AKP ភ្នំពេញ ថ្ងៃទី៣០ ខែមីនា ឆ្នាំ២០២៦ -- ណាហ្វថា គឺជាវត្ថុធាតុដើមសំខាន់មួយដែលប្រើសម្រាប់ផលិតផលិតផលប្លាស្ទិកប្រចាំថ្ងៃ រួមទាំងសម្ភារៈវេជ្ជសាស្ត្រ ដូចជាសឺរាំង និងបំពង់បូមជាដើម កំពុងប្រឈមមុខនឹងភាពមិនប្រាកដប្រជានៃការផ្គត់ផ្គង់ ខណៈដែលភាពតានតឹងនៅមជ្ឈិមបូព៌ារំខានដល់លំហូរប្រេងសកលលោក។

ណាហ្វថា ដែលជាសារធាតុគីមីដែលមានប្រភពមកពីប្រេងឆៅ ត្រូវបានគេប្រើប្រាស់យ៉ាងទូលំទូលាយដើម្បីផលិតប្លាស្ទិកដែលមាននៅក្នុងរបស់របរជាច្រើនរាប់ចាប់តាំងពីឧបករណ៍ការពារផ្ទាល់ខ្លួនរហូតដល់ការវេចខ្ចប់អាហារ។

រោងចក្រចម្រាញ់ប្រេងឆៅភាគច្រើន ដែលផ្គត់ផ្គង់ប្រេងឆៅនៅក្នុងប្រទេសសិង្ហបុរីមានប្រភពមកពីមជ្ឈិមបូព៌ា ហើយត្រូវបានដឹកជញ្ជូនឆ្លងកាត់ច្រកសមុទ្រហ័រមុស ដែលជាច្រកផ្លូវសមុទ្រយុទ្ធសាស្ត្រដែលមានប្រហែល២០% នៃការជួញដូរប្រេងសកលលោក។ ការវាយប្រហារថ្មីៗនេះដែលផ្តោតទៅលើនាវាដឹកប្រេងនៅក្នុងតំបន់ បានរំខានដល់ចរាចរណ៍ដឹកជញ្ជូនដែលដាក់ភាពតានតឹងបន្ថែមទៀតទៅលើខ្សែសង្វាក់ផ្គត់ផ្គង់។

លោក មែលវីន តាន់ (Melvin Tan) អនុប្រធានសហព័ន្ធផលិតកម្មសិង្ហបុរី បាននិយាយថា ក្រុមហ៊ុនផលិតកំពុងប្រឈមមុខនឹងការគំរាមកំហែងគុណនឹងបី នៃការកើនឡើងនៃថ្លៃថាមពល ភស្តុភារ និងវត្ថុធាតុដើម ខណៈដែលតម្លៃប្រេងឥន្ធនៈជំរុញឱ្យថ្លៃអគ្គិសនី និងការដឹកជញ្ជូនកើនឡើងហើយការផ្គត់ផ្គង់វត្ថុធាតុដើមកាន់តែតឹងតែង ដូចជាវត្ថុធាតុដើមណាហ្វថាជាដើម ដែលជំរុញឱ្យថ្លៃដើមផលិតកម្មកើនឡើង។

ទន្ទឹមនឹងនេះ អ្នកជំនាញមកពីសាលាពាណិជ្ជកម្មសាកលវិទ្យាល័យជាតិសិង្ហបុរី បាននិយាយថា ផលប៉ះពាល់នៃការរំខានដល់ការផ្គត់ផ្គង់ប្រេងអាចពង្រីកហួសពីការផលិត និងផលិតផលប្លាស្ទិក ដោយកត់សម្គាល់ថាផលិតផលរងប្រេងក៏ត្រូវការដើម្បីផលិតជីផងដែរ ដែលមានសារៈសំខាន់សម្រាប់ការផលិតម្ហូបអាហារ។

អ្នកផ្គត់ផ្គង់បានរាយការណ៍ថា តម្លៃផលិតផលប្លាស្ទិកបានចាប់ផ្តើមកើនឡើងរួចហើយ ហើយអាចកើនឡើងរហូតដល់ ៥០% ប្រសិនបើការរំខាននៅតែបន្ត៕

ដោយ៖ យា ចិន្ដាខន្ដី (ប្រភព៖ VNA)