AKP ភ្នំពេញ ថ្ងៃទី២៧ ខែមីនា ឆ្នាំ២០២៦ -- រដ្ឋមន្ត្រីការបរទេសកូរ៉េខាងត្បូង លោក ចូ យ៊ុន (Cho Hyun) កាលពីថ្ងៃព្រហស្បតិ៍ បានស្នើសុំសមភាគីប្រេស៊ីលរបស់លោកសម្រាប់កិច្ចសហប្រតិបត្តិការ ដើម្បីពង្រីកការនាំចេញប្រេងឆៅរបស់ប្រទេសប្រេស៊ីលមកកាន់ប្រទេសកូរ៉េខាងត្បូងចំពេលមានការព្រួយបារម្ភអំពីការផ្គត់ផ្គង់ថាមពល ដោយសារតែសង្គ្រាមនៅតំបន់មជ្ឈិមបូព៌ា។

ក្រសួងការបរទេសកូរ៉េខាងត្បូងបាននិយាយថា លោក ចូ បានស្នើឱ្យប្រទេសទាំងពីរស្វែងរកមធ្យោបាយសម្រាប់កិច្ចសហប្រតិបត្តិការបែបនេះខណៈដែលលោកបានជួបជាមួយរដ្ឋមន្ត្រីការបរទេសប្រេស៊ីល លោក មូរ៉ូ វីអេរ៉ា (Mauro Vieira) ក្នុងប្រទេសបារាំង នៅខាងក្រៅកិច្ចប្រជុំរដ្ឋមន្ត្រីការបរទេសក្រុមទាំងប្រាំពីរ (G7)។

លោក ចូ បានកត់សម្គាល់ពីអស្ថិរភាពថ្មីៗនៃការផ្គត់ផ្គង់ប្រេងឆៅ និងថាមពល ខណៈដែលភាគីទាំងពីរបានពិភាក្សាអំពីស្ថានភាពនៅតំបន់មជ្ឈិមបូព៌ា ក៏ដូចជាទំនាក់ទំនងទ្វេភាគី។

យោងតាមក្រសួងបានឱ្យដឹងថា លោក វីអេរ៉ា ក៏បានសម្តែងក្តីសង្ឃឹមសម្រាប់ប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) ដែលនឹងទៅទស្សនកិច្ចប្រទេសប្រេស៊ីលក្នុងពេលឆាប់ៗនេះបន្ទាប់ពីដំណើរទស្សនកិច្ចផ្លូវរដ្ឋរបស់ប្រធានាធិបតីប្រេស៊ីល ល្វីស អ៊ីណាស៊ីអូ លូឡា ដា ស៊ីលវ៉ា (Luiz Inacio Lula da Silva) ទៅកាន់ប្រទេសកូរ៉េខាងត្បូងកាលពីខែមុន។

ប្រទេសកូរ៉េខាងត្បូង និងប្រេស៊ីល ស្ថិតក្នុងចំណោមប្រទេសដែលត្រូវបានអញ្ជើញឱ្យចូលរួមកិច្ចប្រជុំរដ្ឋមន្ត្រី G7 ដែលបានរៀបចំនៅសប្តាហ៍នេះ៕

ដោយ៖ មូល មិនា (ប្រភព៖ យ៉ុនហាប់)