AKP ភ្នំពេញ ថ្ងៃទី៣០ ខែមីនា ឆ្នាំ២០២៦ -- ប្រទេសបារ៉ែនបាននិយាយកាលពីថ្ងៃអាទិត្យថា ប្រព័ន្ធការពារដែនអាកាសបានស្ទាក់ចាប់ និងបំផ្លាញមីស៊ីលចំនួន ១៧៤គ្រាប់ និងយន្តហោះគ្មានមនុស្សបើកចំនួន ៣៩១គ្រឿងដែលកំណត់គោលដៅលើព្រះរាជាណាចក្រនេះ ចាប់តាំងពីការចាប់ផ្តើមវាយប្រហាររបស់អ៊ីរ៉ង់នៅថ្ងៃទី២៨ ខែកុម្ភៈ។

នៅក្នុងសេចក្តីថ្លែងការណ៍មួយបានឱ្យដឹងថា អគ្គបញ្ជាការនៃកងកម្លាំងការពារជាតិបារ៉ែនបាននិយាយថា ប្រព័ន្ធការពារដែនអាកាសរបស់ខ្លួននៅតែបន្តប្រឈមមុខនឹងបញ្ហាជាបន្តបន្ទាប់នៃអ្វីដែលខ្លួនលើកឡើងថាជា«ការវាយប្រហារភេរវកម្មរបស់អ៊ីរ៉ង់»។ មិនមានព័ត៌មានលម្អិតអំពីអ្នកស្លាប់និងរបួស ឬការខូចខាតណាមួយត្រូវបានផ្តល់ឱ្យនោះទេ។

តំបន់ទាំងមូលបានស្ថិតក្នុងស្ថានភាពប្រុងប្រយ័ត្នចាប់តាំងពីសហរដ្ឋអាមេរិក និងអ៊ីស្រាអែលបានចាប់ផ្តើមការវាយប្រហាររួមគ្នាលើអ៊ីរ៉ង់នៅថ្ងៃទី២៨ ខែកុម្ភៈ ដែលរហូតមកដល់ពេលនេះបានសម្លាប់មនុស្សជាង១៣៤០នាក់ រួមទាំងមេដឹកនាំកំពូលអ៊ីរ៉ង់ លោក អាលី ខាមីណី (Ali Khamenei) ផងដែរ។

ទីក្រុងតេអេរ៉ង់បានសងសឹកដោយការវាយប្រហារដោយយន្តហោះគ្មានមនុស្សបើក និងមីស៊ីលដែលកំណត់គោលដៅលើអ៊ីស្រាអែល រួមជាមួយប្រទេសហ្ស៊កដានី អ៊ីរ៉ាក់ និងប្រទេសជាប់ឈូងសមុទ្រដែលមានទ្រព្យសម្បត្តិយោធាអាម៉េរិក បណ្តាលឱ្យមានអ្នកស្លាប់ និងខូចខាតដល់ហេដ្ឋារចនាសម្ព័ន្ធ ហើយរំខានដល់ទីផ្សារសកល និងវិស័យអាកាសចរណ៍៕

ដោយ៖ មូល មិនា (ប្រភព៖ AA-AKP)