AKP ព្រះសីហនុ  ថ្ងៃទី២៤ ខែកក្កដា ឆ្នាំ២០២៦-- មន្ទីរសុខាភិបាលខេត្តព្រះសីហនុសហការក្រុមការងារ នៃមណ្ឌលសុខភាពអូរជ្រៅ និងអាជ្ញាធរក្រុងកំពង់សោម កាលពីថ្ងៃទី២៣ ខែកក្កដា ឆ្នាំ២០២៦ បើកវេទិការផ្សព្វផ្សាយ និងពិគ្រោះយោបល់របស់ក្រុមប្រឹក្សាក្រុងកំពង់សោម ដើម្បីរៀបចំសកម្មភាពអប់រំ និងផ្សព្វផ្សាយស្តីពីសុខភាពជូនដល់បងប្អូនប្រជាពលរដ្ឋ ស្ថិតក្នុងភូមិបឹងតាព្រហ្ម (កោះគ្រួស) សង្កាត់បឹងតាព្រហ្ម ក្រុងកំពង់សោម ខេត្តព្រះសីហនុ ដោយមានប្រជាពលរដ្ឋចូលរួមសរុបចំនួន ២៧៦នាក់ (ស្រី ៤៩នាក់)។

ប្រធានបទសំខាន់នៃការផ្សព្វផ្សាយអប់រំគឺជាការបង្ការ និងទប់ស្កាត់ជំងឺគ្រុនឈាម គ្រុនឈីក ព្រមទាំងធ្វើការណែនាំប្រជាពលរដ្ឋអំពីវិធានការលុបបំបាត់ប្រភពដង្កូវទឹក មូសខ្លាញីខាំ ការសម្អាតបរិស្ថាននៅជុំវិញផ្ទះ ការគេងក្នុងមុង និងការស្វែងរកសេវាព្យាបាលនៅមូលដ្ឋានសុខាភិបាលសាធារណៈឱ្យបានទាន់ពេលវេលា នៅពេលមានអាការៈសង្ស័យត្រូវទៅរកមណ្ឌលសុខភាពដែលនៅជិតផ្ទះ ដើម្បីចៀសវាងបាត់បង់អាយុជីវិត។

ដោយសារបច្ចុប្បន្នជំងឺគ្រុនឈាម និងគ្រុនឈីកកំពុងតែកើតមាននៅតាមតំបន់មួយចំនួន ដែលទាមទារឱ្យយើងមានការយល់ដឹង និងចូលរួមបង្កាជំងឺគ្រុនឈាម គ្រុនឈីកបានទាន់ពេលវេលា៕

ដោយ ងូ សុមុនី