AKP កំពង់ស្ពឺ ថ្ងៃទី៧ ខែមីនា ឆ្នាំ២០២៦ -- លោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺបានកោតសរសើរ និងវាយតម្លៃខ្ពស់ចំពោះមន្ត្រីនារីទាំងអស់ ដែលបានខិតខំប្រឹងប្រែងបំពេញការងារយ៉ាងសកម្ម ទាំងការងាររដ្ឋបាល និងការចុះជួយកសិករនៅតាមមូលដ្ឋាន។  ការលើកឡើងរបស់លោកប្រធានមន្ទីរកសិកម្មខេត្ដបែបនេះ ក្នុងពិធីអបអរសាទរខួបលើកទី ១១៥ ទិវាអន្តរជាតិនារី ៨ មីនា ក្រោមប្រធានបទដ៏មានអត្ថន័យ «សន្តិភាព សន្តិសុខ សម្រាប់ស្ត្រី និងគ្រួសារ» ដែលរៀបចំឡើងដោយមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ កាលពិថ្ងៃទី៦ ខែមីនា ឆ្នាំ២០២៦ និងដោយការអញ្ជើញចូលរួមពីសំណាក់លោក-លោកស្រី អនុប្រធានមន្ទីរ ប្រធានការិយាល័យ និងមន្ត្រីរាជការជានារីទូទាំងមន្ទីរយ៉ាងច្រើនកុះករ។

លោក យឹម ណន បានថ្លែងបញ្ជាក់ថា ការប្រារព្ធពិធីនេះ គឺដើម្បីបង្ហាញពីការដឹងគុណ និងលើកទឹកចិត្តដល់មន្ត្រីរាជការជានារី ដែលតែងតែខិតខំប្រឹងប្រែងបំពេញការងារយ៉ាងសកម្ម មិនថាការងាររដ្ឋបាល ឬការងារចុះពង្រឹងវិស័យកសិកម្មនៅតាមមូលដ្ឋាន។ លោកប្រធានមន្ទីរបានបញ្ជាក់បន្ថែមថា ស្របតាមប្រធានបទឆ្នាំនេះ «សន្តិភាព» គឺជាគ្រឹះដ៏សំខាន់បំផុត ដែលអនុញ្ញាតឱ្យស្ត្រីមានឱកាសពេញលេញក្នុងកិច្ចអភិវឌ្ឍសមត្ថភាព ចំណេះដឹង និងការការពារសិទ្ធិសេរីភាពក្នុងគ្រួសារ និងសង្គម។ 

ជាមួយគ្នានេះ លោកប្រធានក៏បានផ្ដាំផ្ញើឱ្យមន្ត្រីនារីទាំងអស់ បន្តពង្រឹងសមត្ថភាព និងសាមគ្គីភាពផ្ទៃក្នុង ដើម្បីរួមចំណែកជម្រុញវិស័យកសិកម្មក្នុងខេត្តកំពង់ស្ពឺ ឱ្យកាន់តែរីកចម្រើនខ្លាំងក្លាបន្ថែមទៀត៕

ដោយ៖ ម៉ែន ប៊ុនធីម/AKP កំពង់ស្ពឺ