AKP ឧត្តរមានជ័យ ថ្ងៃទី២៤ ខែកក្កដា ឆ្នាំ២០២៦ --ការឈឺចាប់ និងការភ័យខ្លាចរបស់ជនភៀសសឹកដែលរស់នៅតំបន់អូរស្មាច់ ខេត្ដឧត្ដរមានជ័យ គឺជាសក្ខីភាពមួយដែលបង្ហាញពីផលប៉ះពាល់ដ៏ធ្ងន់ធ្ងរនៃការរំលោភបំពានព្រំដែន និងឈ្លានពានអធិបតេយ្យកម្ពុជា ពីសំណាក់យោធាថៃ ដែលគិតត្រឹមថ្ងៃទី២៤ ខែកក្កដា ឆ្នាំ២០២៦នេះ គឺមានរយៈពេលមួយឆ្នាំគត់។ ជាមួយគ្នានេះ កម្ពុជា នៅតែបន្តប្រកាន់ជំហរទាមទារយុត្តិធម៌ និងបូរណភាពទឹកដីរបស់ខ្លួនតាមរយៈមធ្យោបាយការទូត និងច្បាប់អន្តរជាតិ។
ដោយបង្ហាញការឈឺចាប់ក្នុងរយៈពេលមួយឆ្នាំមកនេះ អ៊ុស្រី អ៊ីន សុខា អាយុ៦៣ឆ្នាំ ជាជនភៀសសឹកពីតំបន់អូស្មាច់ ក្រុងសំរោង ខេត្តឧត្តរមានជ័យបានរៀបរាប់ពីព្រឹត្តិការណ៍ដែលយោថៃឈ្លានពានមកលើផ្ទះសម្បែងរបស់គាត់ដោយប្រើប្រាស់កាំភ្លើងធំ និងគ្រាប់បែកទម្លាក់ពីលើយន្តហោះ បំផ្លិចបំផ្លាញភូមិដ្ឋានពលរដ្ឋស្លូតត្រង់មិនញញើតដៃ។ ដោយដៃកំពុងជម្រះស្មៅនៅក្នុងសួនបន្លែដែលបានដាំដំណាំជាច្រើននោះ បាននិយាយរៀបរាប់ទាំងអួលដើមកបណ្តើរថា ការឈ្លានពានរបស់យោធាថៃ បានបំផ្លាញកិច្ចខិតខំប្រឹងប្រែងការរកស៊ីចិញ្ចឹមទាំងស្រុងរបស់គាត់ ពោលគឺផ្ទះសម្បែង ដីស្រែចម្ការ និងទ្រព្យសម្បត្តិត្រូវរលាយមួយប៉ព្រិចភ្នែក។ អ៊ុស្រីរូបនេះបានបន្ដថា បច្ចុប្បន្ននេះ រូបគាត់កំពុងរស់នៅភូមិស្រះកែវ ឃុំថ្មី ស្រុកចុងកាល់ ខេត្តឧត្តរមានជ័យ នៅតែបន្តក្តីសង្ឃឹមមកលើរាជរដ្ឋាភិបាល ក្នុងដោះស្រាយទំនាស់ជាមួយភាគីថៃ និងអាចទាមទារទឹកដីដែលយោធាថៃ ចូលមកកាន់កាប់ដោយខុសច្បាប់ត្រឡប់មកវិញ បើទោះបីជារង់ចាំរយៈពេលយូរក៏ដោយ។

សូមជម្រាបជូនថា គិតមកដល់ថ្ងៃទី២៤ ខែកក្កដា ឆ្នាំ២០២៦នេះ គឺជាខួបមួយឆ្នាំនៃការចាប់ផ្តើមសកម្មភាពឈ្លានពានប្រដាប់អាវុធរបស់យោធាថៃមកលើទឹកដីកម្ពុជា ដែលបានបន្សល់ទុកនូវការឈឺចាប់ និងភាពភ័យខ្លាចយ៉ាងជ្រាលជ្រៅសម្រាប់ប្រជាពលរដ្ឋខ្មែរ ជាពិសេសជនភៀសសឹក ដែលមកពីតំបន់អូរស្មាច់ ខេត្តឧត្តរមានជ័យ។ ទោះបីជាពេលវេលាកន្លងផុតទៅរយៈពេលមួយឆ្នាំហើយក៏ពិតមែន ប៉ុន្ដែការឈឺចាប់ សំឡេងទ្រហ៊ោយំ និងភាពក្តុកក្តួលនៅតែដិតដាមក្នុងចិត្តរបស់ប្រជាពលរដ្ឋដែលរងគ្រោះ។

ជាមួយគ្នានេះ ក្នុងរយៈពេលមួយឆ្នាំកន្លងមកនេះ កងកម្លាំងប្រដាប់អាវុធថៃ បានបន្តរំលោភបំពានលើអធិបតេយ្យ និងបូរណភាពទឹកដីរបស់កម្ពុជា នៅតាមបណ្តោយព្រំដែន។ ជាក់ស្តែង ក្នុងអំឡុងថ្ងៃទី៥ ដល់ថ្ងៃទី៧ ខែកក្កដា ឆ្នាំ២០២៦ កងកម្លាំងប្រដាប់អាវុធថៃ បានធ្វើការជីកដីលើកទំនប់ និងរាយបន្លាលួស តាមទិសពីជើងទៅត្បូង នៃបង្គោលព្រំដែនលេខ១៤ ស្ថិតក្នុងសង្កាត់អូរស្មាច់ ក្រុងសំរោង ខេត្តឧត្តរមានជ័យ។ សកម្មភាពទាំងនេះបានបង្កឱ្យមានការភ័យខ្លាច និងបង្ខំឱ្យប្រជាពលរដ្ឋជាច្រើនត្រូវជម្លៀសខ្លួនចេញពីលំនៅឋានរបស់ពួកគេ។
រាជរដ្ឋាភិបាលកម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិ បានធ្វើការតវ៉ាយ៉ាងខ្លាំងចំពោះការបន្តរំលោភបំពានរបស់ថៃ ដែលជាទង្វើខុសច្បាប់អន្តរជាតិ។ ជនភៀសសឹកជាច្រើនបានរៀបរាប់ពីការបាត់បង់ទ្រព្យសម្បត្តិ និងការរំខានដល់ជីវភាពរស់នៅប្រចាំថ្ងៃ។

តែទោះបីជាយ៉ាងណាក៏ដោយ បងប្អូនប្រជាពលរដ្ឋនៅតែមានក្តីសង្ឃឹមយ៉ាងមុតមាំថា នឹងបានវិលត្រឡប់ទៅកាន់ផ្ទះសម្បែងរបស់ខ្លួនវិញ ហើយទាមទារឱ្យភាគីថៃ ដកកងកម្លាំង និងសំណង់នានាចេញពីទឹកដីកម្ពុជា ដោយគោរពតាមច្បាប់អន្តរជាតិ។
តាមរយៈការឈឺចាប់ និងការភ័យខ្លាចរបស់ជនភៀសសឹក ដែលរស់នៅតំបន់អូរស្មាច់ ខេត្ដឧត្ដរមានជ័យ គឺជាសក្ខីភាពមួយដែលបង្ហាញពីផលប៉ះពាល់ដ៏ធ្ងន់ធ្ងរនៃការរំលោភបំពានព្រំដែនពីសំណាក់យោធាថៃ។ កម្ពុជា នៅតែបន្តប្រកាន់ជំហរទាមទារយុត្តិធម៌ និងបូរណភាពទឹកដីរបស់ខ្លួនតាមរយៈមធ្យោបាយការទូត និងច្បាប់អន្តរជាតិ៕

ដោយ៖ រិទ្ធី, រូបថត៖ ខឹម សុវណ្ណារ៉ា