជាមួយ សម្តេចធិបតីនាយករដ្ឋមន្ត្រី នាឱកាសដែលសម្តេចចូលរួមសន្និសីទពិភពលោកស្តីពីបញ្ញាសិប្បនិម្មិតនៅក្នុងប្រទេសចិន កាលពីថ្ងៃទី១៥-១៧ ខែកក្កដា ឆ្នាំ២០២៦ កន្លងទៅ ។ ក្នុងន័យនេះ ក្រុមការងារត្រូវបន្តការខិតខំសម្របសម្រួល ប្រកបដោយស្មារតីបុរេសកម្ម និង ប្រសិទ្ធភាពខ្ពស់ ដើម្បីផ្តល់ការលើកទឹកចិត្តនានា និង ការសម្រួលនីតិវិធីជាកញ្ចប់ ដើម្បីពង្រឹងការជឿទុកចិត្តពីវិនិយោគិនជាតិ និង អន្តរជាតិ សំដៅបន្តលើកកម្ពស់បរិយាកាសវិនិយោគ និង ធ្វើឱ្យកម្ពុជាបន្តជាគោលដៅវិនិយោគដ៏សំខាន់ ក្នុងតំបន់ ។

ឯកឧត្តមបណ្ឌិតសភាចារ្យ បានបន្តថា ការសម្របសម្រួលនីតិវិធី និង ការផ្តល់ការលើកទឹកចិត្តពិសេសជូនវិនិយោគិន ត្រូវធ្វើឡើងដោយបុរេសកម្ម ដើម្បីលើកកម្ពស់បរិយាកាសធុរកិច្ចក្នុងខេត្តទាំងបួននៅភូមិភាគឦសាន ឱ្យកាន់តែប្រសើរឡើង ដោយការចូលរួម «ការដោះស្រាយបញ្ហាជាកញ្ចប់» ស្របតាមអភិក្រម “ជវភាពនៃប្រព័ន្ធតួអង្គតែមួយ” និង ការតម្កល់នូវស្មារតី «ឧត្តមនិយម» នៃផលប្រយោជន៍ជាតិ ។ ដោយឡែក បន្ទាប់ពីទទួលបានការសម្របសម្រួល និង លើកទឹកចិត្តពិសេសទាំងនេះ, វិនិយោគិនត្រូវផ្តោតការយកចិត្តទុកដាក់ក្នុងការអនុវត្តគម្រោងជាក់ស្តែង ស្របតាមផែនការដែលបានស្នើសុំ ជាពិសេសត្រូវសង្កត់ធ្ងន់លើការបង្កើតការងារ ការបណ្តុះបណ្តាល និងការផ្ទេរជំនាញ និង ការប្រើប្រាស់បច្ចេកទេសថ្មីៗ ក្នុងខ្សែច្រវាក់ផលិតកម្មពីការផលិត រហូតដល់ការកែច្នៃដែលមានតម្លៃបន្ថែមកាន់តែប្រសើរ សម្រាប់លើកកម្ពស់ការអភិវឌ្ឍសង្គម-សេដ្ឋកិច្ចជាតិ ។

ឯកឧត្តម បានដឹកនាំពិភាក្សាលើបញ្ហាប្រឈមសំខាន់ៗមួយចំនួន ដែលត្រូវដោះស្រាយជាបន្ទាន់ សំដៅជំរុញប្រសិទ្ធភាពការងារឱ្យកាន់តែប្រសើរ ។ ខណៈនោះ ឯកឧត្តម លោកជំទាវ សមាជិក-សមាជិកាតំណាងក្រសួង-ស្ថាប័នពាក់ព័ន្ធបានប្តេជ្ញាចិត្តខ្ពស់ចូលរួមផ្តល់ការសម្របសម្រួល ឱ្យបានល្អជាអតិបរមា រហ័ស មានតម្លាភាព និង ប្រសិទ្ធភាពខ្ពស់ ដើម្បីបង្កលក្ខណៈងាយស្រួលដល់ធុរកិច្ច និង វិនិយោគ សំដៅជំរុញសកម្មភាពវិនិយោគ ឱ្យបានច្រើនទៅក្នុងខេត្តគោលដៅទាំង ៤ ។

ឯកឧត្តមបណ្ឌិតសភាចារ្យ បានថ្លែងអំណរគុណចំពោះសមាជិក-សមាជិកានៃក្រុមការងារ ចំពោះការសម្របសម្រួលទាំងឡាយជូនវិនិយោគិន ដើម្បីធ្វើឱ្យកម្មវិធីពិសេសរបស់រាជរដ្ឋាភិបាលដ៏មានសារៈសំខាន់នេះ ទទួលបានជោគជ័យខ្ពស់ សម្រាប់ជាឧត្តមប្រយោជន៍ដល់ប្រទេសជាតិ និង ប្រជាជនកម្ពុជា ៕

ដោយ ទូច វល្ខ័ណ (ប្រភពពី៖ ក្រសួងសេដ្ឋកិច្ច)