AKP ភ្នំពេញ ថ្ងៃទី២៧ ខែឧសភា ឆ្នាំ២០២៦ -- ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយនៅក្នុងសុន្ទរកថាមួយទៅកាន់អ្នកចូលរួមក្នុងកិច្ចប្រជុំលើកទី៥៨ នៃក្រុមប្រឹក្សាប្រធានភ្នាក់ងារសន្តិសុខ និងសេវាកម្មពិសេសនៃសម្ព័ន្ធរដ្ឋឯករាជ្យ (CIS) ថា ស្ថានភាពពិភពលោកបានក្លាយជាការលំបាកយ៉ាងខ្លាំង ដោយមានចំណុចអស្ថិរភាពថ្មីៗកំពុងលេចឡើងតាមបណ្តោយព្រំដែននៃប្រទេសនានានៃ CIS។

ប្រមុខរដ្ឋរូបនេះបានចង្អុលបង្ហាញថា «សព្វថ្ងៃនេះ ស្ថានភាពយោធានិងនយោបាយទូទាំងពិភពលោកបានក្លាយទៅជាការលំបាកយ៉ាងខ្លាំង។វិបត្តិធ្ងន់ធ្ងរមួយបានលេបត្របាក់តំបន់មជ្ឈិមបូព៌ា។ ចំណុចអស្ថិរភាពថ្មីៗបានលេចឡើង រួមទាំងនៅជិតព្រំដែនរបស់យើងផងដែរ។ ក្នុងន័យនេះ វាមានសារៈសំខាន់ណាស់ក្នុងការប្រើប្រាស់សមត្ថភាពវិភាគ បុគ្គលិក ប្រតិបត្តិការនិងបច្ចេកទេសរបស់ភ្នាក់ងារតាមរបៀបដែលមានប្រសិទ្ធភាពបំផុត ដើម្បីធានាបាននូវការការពារដែលអាចទុកចិត្តបានរបស់សម្ព័ន្ធប្រឆាំងនឹងការគំរាមកំហែងផ្ទៃក្នុង និងខាងក្រៅដែលអាចកើតមាន ចែករំលែកព័ត៌មានជាប្រចាំ និងបង្កើតវិធីសាស្រ្តបង្រួបបង្រួមដើម្បីដោះស្រាយបញ្ហាប្រឈមទូទៅ»។

លោក ពូទីន បានកត់សម្គាល់ថា អ្នកចូលរួមកិច្ចប្រជុំត្រូវបានគេរំពឹងថានឹងពិភាក្សាយ៉ាងហ្មត់ចត់អំពីបញ្ហាវិជ្ជាជីវៈជាច្រើន រួមទាំងវិធីដែលមានប្រសិទ្ធភាពបំផុតក្នុងការប្រយុទ្ធប្រឆាំងនឹងអំពើភេរវកម្ម ភាពជ្រុលនិយម ឧក្រិដ្ឋកម្មចំឆ្លងដែនដែលមានការចាត់តាំង ឧក្រិដ្ឋកម្មតាមអ៊ីនធឺណិត និងការគំរាមកំហែងសន្តិសុខជាមូលដ្ឋានផ្សេងទៀត។

ប្រធានាធិបតីរុស្ស៊ីរូបនេះបានសន្និដ្ឋានថា «ខ្ញុំជឿជាក់ថា លទ្ធផលនៃកិច្ចប្រជុំនេះនឹងរួមចំណែកដល់ការធានាការអភិវឌ្ឍប្រកបដោយសុវត្ថិភាពនិងស្ថិរភាពរបស់ប្រទេស និងប្រជាជនរបស់យើង»៕

ដោយ៖ យា ចិន្ដាខន្ដី (ប្រភព៖ តាសស៍)