AKP ភ្នំពេញ ថ្ងៃទី២៤ ខែកក្កដា ឆ្នាំ២០២៦ -- ទីក្រុងប៉េកាំង កាលពីពេលថ្មីៗនេះ បានជំរុញឱ្យទីក្រុងវ៉ាស៊ីនតោនគោរពផលប្រយោជន៍ស្នូលរបស់ប្រទេសចិន ក៏ដូចជាគាំទ្រគោលការណ៍ចិនតែមួយ ខណៈដែលលោកប្រធានាធិបតីចិន ស៊ី ជីនពីង កំពុងរៀបចំខ្លួនទៅបំពេញទស្សនកិច្ចនៅសហរដ្ឋអាមេរិក។ នេះបើយោងតាមប្រព័ន្ធផ្សព្វផ្សាយរដ្ឋចិន។

ការបញ្ជាក់សារជាថ្មីអំពីកង្វល់របស់ទីក្រុងប៉េកាំងនេះ ត្រូវបានលើកឡើងដោយរដ្ឋមន្ត្រីការបរទេសចិន លោក វ៉ាង យី ក្នុងអំឡុងពេលជួបផ្ទាល់ជាមួយរដ្ឋមន្ត្រីការបរទេសអាម៉េរិក លោក ម៉ាកូ រូប៊ីអូ នៅប្រទេសហ្វីលីពីន។

ពួកគេបានជួបគ្នានៅខាងក្រៅកិច្ចប្រជុំរដ្ឋមន្ត្រីការបរទេសអាស៊ាននៅទីក្រុងម៉ានីល។ ប្រទេសហ្វីលីពីន គឺជាប្រធានបច្ចុប្បន្ននៃប្លុកដែលមានសមាជិក ១១ប្រទេស។

យោងតាមប្រព័ន្ធផ្សព្វផ្សាយរដ្ឋចិន បានឱ្យដឹងថា លោក វ៉ាង បានប្រាប់ទៅកាន់លោក រូប៊ីអូ ថា «ភាគីសហរដ្ឋអាមេរិកគួរតែគ្រប់គ្រងភាពខុសគ្នាឱ្យបានត្រឹមត្រូវ (និង) ដោះស្រាយកង្វល់ស្របច្បាប់របស់ចិន»។ ភាគីទាំងពីរទំនងជានឹងពិភាក្សាអំពីដំណើរទស្សនកិច្ចរបស់លោក ស៊ី ជីនពីង ទៅកាន់សហរដ្ឋអាមេរិកនៅក្នុងខែកញ្ញាខាងមុខនេះ។

ភាគីទាំងពីរបាននិយាយថា កិច្ចប្រជុំនេះ គឺមានភាពជាក់ស្តែង វិជ្ជមាននិងប្រកបដោយការស្ថាបនា។ នេះបើយោងតាមទីក្រុងប៉េកាំង ដែលបានបន្ថែមថា ពួកគេ «បានព្រមព្រៀងគ្នាធ្វើការរៀបចំដ៏ល្អសម្រាប់ដំណាក់កាលបន្ទាប់នៃការផ្លាស់ប្តូរកម្រិតខ្ពស់រវាងចិន និងសហរដ្ឋអាមេរិក»។

ជំនួបរបស់លោក វ៉ាង ជាមួយលោក រូប៊ីអូ បានកើតឡើងនៅប៉ុន្មានថ្ងៃបន្ទាប់ពីប្រធានាធិបតីសហរដ្ឋអាមេរិក លោក ដូណាល់ ត្រាំ បានចោទប្រកាន់ប្រទេសចិនពីបទជ្រៀតជ្រែកក្នុងការបោះឆ្នោតរបស់សហរដ្ឋអាមេរិក តែត្រូវបានទីក្រុងប៉េកាំងបដិសេធ និងត្រូវបានអ្នកជំនាញសន្តិសុខការបោះឆ្នោតអាម៉េរិកជាច្រើនជំទាស់៕

ដោយ៖ យា ចិន្ដាខន្ដី (ប្រភព៖ AA-AKP)