AKP កំពង់ធំ ថ្ងៃទី០៦ ខែមិថុនា ឆ្នាំ២០២៦ -- លោក សាយ គឹមឡម អភិបាលស្រុកស្ទោង បានលើកឡើងថា គម្រោងផ្នែកសេវាសង្គម និងបរិស្ថាន របស់មូលនិធិឃុំគឺជាការគិតគូរយកចិត្តទុកដាក់ខ្ពស់របស់សម្ដេចធិបតី ហ៊ុន ម៉ាណែត ដល់ពលរដ្ឋក្នុងមូលដ្ឋាន ក្នុងឱកាសដែលលោកអញ្ជើញជួបសំណេះសំណាលសួរសុខទុក្ខ និងចែកស្បៀងសង្គ្រោះជូនពលរដ្ឋងាយរងហានិភ័យប្រមាណ ៤០គ្រួសារនៅក្នុងឃុំរុងរឿង ស្រុកស្ទោងមខេត្តកំពង់ធំ កាលពីរសៀលថ្ងៃទី០៥ ខែមិថុនា ឆ្នាំ២០២៦។

លោកអភិបាលស្រុកបានបញ្ជាក់ថា ជាមួយនឹងគម្រោងថវិកាមូលនិធិឃុំក្នុងការកសាងហេដ្ឋារចនាសម្ព័ន្ធនានានៅក្នុងឃុំ គម្រោងផ្នែកសេវាសង្គម និងបរិស្ថាននេះកាន់តែមានអាទិភាពបំផុតមួយសម្រាប់លើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើង ជាពិសេសជួយសម្រួលដល់ពលរដ្ឋងាយរងហានិភ័យ ថែមទាំងស្របតាមយុទ្ធសាស្ត្ររបស់រាជរដ្ឋាភិបាលអាណត្តិទី៧ នេះថែមទៀតផង។

ជាមួយគ្នានេះ លោកអភិបាលស្រុកបានក្រើនរំលឹកដល់អាជ្ញាធរភូមិ/ឃុំ ត្រូវតាមដានដល់សុខទុក្ខពលរដ្ឋឱ្យបានជាប់ជាប្រចាំ ជាមន្ត្រីសកម្មដែលនៅរួមរស់រួមសុខទុក្ខ និងយល់ពីបញ្ហា ព្រមទាំងតម្រូវការជាអាទិភាព ជាពិសេសពុកម៉ែបងប្អូនដែលងាយរងហានិភ័យប្រកបដោយភាពជាក់ស្ដែងរបស់ប្រជាពលរដ្ឋគ្រប់ស្ថានភាពទាំងការផ្ដល់សេវាប្រកបដោយគុណភាពប្រសិទ្ធភាព ឆាប់រហ័ស និងជួយសង្គ្រោះ ពេលដែលពលរដ្ឋមានបញ្ហាឬឧបទ្ទវហេតុផ្សេងៗ ព្រមទាំងធ្វើរបាយការណ៍ឱ្យបានជាប់ជាប្រចាំ មិនមែនជាមន្ត្រីជើង១០ នោះឡើយ។

សូមបញ្ជាក់ថា ពុកម៉ែបងប្អូនងាយរងហានិភ័យដែលទទួលបានអំណោយនៅពេលនេះមានចំនួន ៤០គ្រួសារដែលក្នុង ១គ្រួសារទទួលបាននូវអង្ករចំនួន ១បេ ត្រីខ ១យួរ ទឹកត្រី ១យួរ ប៊ីចេង ១ថង់ និងមុង១ ដែលជាគម្រោងមូលនិធិឃុំរុងរឿងឆ្នាំ២០២៦៕