AKP ភ្នំពេញ ថ្ងៃទី២១ ខែកក្កដា ឆ្នាំ២០២៦ -- មន្ត្រីរដ្ឋាភិបាលម្នាក់បាននិយាយថា យ៉ាងហោចណាស់មានមនុស្ស ២០នាក់បានស្លាប់ ប្រហែល៨០នាក់ផ្សេងទៀតរងរបួស និងជាង ១០០នាក់ទៀតនៅតែបាត់ខ្លួន បន្ទាប់ពីទឹកជំនន់ភ្លាមៗដែលបង្កឡើងដោយភ្លៀងធ្លាក់ខ្លាំងបានវាយប្រហារខេត្តនូរីស្ថាន ភាគខាងកើតប្រទេសអាហ្វហ្គានីស្ថានកាលពីថ្ងៃចន្ទ។

លោក យូសូហ្វ ហាមម៉ាដ (Yousuf Hammad) អ្នកនាំពាក្យអាជ្ញាធរគ្រប់គ្រងគ្រោះមហន្តរាយជាតិអាហ្វហ្គានីស្ថាន បាននិយាយក្នុងសារមួយនៅលើបណ្ដាញសង្គមអ៊ិចថា ទឹកជំនន់បានបណ្តាលឱ្យមានអ្នកស្លាប់ និងរបួសយ៉ាងធ្ងន់ធ្ងរនៅក្នុងខេត្តនេះ។

លោកបាននិយាយថា មន្ត្រីមកពីនាយកដ្ឋានគ្រប់គ្រងគ្រោះមហន្តរាយខេត្តបានមកដល់តំបន់ដែលរងផលប៉ះពាល់ ហើយបានចាប់ផ្តើមប្រតិបត្តិការស្វែងរក និងជួយសង្គ្រោះ រួមទាំងកិច្ចខិតខំប្រឹងប្រែងដើម្បីស្វែងរកសាកសពជនរងគ្រោះ ជួយសង្គ្រោះអ្នករងរបួស និងស្វែងរកអ្នកដែលបាត់ខ្លួន។

លោក ហាមម៉ាដ បានបន្ថែមថា តួលេខបឋមស្តីពីអ្នកស្លាប់ និងការបាត់បង់ទ្រព្យសម្បត្តិនឹងត្រូវចេញផ្សាយបន្ទាប់ពីការស៊ើបអង្កេត និងការវាយតម្លៃការខូចខាតត្រូវបានបញ្ចប់។

នៅក្នុងសេចក្តីថ្លែងការណ៍ដាច់ដោយឡែកមួយដែលបានបង្ហោះនៅលើបណ្ដាញសង្គមអ៊ិច លោក ហ្សាប៊ីហុលឡាហ៍ មូចាហ៊ីដ (Zabihullah Mujahid) អ្នកនាំពាក្យរដ្ឋាភិបាលអាហ្វហ្គានីស្ថាន បានសម្តែងការចូលរួមរំលែកទុក្ខដល់ក្រុមគ្រួសារអ្នកស្លាប់ និងបានសង្កត់ធ្ងន់លើតម្រូវការក្នុងការពន្លឿនប្រតិបត្តិការស្វែងរក និងជួយសង្គ្រោះជាបន្តបន្ទាប់។

យោងតាមអាជ្ញាធរមូលដ្ឋានបានឱ្យដឹងថា ទីក្រុងប៉ារុន ដែលជារដ្ឋធានីខេត្តនូរីស្ថាន គឺជាតំបន់ដែលរងផលប៉ះពាល់ខ្លាំងបំផុត ដោយមានផ្ទះសម្បែង និងហេដ្ឋារចនាសម្ព័ន្ធជាច្រើនត្រូវបានខូចខាតដោយទឹកជំនន់៕

ដោយ៖ មូល មិនា (ប្រភព៖ ស៊ីនហួ)