AKP តាកែវថ្ងៃទី០៨ខែមិថុនាឆ្នាំ២០២៦ -- ព្រះញ្ញាណសោភ័ណ យន វាសនា ព្រះមង្គលទិព្វលោកមុនី ព្រះបាឡាត់គណខេត្តតាកែវ និមន្តកាត់ស្រោមវិញ្ញាសារ ប្រឡងវិញ្ញាបនបត្រធម្មវិន័យ ថ្នាក់ត្រី ថ្នាក់ទោ និងថ្នាក់ឯក សម្រាប់ឆ្នាំសិក្សា២០២៥-២០២៦ នៅមណ្ឌលប្រឡងសាលាពុទ្ធិកបឋមសិក្សាវត្តបារមីគោតម។និមន្តនិងអញ្ជើញចូលរួមក្នុងពិធីនោះដែរដោយ ព្រះអនុគណស្រុកព្រៃកប្បាស ព្រះអនុគណស្រុកអង្គរបូរី អាជ្ញាធរស្រុកព្រៃកប្បាសនិងស្រុកអង្គរបូរី មន្ត្រីការិយាល័យធម្មការនិងសាសនាស្រុកទាំងពីរ មន្រ្តីគណៈមេប្រយោគជាព្រះសង្ឃនិងគ្រហស្ថ និងបេក្ខសាមណសិស្សប្រឡងចំនួន357អង្គ/នាក់។ការប្រឡងនេះប្រារព្ធធ្វើឡើង នៅវត្តបារមីគោតមស្ថិតនៅក្នុងឃុំពោធិ៍រំចាកស្រុកព្រៃកប្បាសខេត្តតាកែវ កាលពីព្រឹកថ្ងៃទី០៧ខែមិថុនាឆ្នាំ២០២៦។

សម្រាប់មណ្ឌលប្រឡងវត្តបារមីគោតមនេះ មានពីរស្រុកចូលរួមគឺស្រុកព្រៃក ប្បាសនិងស្រុកអង្គរបូរី មានបេក្ខសាមណសិស្សប្រឡងសរុបចំនួន357អង្គ/នាក់។ចែកចេញជា16បន្ទប់ ក្នុងនោះថ្នាក់ត្រីមានចំនួន210អង្គ/នាក់ស្មើនឹង09បន្ទប់ ថ្នាក់ទោមាន90អង្គ/នាក់ស្មើនឹង04បន្ទប់ និងថ្នាក់ឯកមានចំនួន57អង្គ/នាក់ស្មើនឹង03បន្ទប់។     

ព្រះញ្ញាណសោភ័ណ យន វាសនា ព្រះមង្គលទិព្វលោកមុនី ព្រះបាឡាត់គណខេត្តតាកែវ បានធ្វើការណែនាំទៅដល់បេក្ខសាមណសិស្ស ដែលបានចូលរួមប្រឡងទាំងអស់ ត្រូវតែខិតខំប្រឹងប្រែងក្នុងការប្រឡង។ត្រូវគោរពឱ្យខាងតែបានចំពោះបទបញ្ជាផ្ទៃក្នុងនៃការប្រឡង ជៀសវាងការបង្កភាពអាណាធិបតេយ្យនៅក្នុងបន្ទប់ប្រឡង។

ព្រះបាឡាត់គណខេត្តតាកែវ បានមានថេរដីកាបន្តថា ដើម្បីធានាបាននូវប្រសិទ្ធភាពក្នុងការប្រឡង បេក្ខសាមណសិស្សត្រូវខិតខំប្រឹងប្រែងនិងបញ្ចេញឱ្យអស់ពីសមត្ថភាពដែលខ្លួនមាន។ហើយពិសេសត្រូវរក្សាឱ្យបាននូវសណ្ដាប់ធ្នាប់ក្នុងពេលប្រឡង មិនត្រូវបង្កភាពរញ៉េរញ៉ៃដោយលួចចម្លងគ្នា ឬយកព្រុយយ៉ុងចូលក្នុងបន្ទប់ប្រឡងឡើយ និងមិនត្រូវដើរឆ្លងកាត់ពីតុមួយទៅតុមួយទៀតនោះទេ។ពោលគឺធ្វើយ៉ាងណាត្រូវគោរពឱ្យបានជាដាច់ខាត និងអនុវត្តន៍ឱ្យបានល្អ នូវបទបញ្ជាផ្ទៃក្នុងរបស់មណ្ឌលប្រឡង។ហើយប្រសិនជាមានបេក្ខសាមណសិស្សអង្គណា ប្រព្រឹត្តផ្ទុយនឹងបទបញ្ជា នឹងត្រូវធ្លាក់ដោយស្វ័យប្រវត្តិ។

ព្រះបាឡាត់គណខេត្តតាកែវ បានមានថេរដីកាបញ្ជាក់ថា ការប្រឡងវិញ្ញាបន បត្រធម្មវិន័យនាពេលនេះ គឺជាការរួមចំណែកយ៉ាងសំខាន់ ក្នុងការបណ្ដុះបណ្ដាលធនធានមនុស្សក្នុងជួរព្រះសង្ឃ និងលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋឱ្យកាន់តែរីកចម្រើន ជាពិសេសនឹងមានសេចក្ដីថ្លៃថ្នូរជូនជាតិមាតុភូមិ។ព្រោះព្រះពុទ្ធសាសនាជាមូលដ្ឋានគ្រឹះនៃចរិយាធម៌ គុណធម៌ សីលធម៌ និងការពង្រឹងនូវគុណភាពលើអភិបាលកិច្ចគ្រប់លំដាប់ថ្នាក់ ដើម្បីឱ្យកិច្ចការពុទ្ធសាសនាមានសណ្ដាប់ធ្នាប់ល្អ ធានាបាននូវការសាមគ្គីភាពក្នុងជួរពុទ្ធសាសនិកជន។  

សម្រាប់ការប្រឡងនៅមណ្ឌលប្រឡងសាលាពុទ្ធិកបឋមសិក្សាវត្តបារមីគោតមនេះ មានការគាំទ្រនិងទំនុកបម្រុងទាំងចង្ហាន់និងភេសជ្ជៈ ប្រគេនបេក្ខសាមណសិស្សប្រឡងទាំងអស់ ដោយព្រះគ្រូសីលាភិមុនី សែម សុខណេង ទីប្រឹក្សាផ្ទាល់សម្ដេចព្រះសង្ឃនាយកនៃព្រះរាជាណាចក្រកម្ពុជា ព្រះមន្ត្រីសង្ឃជំនួយការសាលាអនុគណស្រុកព្រៃកប្បាស និងជាព្រះចៅអធិការវត្តបារមីគោតម រួមនឹងពុទ្ធបរិស័ទជិតឆ្ងាយជាច្រើននាក់ចូលរួមទំនុកបម្រុង៕

 ដោយ៖ អ៊ុច សៀង