AKP ភ្នំពេញ ថ្ងៃទី២២ ខែឧសភា ឆ្នាំ២០២៦ -- ការផ្លាស់ប្តូរសាររវាងអ៊ីរ៉ង់ និងសហរដ្ឋអាមេរិកតាមរយៈការសម្របសម្រួលរបស់ប៉ាគីស្ថាននៅតែបន្ត ខណៈដែលកិច្ចខិតខំប្រឹងប្រែងបន្តឈានដល់កិច្ចព្រមព្រៀងក្របខ័ណ្ឌមួយ ដោយមានភាពខុសគ្នាមួយចំនួននៅមិនទាន់ត្រូវបានដោះស្រាយនៅឡើយ។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានពាក់កណ្តាលផ្លូវការរបស់អ៊ីរ៉ង់ ISNA កាលពីល្ងាចថ្ងៃព្រហស្បតិ៍។

យោងតាមសារព័ត៌មាន ​​ISNA បានឱ្យដឹងថា រដ្ឋមន្ត្រីក្រសួងមហាផ្ទៃប៉ាគីស្ថាន លោក ម៉ូសស៊ីន ណាកវី (Mohsin Naqvi) ដែលបានធ្វើដំណើរទៅកាន់ទីក្រុងតេអេរ៉ង់ជាលើកទីពីរក្នុងសប្តាហ៍នេះ បានផ្ញើសារមួយពីភាគីអាម៉េរិកទៅកាន់មន្ត្រីអ៊ីរ៉ង់។

ទីភ្នាក់ងារនេះបាននិយាយថា លោក ណាកវី បានជួបជាមួយមន្ត្រីអ៊ីរ៉ង់ជាច្រើនរូប រួមទាំងលោកប្រធានាធិបតី ម៉ាសាអ៊ូដ ប៉េហ្សេសគីអាន់ (Masoud Pezeshkian) រដ្ឋមន្ត្រីការបរទេស លោក អាបាស់ អារ៉ាកឈី (Abbas Araghchi) និងរដ្ឋមន្ត្រីក្រសួងមហាផ្ទៃ លោក អេសកាន់ដារ ម៉ូម៉េនី (Eskandar Momeni)។

ទីភ្នាក់ងារសារព័ត៌មាន ISNA ក៏បាននិយាយផងដែរថា លោក ណាកវី នឹងស្នាក់នៅក្នុងទីក្រុងតេអេរ៉ង់នៅថ្ងៃសុក្រនេះ ដើម្បីបន្តកិច្ចពិគ្រោះយោបល់ និងចូលរួមកិច្ចប្រជុំបន្ថែមជាមួយមន្ត្រីអ៊ីរ៉ង់។

ក្រោមសំណើរបស់អ៊ីរ៉ង់ចំនួន ១៤ចំណុចដែលបានរាយការណ៍ពីមុនដោយសារព័ត៌មានអាណាដូលូ ទីក្រុងតេអេរ៉ង់ស្វែងរកកិច្ចចរចាដាច់ដោយឡែកទៅលើកម្មវិធីនុយក្លេអ៊ែររបស់ខ្លួន រួមទាំងបញ្ហាសារធាតុអ៊ុយរ៉ាញ៉ូមដែលបានពង្រឹង ក្នុងរយៈពេល ៣០ថ្ងៃបន្ទាប់ពីបទឈប់បាញ់ជាអចិន្ត្រៃយ៍ត្រូវបានសម្រេច។

ទោះជាយ៉ាងណាក៏ដោយ ទីក្រុងវ៉ាស៊ីនតោនចង់ឱ្យបញ្ហានុយក្លេអ៊ែរត្រូវបានពិភាក្សា និងដោះស្រាយ មុនពេលមានកិច្ចព្រមព្រៀងឈប់បាញ់ជាអចិន្ត្រៃយ៍ណាមួយ៕

ដោយ៖ យា ចិន្ដាខន្ដី (ប្រភព៖ AA-AKP)