AKP ភ្នំពេញ ថ្ងៃទី២៤ ខែឧសភា ឆ្នាំ២០២៦--ក្រុមកីឡាករវាយកូនគោលកម្ពុជាទទួលបានជ័យលាភីចំណាត់ថ្នាក់លេខ១ ខណៈក្រុមស្ថានទូតវៀតណាមប្រចាំកម្ពុជាទទួលបានចំណាត់ថ្នាក់លេខ២ នៅក្នុងការប្រកួតកីឡាវាយកូនគោលបង្កើនការរិតចំណងសាមគ្គីភាព និងមិត្តភាព ក្រោមការរៀបចំរបស់ក្រសួងមហាផ្ទៃនៃព្រះរាជាណាចក្រកម្ពុជា និងស្ថានទូតនៃសាធារណរដ្ឋសង្គមនិយមវៀតណាមប្រចាំកម្ពុជា ដែលបានប្រារព្ធកាលពីថ្ងៃទី២៣ ខែឧសភា ឆ្នាំ២០២៦ នៅទីលានវាយកូនគោល វឌ្ឍនៈ ក្រោមអធិបតីដ៏ខ្ពង់ខ្ពស់សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា។

ការប្រកួតជាផ្លូវការនេះមានការចូលរួមពីឯកឧត្តម មៀន វិញហ៊ូ ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋសង្គមនិយមវៀតណាម ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម នាយឧត្តមសេនីយ៍ ស ថេត អគ្គស្នងការដ្ឋាននគរបាលជាតិ និងជាប្រធានសមាគមកីឡាវាយកូនគោលក្រសួងមហាផ្ទៃ និងភ្ញៀវកិត្តិយស កីឡាករជាច្រើនរូបទៀត។

ឯកឧត្តម សរ សិទ្ធ រដ្ឋលេខាធិការ ក្រសួងមហាផ្ទៃបានថ្លែងថា៖ «ក្នុងឱកាសដ៏វិសេសវិសាលនេះ ខ្ញុំសូមគោរពថ្លែងអំណរគុណយ៉ាងជ្រាលជ្រៅជូនចំពោះសម្តេចក្រឡាហោម ស ខេង ឯកឧត្តមអភិសន្តិបណ្ឌិត ស សុខា ដែលបានផ្តួចផ្តើមឱ្យមានការប្រកួតកីឡាកីឡាវាយកូនគោលបង្កើនការរិតចំណងសាមគ្គីភាពនេះឡើង។ ជាមួយគ្នានេះដែរ ខ្ញុំសូមថ្លែងអំណរគុណចំពោះឯកឧត្តម លោក លោកស្រី ភ្ញៀវកិត្តិយស អគ្គនាយក លោកឧកញ៉ា កីឡាករទាំងអស់ដែលបានចូលរួមប្រកួត នាឱកាសនេះ។ តាមកម្មវិធីប្រកួតបានឱ្យដឹងថា កីឡាករក្រសួងមហាផ្ទៃមានចំនួន ៣២រូប កីឡាករនៃស្ថានទូតវៀតណាមចំនួន ៣២រូប បានមកចូលរួមប្រកួតនៅលើទីលានតែមួយ ក្នុងស្មារតីសាមគ្គីភាព និងភាពសប្បាយរីករាយ»។

ឯកឧត្តម សរ សិទ្ធិ បានមានប្រសាសន៍ទៀតថា ព្រឹត្តិការណ៍ប្រកួតកីឡាវាយកូនគោល នាពេលនេះ មិនត្រឹមតែជាការប្រកួតដើម្បីស្វែងរកអ្នកឈ្នះប៉ុណ្ណោះទេ ប៉ុន្តែថែមទាំងស្តែងឱ្យឃើញពីស្មារតីសាមគ្គីភាព មិត្តភាពដ៏រឹងមាំនៃកិច្ចសហប្រតិបត្តិការដ៏ជិតស្និទ្ធរវាងថ្នាក់ដឹកនាំ មន្ត្រីរាជការនៃក្រសួងមហាផ្ទៃនៃព្រះរាជាណាចក្រកម្ពុជា និងស្ថានទូតសាធារណរដ្ឋសង្គមនិយមវៀតណាម។ ជាការពិត ទាំងក្នុងអតីតកាល បច្ចុប្បន្ន ក៏ដូចជាទៅថ្ងៃអនាគត ព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាមបាននិងកំពុងធ្វើកិច្ចសហប្រតិបត្តិការជាមួយគ្នាយ៉ាងល្អប្រសើរលើគ្រប់វិស័យ ទាំងការទូត សេដ្ឋកិច្ច ពាណិជ្ជកម្ម អប់រំ វប្បធម៌ មនុស្សធម៌ បច្ចេកវិទ្យា ការអភិវឌ្ឍធនធានមនុស្ស និងវិស័យផ្សេងៗជាច្រើនទៀត ជាពិសេសគឺវិស័យសន្តិសុខ ដែលជាការងារស្នូលដ៏សំខាន់នៃស្ថេរភាពជាតិ សុខសុវត្ថិភាពរបស់ប្រជាជននៃប្រទេសទាំងពីរ។

ឯកឧត្តមរដ្ឋលេខាធិការក្រសួងមហាផ្ទៃ បានសង្កត់ធ្ងន់ថា កីឡាវាយកូនគោល ជាប្រភេទកីឡាដែលទាមទារការអត់ធ្មត់ យុទ្ធសាស្ត្រ និងការគោរពគ្នាទៅវិញទៅមក តាមរយៈការវាយគូនគោលនៅលើលាន ថ្ងៃនេះ យើងនឹងបង្កើតបាននូវបរិយាកាសដ៏រីករាយ បន្ធូរបន្ថយ កាត់បន្ថយពីការងារ ព្រមទាំងផ្តល់ឱកាសនូវការជួបជុំ ពិភាក្សា និងរិតចំណងសាមគ្គីភាព មិត្តភាពឱ្យកាន់តែស៊ីជម្រៅបន្ថែមទៀត ស្របតាមទិសដៅនៃទំនាក់ទំនងអ្នកជិតខាងល្អ មិត្តភាពជាប្រពៃណី និងកិច្ចសហការល្អគ្រប់ជ្រុងជ្រោយ ស្ថេរភាពយូរអង្វែងនៃប្រទេសទាំងពីរផងដែរ។

ឯកឧត្តម ង្វៀន មិញវូ បានថ្លែងថា ទំនាក់ទំនងជាអ្នកជិតខាងល្អ មិត្តភាពប្រពៃណី កិច្ចសហប្រតិបត្តិការគ្រប់ជ្រុងជ្រោយ និងយូរអង្វែងរវាងវៀតណាម និងកម្ពុជា ត្រូវបានកសាង និងបន្តពង្រឹងឡើង ដោយចំណងមិត្តភាពជិតស្និទ្ធរវាងបក្សទាំងពីរ រដ្ឋទាំងពីរ និងប្រជាជននៃប្រទេសទាំងពីរ។ ក្នុងចំណោមការរួមចំណែកទាំងនោះ មិនអាចមិនលើកឡើងពីកិច្ចសហប្រតិបត្តិការជិតស្និទ្ធរវាងស្ថានទូតវៀតណាម និងក្រសួងមហាផ្ទៃកម្ពុជាបានឡើយ។ ស្ថានទូតវៀតណាមប្រចាំកម្ពុជាតែងតែដើរតួនាទីជាស្ពានភ្ជាប់ដ៏សំខាន់ ដើម្បីជួយឱ្យក្រសួងមហាផ្ទៃកម្ពុជា ពង្រឹង និងពង្រីកកិច្ចសហប្រតិបត្តិការជាមួយក្រសួងសន្តិសុខសាធារណៈ និងស្ថាប័នពាក់ព័ន្ធរបស់វៀតណាម រួមចំណែកក្នុងការរក្សាសន្តិសុខ ស្ថិរភាព និងជំរុញការអភិវឌ្ឍវិបុលភាពរបស់ប្រទេសទាំងពីរ។

ឯកឧត្តមឯកអគ្គរដ្ឋទូតបន្ថែមថា ការប្រកួតកីឡាវាយកូនគោលមិត្តភាពនៅថ្ងៃនេះ គឺជាឱកាសដ៏ល្អប្រសើរមួយសម្រាប់យើងទាំងអស់គ្នា ដើម្បីផ្អាកពីការងារដ៏មមាញឹកមកចែករំលែកពេលវេលារីករាយជាមួយគ្នា នៅលើទីលានវាយកូនគោល ពង្រឹងការយល់ដឹងគ្នាទៅវិញទៅមក និងរឹតបន្តឹងចំណងទាក់ទងទាំងផ្ទាល់ខ្លួន និងជាស្ថាប័ន។ «ថ្ងៃនេះ យើងមិនត្រឹមតែមានការប្រកួតកីឡាដ៏ជោគជ័យប៉ុណ្ណោះទេ ប៉ុន្តែអ្វីដែលសំខាន់ជាងនេះ គឺជាឱកាសក្នុងការបន្តបណ្តុះ និងធ្វើឱ្យកាន់តែស៊ីជម្រៅនូវមិត្តភាព និងសាមគ្គីភាពរវាងមន្ត្រីនៃស្ថានទូតវៀតណាម និងក្រសួងមហាផ្ទៃកម្ពុជា។ «ការប្រកួតនៅថ្ងៃនេះនឹងក្លាយជានិមិត្តរូបនៃការបង្កើតការរីកចម្រើនថ្មីៗ ក្នុងកិច្ចសហប្រតិបត្តិការ ហើយគ្រប់ជំហាននៅលើទីលានបៃតង នឹងក្លាយជាភស្តុតាងនៃការរួមដំណើរ និងការគាំទ្រគ្នាទៅវិញទៅមក រវាងភាគីទាំងពីរនាពេលអនាគត។ លោកសង្ឃឹមថា ការប្រកួតនេះនឹងក្លាយជាសកម្មភាពប្រចាំឆ្នាំ ដែលជាស្ពានភ្ជាប់នៃការផ្លាស់ប្តូរវប្បធម៌ និងកីឡា ដើម្បីពង្រឹងការតភ្ជាប់ដ៏មានអត្ថន័យរវាងស្ថាប័នទាំងពីរ»។

គួរបញ្ជាក់ថា ចំពោះលទ្ធផលជ័យលាភី រួមមាន៖ ចំណាត់ថ្នាក់លេខ១ ឯកឧត្តម ស ថេត និង ឯកឧត្តម ម៉ៅ ពៅ ចំណាត់ថ្នាក់លេខ២ កីឡាករ២រូបនៃស្ថានទូតវៀតណាមប្រចាំកម្ពុជា និងចំណាត់ថ្នាក់លេខ៣ សម្តេចក្រឡាហោម ស ខេង, ឯកឧត្តម កែ គីមយ៉ាន និងឧកញ៉ា សុខ ហុង៕

ដោយ ហេង ណាលីន