AKPបន្ទាយមានជ័យថ្ងៃទី១៩ខែមិថុនាឆ្នាំ២០២៦–ស្មារតីខ្ពស់នៃការលះបង់ និងភាពអង់អាចក្លាហានរបស់កងកម្លាំងប្រដាប់អាវុធដែលកំពុងឈរជើងការពារបូរណភាពទឹកដីនៅតាមបន្ទាត់ព្រំដែន មិនដែលត្រូវបានមើលរំលងឡើយពីសំណាក់រាជរដ្ឋាភិបាលកម្ពុជា។ ស្ដែងចេញពីមនោសញ្ចេតនាយ៉ាងជ្រាលជ្រៅនេះ កាលពីរសៀលថ្ងៃទី១៨ ខែមិថុនា ឆ្នាំ២០២៦ ម្សិលមិញនេះ ពិធីប្រគល់ និងទទួលសម្ភារៈប្រើប្រាស់ រួមទាំងថ្នាំសង្កូវ ដ៏ថ្លៃថ្លាត្រូវបានរៀបចំឡើងនៅបរិវេណផ្សារធំមានជ័យ ក្រុងសិរីសោភ័ណ។

អំណោយដ៏ថ្លៃថ្លាទាំងនេះ គឺជាការឧបត្ថម្ភផ្ទាល់ពី ឯកឧត្តមបណ្ឌិត ស៊ាង ប៊ុនលាង រដ្ឋលេខាធិការ ប្រធានក្រុមការងារអចិន្ត្រៃយ៍ និងជាប្រធានលេខាធិការដ្ឋានគ្រប់គ្រងគ្រោះមហន្តរាយរបស់ក្រសួងមហាផ្ទៃ និងលោកជំទាវ ហ៊ុន ប៊ុនធឿន ដើម្បីដោះស្រាយតម្រូវការចាំបាច់ចំពោះមុខរបស់រដ្ឋបាលខេត្តបន្ទាយមានជ័យ និងកងកម្លាំងឈរជើងតាមបន្ទាត់ព្រំដែន។

នៅក្នុងឱកាសដ៏មានអត្ថន័យនោះ ឯកឧត្តមបណ្ឌិត ស៊ាង ប៊ុនលាងបានមានប្រសាសន៍ប្រកបដោយអត្ថន័យស៊ីជម្រៅ ដោយបាននាំមកនូវការសួរសុខទុក្ខពីសំណាក់ថ្នាក់ដឹកនាំកំពូលរបស់ជាតិ មកកាន់នាយទាហាន នាយទាហានរង និងពលទាហានទាំងអស់។ ឯកឧត្តមបណ្ឌិត បានសង្កត់ធ្ងន់ថា «កងកម្លាំងជួរមុខ គឺជាខែលការពារដ៏រឹងមាំ និងជាមោទនភាពរបស់ជាតិទាំងមូល។ ការឈរជើងយ៉ាងអង់អាចក្លាហាន ទោះក្នុងកាលៈទេសៈលំបាកយ៉ាងណាក៏ដោយ ដើម្បីការពារបូរណភាពទឹកដី គឺជាវីរភាពដែលមិនអាចកាត់ថ្លៃបាន។ 

សម្ភារៈ និងថ្នាំពេទ្យទាំងនេះ មិនគ្រាន់តែជាជំនួយរូបវន្តប៉ុណ្ណោះទេ ប៉ុន្តែវាជាបេះដូង ជាការយកចិត្តទុកដាក់ខ្ពស់បំផុតរបស់រាជរដ្ឋាភិបាល ដើម្បីធានាថា បងប្អូនជួរមុខមានកម្លាំងចិត្ត និងសុខភាពមាំមួនក្នុងការបំពេញភារកិច្ចបំរើជាតិ មាតុភូមិ»។

ជាការឆ្លើយតបទៅនឹងកាយវិការមនុស្សធម៌ និងការគិតគូរប្រកបដោយព្រហ្មវិហារធម៌នេះ   ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានសម្តែងនូវការដឹងគុណយ៉ាងជ្រាលជ្រៅបំផុតចំពោះ ឯកឧត្តមបណ្ឌិត ស៊ាង ប៊ុនលាង និងលោកជំទាវ ហ៊ុន ប៊ុនធឿន។ ឯកឧត្តមអភិបាលខេត្ត បានមានប្រសាសន៍ចំណាប់អារម្មណ៍ថា ក្នុងនាមរដ្ឋបាលខេត្ត និងក្នុងនាមកងកម្លាំងទាំងអស់ ខ្ញុំបាទសូមលំឱនកាយគោរពថ្លែងអំណរគុណយ៉ាងជ្រាលជ្រៅបំផុត។ អំណោយជាសម្ភារៈប្រើប្រាស់ និងថ្នាំពេទ្យនាពេលនេះ គឺចំពេលដែលយើងកំពុងត្រូវការចាំបាច់ ហើយវាបានក្លាយជាកម្លាំងចិត្តដ៏មហិមា ជម្រុញស្មារតីកងកម្លាំងយើងឱ្យកាន់តែរឹងមាំទ្វេដង។

ជាមួយគ្នានេះដែរ តំណាងកងកម្លាំងឈរជើងតាមបន្ទាត់ព្រំដែន ក៏បានបង្ហាញនូវអារម្មណ៍រំភើបនិងបានប្ដេជ្ញាចិត្តយ៉ាងមុតមាំថា ទោះបីជាត្រូវលះបង់ក្នុងតម្លៃណាក៏ដោយ គឺដាច់ខាតត្រូវតែការពារបូរណភាពទឹកដី សន្តិសុខតាមព្រំដែន និងភាពសុខសាន្តរបស់ប្រជាពលរដ្ឋឱ្យទាល់តែបាន ដើម្បីឆ្លើយតបទៅនឹងទំនុកចិត្ត និងការយកចិត្តទុកដាក់ពីក្រោយបង្អែករបស់ថ្នាក់ដឹកនាំ។

ព្រឹត្តិការណ៍កាលពីរសៀលថ្ងៃទី១៨ ខែមិថុនា ឆ្នាំ២០២៦ នេះ មិនត្រឹមតែជាការចែករំលែកសម្ភារៈប៉ុណ្ណោះទេ ប៉ុន្តែវាគឺជាសក្ខីភាពមួយបង្ហាញពី «សាមគ្គីភាពរវាងសមរភូមិមុខ និងសមរភូមិក្រោយ»។ ដរាបណាថ្នាក់ដឹកនាំនៅតែបន្តគិតគូរពីសុខទុក្ខរបស់កងទ័ព ហើយកងទ័ពនៅតែមានស្មារតីស្មោះត្រង់ការពារជាតិ ដរាបនោះបូរណភាពទឹកដី និងសន្តិភាពរបស់កម្ពុជានឹងត្រូវរក្សាបានយ៉ាងគង់វង្សជានិរន្តរ៍៕

ដោយ៖ ឈុន សារ៉ាត