EN 
FR 
AR
CNឧត្ដមសេនីយ៍ទោ សោម ស៊ុន ដាក់បទបញ្ជាដល់កងកម្លាំងចម្រុះនៅទីបញ្ជាការស្រាល៣គោលដៅថ្មីទៀត នៅស្រុកសណ្ដាន់ត្រូវបង្ក្រាបឱ្យបានបទល្មើសព្រៃឈើខុសច្បាប់ ក្នុងភូមិសាស្ត្រដែលខ្លួនទទួលខុសត្រូវ
AKPកំពង់ធំថ្ងៃទី២៥ ខែកក្កដាឆ្នាំ២០២៦--
ឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹកសឹក អនុប្រធានអចិន្ដ្រៃយ៍នៃគណៈកម្មការ ការពារ ទប់ស្កាត់និងបង្ក្រាបបទល្មើសធនធានធម្មជាតិខេត្តកំពង់ធំ នាព្រឹកថ្ងៃទី២៥ខែកក្កដាឆ្នាំ២០២៦ បានដឹកនាំសហការីទៅជួបសំណេះសំណាលសាកសួរសុខទុក្ខ ឧបត្ថម្ភស្បៀងអាហារគ្រឿងឧបភោគបរិភោគ ប្រេងឥន្ធនៈ និងដាក់បទបញ្ជាដល់កងកម្លាំងចម្រុះប្រចាំការនៅទីបញ្ជាការស្រាលចំនួន៣គោលដៅថ្មីទៀតនៅស្រុកសណ្ដាន់ ដែលពិធីនេះប្រព្រឹត្តទៅនៅទីបញ្ជាការស្រាលនៅតំបន់ព្រៃសហគមន៍អូរដាស់ស្គរ ឃុំមានរិទ្ធ ស្រុកសណ្ដាន់ ខេត្តកំពង់ធំ។
លោកវរសេនីយ៍ទោ អ៊ូ សុធា មេបញ្ចាការផ្នែកសឹករងសណ្ដាន់ និងលោកអនុសេនីយ៍ឯក ប្រេស ឈុនឡៃ អនុប្រធានទីបញ្ចាការស្រាលតំបន់អូរសោម និងលោកអនុសេនីយ៍ទោ អ៊ូ ឡម ប្រធានទីបញ្ជាការស្រាលប្រចាំការនៅតំបន់អូរក្រញូង និងអូរដាស់ស្គរបានឡេីងរាយការអំពីលទ្ធផលសំខាន់ៗ និងបញ្ហាប្រឈមមួយចំនួនដែលត្រូវធ្វើការដោះស្រាយ។ ជាមួយនេះដែរ កងកម្លាំងចម្រុះនៅទីបញ្ចាការស្រាលទាំង៣គោលដៅ ដែលមានភារកិច្ចការពារតំបន់ព្រៃសហគមន៍ និងដែនជំរកសត្វព្រៃ ព្រៃឡង់ ក្នុងភូមិសាស្រ្តស្រុកសណ្ដាន់ បានប្ដេជ្ញាចិត្តអនុវត្តឱ្យបានម៉ឺងម៉ាត់តាមបទបញ្ជារបស់គណកម្មការ ការពារ ទប់ស្កាត់ នឹងបង្ក្រាបបទល្មេីសធនធានធម្មជាតិខេត្តកំពង់ធំឱ្យទទួលបានជោគជ័យ។
ឧត្ដមសេនីយ៍ទោ សោម ស៊ុន បានថ្លែងនូវការកោតសរសើរដល់កងកម្លាំងចម្រុះដែលប្រចាំការនៅទីបញ្ជាការស្រាលទាំង ៣ គោលដៅ ដែលបានខិតខំប្រឹងប្រែងបំពេញភារកិច្ចមិនខ្លាចលំបាកនឿយហត់ ទោះបីជួបការលំបាកនឹងឧបសគ្គមួយចំនួនដូចជាការខូចខាតមធ្យោបាយធ្វើដំណើរ ភូមិសាស្ត្រលំបាកស្មុគស្មាញ និងកិច្ចការធានាមួយចំនួនក្ដី តែបងប្អូនបានខិតខំបំពេញភារកិច្ចប្រកបដោយស្មារតីទទួលខុសត្រូវខ្ពស់ តាមផែនការដែលថ្នាក់ដឹកនាំបានប្រគល់ជូន។
ឧត្ដមសេនីយ៍ទោ សោម ស៊ុន បានដាក់បទបញ្ជាដល់កង កម្លាំងចម្រុះទាំងអស់÷ទី១.ត្រូវបង្រា្កបឱ្យបាននូវសកម្មភាពកាប់ទន្ទ្រានព្រៃឈើ យកដីរបស់រដ្ឋធ្វើជាកម្មសិទ្ធិ។ ទី២ .ត្រូវបង្រ្កាបឱ្យបានការកាប់នឹងដឹកជញ្ជូនផល អនុផលព្រៃឈេីដែលខុសច្បាប់ និងទី៣.កងកម្លាំងចម្រុះទាំងអស់ មិនត្រូវពាក់ព័ន្ធឬឃុបឃិតទទួលផលប្រយោជន៍ពីជនដែលប្រព្រឹត្តបទល្មើសខុសច្បាប់ស្ដីពីព្រៃឈេីជាដាច់ខាត។
ក្នុងឱកាសននោះឧត្តមសេនីយ៍ទោ សោម ស៊ុន បានប្រគល់ស្បៀងអាហារ គ្រឿងឧបភោគបរិភោគ និងប្រេងឥន្ធនៈដែលជាអំណោយរបស់ឯកឧត្ដម នួន ផារ័ត្ន អភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ជូនដល់កងកម្លាំងចម្រុះទាំង ៣ គោលដៅ ដេីម្បីប្រេីប្រាស់ក្នុងជីវភាពប្រចាំថ្ងៃ ក្នុងការបំពេញភារកិច្ចឱ្យទទួលបានជោគជ័យជាថ្មីទៀត៕
ដោយ៖ ស៊ុម វណ្ណា
