AKP ភ្នំពេញ ថ្ងៃទី០៤ ខែមីនា ឆ្នាំ២០២៦ -- អ្នកនាំពាក្យក្រសួងការបរទេសអ៊ីរ៉ង់ លោក អេស្មាអ៊ីល បាហ្គាអ៊ី (Esmaeil Baghaei) បាននិយាយកាលពីថ្ងៃអង្គារថា មធ្យោបាយតែមួយគត់ដើម្បីបញ្ចប់សង្គ្រាមគឺត្រូវបញ្ឈប់ «ការឈ្លានពាន» របស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់។

លោកបានធ្វើការកត់សម្គាល់នេះនៅក្នុងសន្និសីទសារព័ត៌មានប្រចាំសប្តាហ៍មួយដែលបានធ្វើឡើងនៅសាលារៀនមួយក្នុងរដ្ឋធានីតេអេរ៉ង់ប្រទេសអ៊ីរ៉ង់ ដែលត្រូវបានខូចខាតដោយសារតែការវាយប្រហារថ្មីៗនេះដោយសហរដ្ឋអាមេរិក និងអ៊ីស្រាអែល ខណៈពេលដែលលោកបានធ្វើអត្ថាធិប្បាយលើលក្ខខណ្ឌជាមុនរបស់ប្រទេសអ៊ីរ៉ង់សម្រាប់ការបញ្ចប់សង្គ្រាម។

លោក បាហ្គាអ៊ី បាននិយាយថា «ការឈ្លានពានផ្នែកយោធានេះមិនមែនជាជម្រើសរបស់យើងទេ។ ជម្រើសរបស់យើងតែងតែជាការទូត»ដោយលោកបានបន្ថែមថា ឧបករណ៍ការទូតរបស់អ៊ីរ៉ង់គឺ «ភាពក្លាហាន»បានបន្តផ្លូវការទូតដោយមានការគាំទ្រពីរដ្ឋាភិបាល ហើយបានខិតខំប្រឹងប្រែងរហូតដល់ពេលចុងក្រោយដើម្បីជៀសវាងសង្គ្រាម ប៉ុន្តែភាគីម្ខាងទៀតបានសម្រេចចិត្តចាប់ផ្តើមសង្គ្រាម។

លោកបានមានប្រសាសន៍ថា «មធ្យោបាយដើម្បីបញ្ឈប់សង្គ្រាមនេះគឺត្រូវបញ្ឈប់ការឈ្លានពាន។ ក្រុមប្រឹក្សាសន្តិសុខអង្គការសហប្រជាជាតិមានការទទួលខុសត្រូវក្នុងរឿងនេះ»។

លោក បាហ្គាអ៊ី បាននិយាយថា សហគមន៍អន្តរជាតិត្រូវតែធ្វើការសម្រេចចិត្តរបស់ខ្លួនមុនពេលវាយឺតពេល ហើយវិសាលភាពនៃសង្គ្រាមពង្រីកនៅក្នុងតំបន់អាស៊ីខាងលិច។

លោក បាហ្គាអ៊ី បាននិយាយថា អ៊ីរ៉ង់ត្រូវបានវាយប្រហារដោយអយុត្តិធម៌ និងដោយគ្មានហេតុផលណាមួយឡើយ ដោយលោកបានព្រមានថា «អណ្តាតភ្លើង» នៃសង្គ្រាមនឹងរាលដាលពាសពេញគ្រប់ទីកន្លែងប្រសិនបើមិនមានសកម្មភាពចាំបាច់។

កាលពីព្រឹកថ្ងៃសៅរ៍ ការវាយប្រហារតាមអាកាសរួមគ្នារវាងសហរដ្ឋអាមេរិក និងអ៊ីស្រាអែលលើទីក្រុងតេអេរ៉ង់ និងប្រទេសអ៊ីរ៉ង់បានសម្លាប់មេដឹកនាំកំពូល លោក អាលី ខាមេនី (Ali Khamenei) រួមជាមួយសមាជិកគ្រួសារមួយចំនួនរបស់មេដឹកនាំ មេបញ្ជាការយោធាជាន់ខ្ពស់ និងជនស៊ីវិល។ ប្រទេសអ៊ីរ៉ង់បានឆ្លើយតបតាមរយៈការវាយប្រហារដោយមីស៊ីល និងយន្តហោះគ្មានមនុស្សបើកជាច្រើនលើក ដែលកំណត់គោលដៅមូលដ្ឋានទ័ពអ៊ីស្រាអែល និងសហរដ្ឋអាមេរិកនៅទូទាំងតំបន់មជ្ឈិមបូព៌ា៕

ដោយ៖ មូល មិនា (ប្រភព៖ ស៊ីនហួ)