AKP ភ្នំពេញ ថ្ងៃទី១៥ ខែកក្កដា ឆ្នាំ២០២៦ -- ក្រសួងហិរញ្ញវត្ថុបាននិយាយកាលពីថ្ងៃអង្គារថា ប្រទេសចិនបានបែងចែកថវិកាចំនួន ៤៣០លានយ័ន(ប្រហែល ៦៣លានដុល្លារអាម៉េរិក) ជាមូលនិធិសង្គ្រោះគ្រោះមហន្តរាយធម្មជាតិកណ្តាលដើម្បីគាំទ្រដល់ការគ្រប់គ្រងទឹកជំនន់ និងកិច្ចខិតខំប្រឹងប្រែងសង្គ្រោះព្យុះទីហ្វុងនៅក្នុងតំបន់ចំនួន ១០ទីតាំង។

ថវិកាទាំងនេះ ដែលត្រូវបានបែងចែករួមគ្នាដោយក្រសួងហិរញ្ញវត្ថុ និងក្រសួងគ្រប់គ្រងគ្រោះមហន្តរាយ នឹងទៅដល់ខេត្តក្វាងស៊ី ខេត្តហ្សេជាំងខេត្តហឺប៉ី ខេត្តឡៅនីង ខេត្តធានជីន ខេត្តហីឡុងជាំង ខេត្តជាំងស៊ូ ខេត្តអាន់ហ៊ុយ ខេត្តជាំងស៊ី និងខេត្តស៊ីឈួន។

ថវិកាបន្ថែមចំនួន ១៥០លានយ័នត្រូវបានបែងចែកទៅខេត្តក្វាងស៊ីដែលមានទីតាំងនៅភាគខាងត្បូងប្រទេសចិន បន្ទាប់ពីការបែងចែកថវិកាចំនួន ១៩០លានយ័នពីមុន។ ថវិកានេះភាគច្រើននឹងត្រូវប្រើប្រាស់ដើម្បីផ្លាស់ប្តូរទីលំនៅ និងជួយដល់ប្រជាជនដែលរងផលប៉ះពាល់ ផ្តល់ការគាំទ្រដល់ការរស់នៅបណ្តោះអាសន្ន និងជួសជុលផ្ទះដែលខូចខាត ឬដួលរលំដោយហេតុនេះជួយស្តារជីវិត និងផលិតកម្មធម្មតាឡើងវិញនៅក្នុងតំបន់ដែលរងគ្រោះដោយគ្រោះមហន្តរាយ។

ថវិកាដែលនៅសល់ចំនួន ២៨០លានយ័ននឹងគាំទ្រដល់តំបន់ចំនួន៩ផ្សេងទៀតក្នុងប្រតិបត្តិការស្វែងរក និងជួយសង្គ្រោះ ការជម្លៀស និងការតាំងទីលំនៅថ្មី ការកាត់បន្ថយហានិភ័យបន្ទាន់ និងការត្រួតពិនិត្យ និងការលុបបំបាត់គ្រោះថ្នាក់ដែលអាចបង្កឱ្យមានគ្រោះមហន្តរាយបន្ទាប់បន្សំដោយមានគោលបំណងកាត់បន្ថយការខាតបង់ពីគ្រោះមហន្តរាយ៕

ដោយ៖ មូល មិនា (ប្រភព៖ ស៊ីនហួ)