AKP ភ្នំពេញ ថ្ងៃទី២៥ ខែឧសភា ឆ្នាំ២០២៦ -- រដ្ឋាភិបាលឥណ្ឌូណេស៊ីកំពុងពន្លឿនផែនការសាងសង់ «ជញ្ជាំងសមុទ្រយក្ស» តាមបណ្តោយឆ្នេរសមុទ្រភាគខាងជើងនៃកោះជ្វា ដើម្បីដោះស្រាយបញ្ហាប្រែប្រួលអាកាសធាតុ ការពារមជ្ឈមណ្ឌលសេដ្ឋកិច្ចយុទ្ធសាស្ត្រ និងកាត់បន្ថយហានិភ័យនៃការលិចដី និងការកើនឡើងនៃកម្រិតទឹកសមុទ្រ។

លោក អាហ្គូស ហារីម័រទី យុដហូយ៉ូណូ (Agus Harimurti Yudhoyono) រដ្ឋមន្ត្រីក្រសួងសម្របសម្រួលសម្រាប់ហេដ្ឋារចនាសម្ព័ន្ធ និងអភិវឌ្ឍន៍តំបន់ បាននិយាយថា គម្រោងនេះមិនមែនគ្រាន់តែជាជញ្ជាំងសមុទ្រនោះទេ ប៉ុន្តែក៏មានគោលបំណងការពារសេដ្ឋកិច្ចរបស់ប្រទេស និងជីវភាពរស់នៅរបស់ប្រជាជនតាមឆ្នេរសមុទ្ររាប់លាននាក់ផងដែរ។

ក្រោមផែនការនេះ ជញ្ជាំងសមុទ្រប្រវែង ៥៧៥គីឡូម៉ែត្រនឹងត្រូវបែងចែកជា ១៥ផ្នែកសម្រាប់ការអនុវត្តជាដំណាក់កាល។ គម្រោងនេះត្រូវបានចាត់ទុកថាជាអាទិភាពយុទ្ធសាស្ត្រជាតិក្រោមការដឹកនាំរបស់លោកប្រធានាធិបតី ប្រាបូវ៉ូ ស៊ូប៊ីយ៉ាន់តូ (Prabowo Subianto) ដើម្បីការពារតំបន់លំនៅដ្ឋាន កំពង់ផែសមុទ្រ អាកាសយានដ្ឋាន តំបន់ឧស្សាហកម្ម ដីកសិកម្ម និងហេដ្ឋារចនាសម្ព័ន្ធសំខាន់ៗនៅភាគខាងជើងកោះជ្វា។

លោក អាហ្គូស បានសង្កត់ធ្ងន់ថា ការប្រែប្រួលអាកាសធាតុបានក្លាយជាបញ្ហាប្រឈមដ៏ធំមួយ ដែលបង្ខំឱ្យប្រទេសឥណ្ឌូណេស៊ីពន្លឿនវិធានការសម្របខ្លួន។ ការកសាងហេដ្ឋារចនាសម្ព័ន្ធធន់នឹងអាកាសធាតុ គឺជាជំហានចាំបាច់មួយដើម្បីធានាបាននូវការអភិវឌ្ឍប្រកបដោយចីរភាពរយៈពេលវែង។

រដ្ឋាភិបាលឥណ្ឌូណេស៊ីបាននិយាយថា គម្រោងនេះនឹងរួមបញ្ចូលធាតុផ្សំបច្ចេកទេស បរិស្ថាន និងសង្គម។ អាជ្ញាធរគ្រប់គ្រងឆ្នេរសមុទ្រកោះជ្វាខាងជើងនឹងអនុវត្តការសាងសង់ជាដំណាក់កាល ដោយគិតគូរពីស្ថានភាពសេដ្ឋកិច្ច និងជីវភាពរស់នៅរបស់សហគមន៍ក្នុងតំបន់ ជាពិសេសអ្នកនេសាទតាមឆ្នេរសមុទ្រ។

ទន្ទឹមនឹងនេះ រដ្ឋមន្ត្រីក្រសួងវិនិយោគ និងឧស្សាហកម្ម លោកស្រី រ៉ូសាន រ៉ូអេស្លានី (Rosan Roeslani) បាននិយាយថា ទីក្រុងហ្សាការតាកំពុងពិចារណាពង្រីកតួនាទីរបស់គម្រោងនេះលើសពីការការពារឆ្នេរសមុទ្រ ដោយមានគោលបំណងបង្កើតមជ្ឈមណ្ឌលកំណើនសេដ្ឋកិច្ចថ្មី និងទាក់ទាញការវិនិយោគ។

យោងតាមរដ្ឋាភិបាល បានឱ្យដឹងថា តំបន់ឆ្នេរសមុទ្រភាគខាងជើងនៃកោះជ្វាបច្ចុប្បន្ន រួមចំណែកប្រមាណ ៣៦៨,៣ប៊ីលានដុល្លារអាម៉េរិកដល់ផលិតផលក្នុងស្រុកសរុប (GDP) ជាតិ។ ដូច្នេះ គម្រោង «ជញ្ជាំងសមុទ្រយក្ស» ត្រូវបានគេមើលឃើញថាជាផ្នែកមួយនៃយុទ្ធសាស្ត្ររយៈពេលវែង ដើម្បីការពារនិរន្តរភាពនៃទីក្រុងឆ្នេរសមុទ្រ និងប្រព័ន្ធអេកូឡូស៊ីសេដ្ឋកិច្ចរបស់ប្រទេសឥណ្ឌូណេស៊ី៕

ដោយ៖ យា ចិន្ដាខន្ដី (ប្រភព៖ VNA)