AKP ភ្នំពេញ ថ្ងៃទី២៣ ខែកក្កដា ឆ្នាំ២០២៦ -- រដ្ឋមន្ត្រីការបរទេសអូស្ត្រាលីលោកស្រី ផេននី វ៉ុង បានទៅដល់ទីក្រុងម៉ានីលកាលពីពេលថ្មីៗនេះ ដើម្បីចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៩ និងកិច្ចប្រជុំពាក់ព័ន្ធដោយបញ្ជាក់សារជាថ្មីនូវការប្តេជ្ញាចិត្តរបស់ប្រទេសអូស្ត្រាលីក្នុងការធ្វើការយ៉ាងជិតស្និទ្ធជាមួយអាស៊ានក្នុងការដោះស្រាយបញ្ហាប្រឈមក្នុងតំបន់ និងសកលលោកដែលកំពុងកើនឡើង។

កិច្ចប្រជុំទាំងនេះដែលប្រព្រឹត្តទៅចាប់ពីថ្ងៃទី១៨ ដល់ថ្ងៃទី២៤ ខែកក្កដាឆ្នាំ២០២៦ កំពុងធ្វើឡើងខណៈដែលសមាជិកអាស៊ាន និងដៃគូរបស់ពួកគេបង្កើនកិច្ចខិតខំប្រឹងប្រែងដើម្បីលើកកម្ពស់សន្តិភាព ស្ថិរភាព និងវិបុលភាពមុនកិច្ចប្រជុំកំពូលអាស៊ាននៅចុងឆ្នាំនេះ។

នៅក្នុងសេចក្តីថ្លែងការណ៍មួយដែលចេញផ្សាយមុនពេលលោកស្រីចាកចេញ លោកស្រី វ៉ុង បាននិយាយថា នៅពេលដែលការប្រកួតប្រជែងជាយុទ្ធសាស្ត្រកើនឡើង និងភាពមិនប្រាកដប្រជាផ្នែកសេដ្ឋកិច្ចសកលលោក វាមានសារៈសំខាន់ជាងពេលណាៗទាំងអស់សម្រាប់ប្រទេសអូស្ត្រាលីក្នុងការធ្វើការយ៉ាងជិតស្និទ្ធជាមួយដៃគូអាស៊ាន ដើម្បីជួយបង្កើតតំបន់មួយដែលមានសន្តិភាព ស្ថិរភាព និងវិបុលភាព។

លោកស្រីបាននិយាយថា «កិច្ចប្រជុំរបស់ខ្ញុំជាមួយសមភាគីក្នុងតំបន់និងសកលលោក នឹងជាឱកាសមួយដើម្បីជំរុញផលប្រយោជន៍របស់ប្រទេសអូស្ត្រាលី និងបន្តធ្វើការលើបញ្ហាប្រឈមរួមគ្នា រួមទាំងសន្តិសុខថាមពលភាពធន់នៃខ្សែសង្វាក់ផ្គត់ផ្គង់ និងវិបុលភាពសេដ្ឋកិច្ចរយៈពេលវែង»។

ក្នុងអំឡុងពេលទស្សនកិច្ចនេះ លោកស្រី វ៉ុង គ្រោងនឹងជួបជាមួយរដ្ឋមន្ត្រីការបរទេសហ្វីលីពីន លោកស្រី ថេរ៉េសា ឡាហ្សារ៉ូ ខណៈដែលប្រទេសអូស្ត្រាលី និងហ្វីលីពីនប្រារព្ធខួបលើកទី៨០ នៃទំនាក់ទំនងការទូត។លោកស្រីក៏បានបញ្ជាក់ជាថ្មីនូវការគាំទ្រយ៉ាងមុតមាំរបស់ប្រទេសអូស្ត្រាលីចំពោះប្រទេសហ្វីលីពីនក្នុងនាមជាប្រធានអាស៊ាននៅឆ្នាំ២០២៦ ផងដែរ។

កិច្ចប្រជុំរដ្ឋមន្ត្រីការបរទេសអាស៊ានលើកទី៥៩ និងកិច្ចប្រជុំពាក់ព័ន្ធបានទាក់ទាញរដ្ឋមន្ត្រីការបរទេសមកពីដៃគូសំខាន់ៗរបស់អាស៊ាន រួមទាំងរដ្ឋមន្ត្រីការបរទេសអាម៉េរិក លោក ម៉ាកូ រូប៊ីអូ រដ្ឋមន្ត្រីការបរទេសចិន លោកវ៉ាង យី និងរដ្ឋមន្ត្រីការបរទេសរុស្ស៊ី លោក ស៊ែរហ្គេយ ឡាវរ៉ូវ។

ស្ថានភាពនៅក្នុងប្រទេសមីយ៉ាន់ម៉ានៅតែជារបៀបវារៈសំខាន់មួយបន្ទាប់ពីកិច្ចប្រជុំទល់មុខគ្នាលើកដំបូងរវាងតំណាងរដ្ឋសមាជិកអាស៊ាន និងអាជ្ញាធរយោធាមីយ៉ាន់ម៉ានៅទីក្រុងបាងកកកាលពីដើមខែនេះ៕

ដោយ៖ យា ចិន្ដាខន្ដី (ប្រភព៖ VNA)