AKP ភ្នំពេញ ថ្ងៃទី១៥ ខែមិថុនា ឆ្នាំ២០២៦--សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានគូសបញ្ជាក់ថា ការអប់រំ និងបណ្តុះបណ្តាលវិជ្ជាជីវៈ ហៅកាត់ថា (TVET) មិនត្រូវយកគ្រូដែលមិនច្បាស់លាស់ មកបង្រៀនសិស្សនោះឡើយ ខណៈ សម្ដេច ណែនាំឱ្យយកចិត្តទុកដាក់លើគុណភាព ក្នុងការបណ្តុះបណ្តាលផងដែរ។ 

ការបញ្ជាក់របស់ សម្តេចធិបតី ហ៊ុន ម៉ាណែត ក្នុងពិធីអបអរសាទរទិវាជាតិ អប់រំបណ្តុះបណ្តាលបច្ចេកទេសនិងវិជ្ជាជីវៈ លើកទី៩ ឆ្នាំ២០២៦ ក្រោមប្រធានបទ «TVET ផ្តល់ជំនាញ ការងារ និងប្រាក់ចំណូល» នៅថ្ងៃចន្ទ ទី១៥ ខែមិថុនា ឆ្នាំ២០២៦។ ថ្លែងក្នុងឱកាសនោះ សម្ដេចធិបតី បានឱ្យដឹងថា ការបណ្ដុះបណ្ដាលជំនាញនេះ គ្រូត្រូវចេះឱ្យពិតប្រាកដ កុំខ្វះគ្រូ ទៅយកគ្រូជំនាញអគ្គិសនី មកបង្រៀនឆុងកាហ្វេ។ ការបណ្ដុះបណ្ដាលជំនាញនេះ មុនគេ គឺត្រូវធានាគុណភាពគ្រូ បើសិនជាគ្រូមិនប្រាកដទេ សិស្សកាន់តែមិនប្រាកដទៅទៀត។ 

លើសពីនេះ សម្តេចធិបតី បានណែនាំដល់ក្រសួងការងារ ចំពោះការបណ្ដុះបណ្ដាលជំនាញឱ្យ មានប្រសិទ្ធភាព ត្រូវត្រៀមលក្ខណៈគ្រូឱ្យច្បាស់ ឱ្យពិតប្រាកដ និងមេរៀនបង្រៀនឱ្យចំគោលដៅផងដែរ។ជាមួយគ្នានោះដែរ សម្តេចធិបតីបានគូសបញ្ជាក់ថា ៖«ខ្ញុំសូមថា ធ្វើយ៉ាងម៉េច គិតផ្តួតផ្ដើមខ្ញុំគាំទ្រ តែសូមធានាគុណភាពឱ្យបាន ព្រោះរៀនខុសនេះ គ្រោះថ្នាក់ទៀត ព្រោះសិស្សត្រូវជឿគ្រូ ហើយគ្រូមិនច្បាស់ ទៅបង្រៀនសិស្ស ហើយសិស្សរៀនដំបូងគេ គឺយកក្បួនខុសនឹង គឺពិបាកហើយ។ ចឹងធ្វើយ៉ាងម៉េច សូមយកចិត្តទុកដាក់ លើការបណ្ដុះបណ្ដាលគ្រូ និងរៀបចំ មេរៀនឱ្យត្រូវតែម្ដង»។ 

ជាមួយគ្នានោះដែរ សម្តេចធិបតីបានរំលឹកថា ការអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) មានតួនាទីសំខាន់ មិនអាចខ្វះបាន ក្នុងការអភិវឌ្ឍមូលធនមនុស្ស ដោយជួយផ្ដល់ឱ្យអ្នកសិក្សានូវចំណេះដឹង ជំនាញបច្ចេកទេស សមត្ថភាព និងឥរិយាបទការងារ ដើម្បីក្លាយខ្លួនជាកម្លាំងពលកម្មជំនាញ អ្នកបច្ចេកទេស និងចូលរួមកាត់បន្ថយគម្លាតជំនាញ នៅក្នុងទីផ្សារការងារ។ គិតនៅត្រឹមខែឧសភា ឆ្នាំ២០២៦នេះ មានគ្រឹះស្ថាន TVET ក្រោមឱវាទក្រសួងសរុបចំនួន ២៦២គ្រឹះស្ថាន៕ 

ដោយ៖ប៊ុនរិទ្ធ