AKP ភ្នំពេញ ថ្ងៃទី២០ ខែកក្កដា ឆ្នាំ២០២៦ -- យោងតាមការបញ្ជាក់របស់ប៉ូលីសសាធារណរដ្ឋហ្ស៊ីមបាវ៉េ (ZRP) បានឱ្យដឹងថា មនុស្ស ៣នាក់ត្រូវបានបញ្ជាក់ថាស្លាប់ និងម្នាក់ទៀតបាត់ខ្លួន បន្ទាប់ពីអណ្តូងរ៉ែមួយបានដួលរលំនៅស្រុកជីនហូយី ភាគខាងលិចខេត្តម៉ាសូណាលែន។

ប៉ូលីសបាននិយាយនៅក្នុងសេចក្តីថ្លែងការណ៍មួយថា «ឧប្បត្តិហេតុបាក់រលំអណ្តូងរ៉ែដ៏សាហាវមួយដែលបានកើតឡើងនៅអណ្តូងរ៉ែ Rowdy Boys 4 ក្នុងស្រុកជីនហូយី ដោយមានកម្មករអណ្តូងរ៉ែចំនួន ៨នាក់កំពុងធ្វើការនៅក្រោមដី ដែលមានជម្រៅប្រហែល ១០០ម៉ែត្រ»។

ប៉ូលីសបានបន្ថែមថា «អ្នករុករករ៉ែចំនួន ៤នាក់បានរត់គេចខ្លួន ខណៈពេលដែលកម្មករ ៤នាក់ផ្សេងទៀតបានជាប់គាំង។ កិច្ចខិតខំប្រឹងប្រែងជួយសង្គ្រោះបាននាំឱ្យមានការរកឃើញសាកសពចំនួន ៣នាក់ ដោយមានអ្នករុករករ៉ែម្នាក់នៅតែជាប់គាំងនៅក្រោមដី»។

ប៉ូលីស ក្រសួងរ៉ែ និងអភិវឌ្ឍន៍ធនធាន និងអាជ្ញាធរពាក់ព័ន្ធផ្សេងទៀតកំពុងបន្តប្រតិបត្តិការស្វែងរក និងជួយសង្គ្រោះ ហើយការស៊ើបអង្កេតលើមូលហេតុនៃការដួលរលំកំពុងដំណើរការ។

គ្រោះថ្នាក់អណ្តូងរ៉ែគឺជារឿងធម្មតានៅក្នុងប្រទេសហ្ស៊ីមបាវ៉េជាពិសេសក្នុងរដូវវស្សា នៅពេលដែលដីទន់អាចបណ្តាលឱ្យអណ្តូងរ៉ែបាក់រលំ៕

ដោយ៖ មូល មិនា (ប្រភព៖ ស៊ីនហួ)