AKP ភ្នំពេញ ថ្ងៃទី១២ ខែឧសភា ឆ្នាំ២០២៦--លោក ប៉ាល់ ជីវ័ន គ្រូបង្វឹកជម្រើសជាតិតេក្វាន់ដូ ITF កម្ពុជាបានគូសបញ្ជាក់ថា ក្រុមជម្រើសជាតិតេក្វាន់ដូITFកម្ពុជាកំពុងហ្វឹកហាត់បង្កើនគុណភាពបច្ចេកទេស ដើម្បីត្រៀមចូលរួមប្រកួតប្រជែងមេដាយជូនជាតិ ក្នុងជើងឯកអាស៊ី នាខែសីហា ឆ្នាំ២០២៦ នៅប្រទេសម៉ុងហ្គោលី។

លោក ប៉ាល់ ជីវ័ន គូសបញ្ជាក់ប្រាប់ទីភ្នាក់ងារសារព័ត៌មានកម្ពុជា AKP នៅព្រឹកថ្ងៃទី១២ ខែឧសភា ឆ្នាំ២០២៦នេះថា សម្រាប់សមាសភាពកីឡាករ កីឡាការិនីជម្រើសជាតិតេក្វាន់ដូ ITF កម្ពុជាមាន១៥នាក់ (កីឡាករ១០នាក់ និងកីឡាការិនី ៥នាក់) ក្រោមការប្រមូលផ្តុំរបស់មជ្ឈមណ្ឌលជាតិហ្វឹកហ្វឺនកីឡានៃក្រសួងអប់រំ យុវជន និងកីឡា ហើយសហព័ន្ធបានបន្ថែមកីឡាករបម្រុង២នាក់ ហ្វឹកហាត់ជុំគ្នា។ ចំពោះក្រុមជម្រើសជាតិតេក្វាន់ដូ ITF កម្ពុជាគ្រោងនឹងចូលរួមប្រកួតប្រជែងមេដាយជូនជាតិ នៅក្នុងព្រឹត្តិការណ៍ប្រកួតជើងឯកអាស៊ី នាខែសីហា ឆ្នាំ២០២៦ នៅប្រទេសម៉ុងហ្គោលី ដែលមានកីឡាករ កីឡាការិនីសរុបជិត ៣០នាក់ ដែលខ្លះចំណាយថវិកាផ្ទាល់ខ្លួន។

គ្រូបង្វឹករូបនេះបន្ថែមថា ចំនួនអត្តពលិកជម្រើសជាតិ ១៥នាក់នេះ និងគ្រូបង្វឹកម្នាក់ គ្រូជំនួយម្នាក់ សរុប១៧នាក់ ដែលស្ថិតក្រោមការប្រមូលផ្តុំរបស់មជ្ឈមណ្ឌលជាតិហ្វឹកហ្វឺនកីឡ ហើយចំនួននេះនៅរក្សាដូចឆ្នាំមុនដែរ ដោយលោកបង្ហាញការអរគុណយ៉ាងជ្រាលជ្រៅចំពោះក្រសួងអប់រំ យុវជន និងកីឡា ដែលមិនបានកាត់ចំនួនកីឡាករ កីឡាការិនីជម្រើសជាតិ។

លោក ប៉ាល់ ជីវ័ន បន្ថែមថា ក្រោយការរំសាយក្រុមជម្រើសជាតិ ៣-៤ ខែមក គឺក្រុមជម្រើសជាតិនេះត្រូវបានប្រមូលផ្តុំហ្វឹកហាត់ឡើងវិញ កាលពីខែមេសា ឆ្នាំ២០២៦ ដោយជាង១ខែមកនេះ សិទ្ធផលរបស់ក្រុមជម្រើសជាតិមិនធ្លាក់ពេកទេ ដោយសហព័ន្ធនៅតែបន្តឱ្យពួកគេបានហ្វឹកហាត់ ដើម្បីពង្រឹងគុណភាពត្រៀមការប្រកួតថ្នាក់ជាតិ និងអន្តរជាតិ ក្នុងឆ្នាំ២០២៦នេះ ដែលមានច្រើនព្រឹត្តិការណ៍ប្រកួត។

បើទោះជា ប្រភេទកីឡាតេក្វាន់ដូ ITF កម្ពុជាមានការរីកចម្រើន ជាពិសេសគឺអាចចូលរួមដណ្តើមមេដាយពីលើឆាកអន្តរជាតិបានជាបន្តបន្ទាប់យ៉ាងណាក្តី ក៏គ្រូបង្វឹករូបនេះនៅតែយល់ថា វានៅតែមិនគ្រប់គ្រាន់ទេ ដែលទាំងថ្នាក់ដឹកនាំសហព័ន្ធ គ្រូបង្វឹក កីឡាករ កីឡាការិនីនៅតែបន្តគោលដៅដណ្តើមភាពជោគជ័យថ្មីៗបន្ថែមទៀត សម្រាប់សហព័ន្ធ ក៏ដូចជាប្រទេសជាតិ ដែលយើងទាំងអស់គ្នានៅតែរត់បន្ថែមទៀត ដើម្បីដើរឱ្យទាន់នឹងការរីកចម្រើនជាលក្ខណៈអន្តរជាតិ។

ចំពោះការប្រកួតកីឡាតេក្វាន់ដូ ITF ជើងឯកអាស៊ី នាខែសីហា ឆ្នាំ២០២៦ខាងមុខ នៅប្រទេសម៉ុងហ្គោលី គឺក្រុមជម្រើសជាតិកម្ពុជាត្រៀមនឹងចូលរួមប្រកួតទាំងលើ៥វិញ្ញាសាធំ ដូចជាលើប្រភេទវិញ្ញាសាប្រយុទ្ធ សម្តែង មេគុន បច្ចេកទេសពិសេស វាយបំបែកក្តា ដោយយើងនឹងបែងចែកទៅតាមកម្រិតអាយុកីឡាករ កីឡាការិនី។ ជាគោលដៅដែលសហព័ន្ធដាក់ក្តីសង្ឃឹមខ្ពស់ក្នុងការដណ្តើមមេដាយជូនជាតិ គឺលើវិញ្ញាសាបច្ចេកទេសពិសេស ដែលកីឡាករកម្ពុជាមានទេពកោសល្យខ្ពស់ លោតបានល្អ ដែលធ្លាប់ឈ្នះមេដាយជូនជាតិ ក្នុងការប្រកួតនៅប្រទេសឥណ្ឌា កន្លងទៅ ខណៈក្តីសង្ឃឹមខ្លះទៀត គឺលើវិញ្ញាសាប្រយុទ្ធមួយចំនួនដែរ។

លោកបញ្ជាក់ជូនថា ៖«នៅប្រទេសម៉ុងហ្គោលី គឺតេក្វាន់ដូ ITF កម្ពុជាធ្លាប់ចូលរួមប្រកួតម្តង ការប្រកួតជើងឯកពិភពលោក កាលពីឆ្នាំ២០១៨ ដែលពេលនោះ គឺITF កម្ពុជាដណ្តើមបានមេដាយច្រើន ដោយទទួលបានពានរង្វាន់កីឡាករឆ្នើម និងពានរង្វាន់ចំណាត់ថ្នាក់លេខ៣ ក្នុងកម្រិតពិភពលោក។ ជារួម ការត្រៀមចូលរួមជើងឯកអាស៊ី នៅម៉ុងហ្គោលី នាខែសីហាខាងមុខនេះ គឺតេក្វាន់ដូ ITF កម្ពុជា នៅតែបន្តសម្រួចគោលដៅដណ្តើមមេដាយឱ្យបានក្នុងចំនួនមួយ ដែលយើងធ្លាប់ទទួលបានមេដាយហើយៗទៅលើកនេះ មិនទទួលបានមេដាយ មានន័យថា យើងបរាជ័យ ដូច្នេះទាំងគ្រូបង្វឹក កីឡាករ កីឡាការិនីជម្រើសជាតិទាំងអស់បានដាក់ចិត្តដាក់កាយប្រឹងប្រែងហ្វឹកហាត់រួមគ្នាយ៉ាងយកចិត្តទុកដាក់ក្នុងស្មារតីតែមួយ»។ 

លោក ប៉ាល់ ជីវ័ន អតីតកីឡាករ៏ឆ្នើម ដែលធ្លាប់ឈ្នះមេដាយអន្តរជាតិកម្រិតជើងឯកពិភពលោក ជើងឯកអាស៊ីជាច្រើនគ្រឿងបានគូសបញ្ជាក់ទៀតថា សម្រាប់ការចូលរួមប្រកួតអន្តរជាតិ សហព័ន្ធតែងតែស្វែងរកថវិកាដោយខ្លួនឯង ដែលថ្នាក់ដឹកនាំសហព័ន្ធតែងតែប្រឹងប្រែងកៀរគរថវិកាពីដៃគូសហការនានា ពីព្រោះការចំណាយរបស់កីឡាករម្នាក់ៗ ត្រូវចំណាយជិត ២០០០ដុល្លារ ទាំងការស្នាក់នៅ-ហូបចុក សំបុត្រយន្តហោះ និងត្រូវបង់សិទ្ធិប្រកួតជាដើម។

ជាមួយគ្នានេះ លោកក៏បានអំពាវនាវដល់សប្បុរសជន ក្រុមហ៊ុននានា ដែលមានបំណងចង់ចូលរួមឧបត្ថម្ភគាំទ្រដល់វិស័យកីឡាតេក្វាន់ដូ ITF កម្ពុជា សម្រាប់បេសកកម្មប្រកួតជើងឯកអាស៊ី នៅប្រទេសម៉ុងហ្គោលី នាខែសីហាខាងមុខនេះ គឺអាចចូលរួមឧបត្ថម្ភគាំទ្រដល់សហព័ន្ធ កីឡាករ កីឡាការិនីបានទោះតិចក្តី ច្រើនក្តី ដើម្បីគាំទ្រឱ្យបេសកកម្មអន្តរជាតិថ្មីមួយនេះទទួលបានជោគជ័យជូនជាតិ។ ជាចុងក្រោយ គ្រូបង្វឹករូបនេះបានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំ ក្រសួងអប់រំ យុវជន និងកីឡា ថ្នាក់ដឹកនាំមជ្ឈមណ្ឌលជាតិហ្វឹកហ្វឺនកីឡា ដែលផ្តល់ភាពជឿជាក់លើសមត្ថភាពកីឡាករ កីឡាការិនី និងថ្នាក់ដឹកនាំសហព័ន្ធកីឡាតេក្វាន់ដូ ITF កម្ពុជា ដែលមានឯកឧត្តមទេសរដ្ឋមន្ត្រី កែវ រ៉េមី ជាប្រធាន ក្នុងការបន្តគោលដៅអភិវឌ្ឍន៍កាន់តែរីកចម្រើន សាងភាពលេចធ្លោ សាងកិត្តិយសជូនជាតិពីលើឆាកអន្តរជាតិ៕

ដោយ ហេង ណាលីន