AKP បន្ទាយមានជ័យ ថ្ងៃទី២១ ខែកក្កដា ឆ្នាំ២០២៦--អាជ្ញាធរខេត្តបន្ទាយមានជ័យនៅតែបន្តយកចិត្តទុកដាក់ និងគិតគូរជាប្រចាំចំពោះសុខទុក្ខ និងជីវភាពរស់នៅរបស់ប្រជាពលរដ្ឋដែលជួបការលំបាក។ ជាក់ស្ដែង កាលពីរសៀលថ្ងៃទី២០ ខែកក្កដា ឆ្នាំ២០២៦ លោក ឃ្លោក នួយ អភិបាលរងខេត្តបន្ទាយមានជ័យបានអញ្ជើញជាតំណាងរបស់ឯកឧត្តម អ៊ុំ រាត្រី អភិបាល នៃគណៈអភិបាលខេត្ត បានចុះនាំយកអំណោយសប្បុរសធម៌ជាស្បៀងអាហារទៅចែកជូនដល់បងប្អូនប្រជាពលរដ្ឋភៀសសឹកដែលមានបន្ទុកសមាជិកគ្រួសារច្រើននាក់ មកពីភូមិបន្ទាយមានរិទ្ធ និងភូមិសាមគ្គី ដែលបច្ចុប្បន្នកំពុងស្នាក់នៅបណ្ដោះអាសន្ន (ផ្ទះអតីតយុទ្ធជន) ស្ថិតក្នុងភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ។

ក្នុងឱកាសជួបសំណេះសំណាលនាពេលនោះ លោក ឃ្លោក នួយ បានពាំនាំនូវប្រសាសន៍សួរសុខទុក្ខយ៉ាងកក់ក្តៅ និងគិតគូរជាពន់ពេកពីសំណាក់ ឯកឧត្តម អ៊ុំ រាត្រី អភិបាលខេត្ត ជាពិសេសពីសំណាក់ប្រមុខរាជរដ្ឋាភិបាលកម្ពុជា ដែលជានិច្ចកាលតែងតែដិតដល់ និងមិនបោះបង់ចោលប្រជាពលរដ្ឋណាម្នាក់ក្នុងគ្រាលំបាកនោះឡើយ។

លោកអភិបាលរងខេត្តបានបញ្ជាក់យ៉ាងស៊ីជម្រៅថាសុខទុក្ខ និងការរស់នៅរបស់បងប្អូនប្រជាពលរដ្ឋភៀសសឹកទាំងអស់ គឺជាអាទិភាព និងជាបេះដូងនៃការងាររបស់អាជ្ញាធរខេត្ត ក៏ដូចជារាជរដ្ឋាភិបាល។ ទោះបីជាបងប្អូនកំពុងស្នាក់នៅបណ្តោះអាសន្នក្នុងគ្រាលំបាកនេះក្តី ក៏អាជ្ញាធរគ្រប់លំដាប់ថ្នាក់មិនទុកឱ្យបងប្អូនរងគ្រោះដោយកង្វះខាតស្បៀងអាហារ ឬដាច់ពោះនោះឡើយ។ អំណោយនាពេលនេះ ទោះបីមិនអាចដោះស្រាយបញ្ហាបានទាំងស្រុង រយៈពេលវែងក្តី ប៉ុន្តែជាទឹកចិត្ត និងជាចំណែកមួយយ៉ាងសំខាន់ក្នុងការជួយសម្រាលបន្ទុកជីវភាពប្រចាំថ្ងៃរបស់គ្រួសារដែលមានសមាជិកច្រើន ឱ្យឆ្លងផុតដំណាក់កាលដ៏លំបាកនេះ។

លោកបានបន្ថែមទៀតថា អាជ្ញាធរខេត្តបន្ទាយមានជ័យនឹងបន្តសហការជាមួយអាជ្ញាធរមូលដ្ឋានស្រុកស្វាយចេក ដើម្បីតាមដានស្ថានភាពរស់នៅ ពិនិត្យមើលតម្រូវការចាំបាច់ និងស្វែងរកដំណោះស្រាយសមស្របបន្ថែមទៀតជូនប្រជាពលរដ្ឋភៀសសឹក ទាំងផ្នែកសុខភាព សុវត្ថិភាព និងជីវភាពរស់នៅ ដើម្បីឱ្យបងប្អូនមានកម្លាំងចិត្ត និងក្តីសង្ឃឹមក្នុងការបន្តជីវភាពទៅមុខទៀត។ ការទទួលបានការយកចិត្តទុកដាក់ និងអំណោយឧបត្ថម្ភនាពេលនេះ បានធ្វើឱ្យប្រជាពលរដ្ឋភៀសសឹកមកពីភូមិបន្ទាយមានរិទ្ធ និងភូមិសាមគ្គី សម្តែងនូវក្តីរំភើប រីករាយ និងថ្លែងអំណរគុណយ៉ាងជ្រាលជ្រៅចំពោះ ឯកឧត្តម អ៊ុំ រាត្រី និង លោក ឃ្លោក នួយ ព្រមទាំងក្រុមការងារអាជ្ញាធរខេត្តទាំងអស់ ដែលបានចុះមកជួយសង្គ្រោះ និងបម្រើប្រជាពលរដ្ឋដល់ទីកន្លែង ដោយមិនគិតពីការនឿយហត់៕

ដោយ ឈុន សារ៉ាត