AKP ភ្នំពេញ ថ្ងៃទី០៣ ខែមីនា ឆ្នាំ២០២៦ -- សមាជិក​នៃ​ការិយាល័យ​នយោបាយ​នៃ​គណៈកម្មាធិការ​កណ្តាល​បក្ស​កុម្មុយនិស្ត​ចិន និង​ជា​រដ្ឋមន្ត្រី​ការបរទេសចិន លោក វ៉ាង យី (Wang Yi) បាន​និយាយ​តាម​ទូរស័ព្ទ​ជាមួយ​រដ្ឋមន្ត្រី​ការបរទេសអូម៉ង់ លោក សាយយីដ បាដឺរ ប៊ីន ហាម៉ាដ​ ប៊ីន ហាមូដ អាល់ប៊ូសៃឌី (Sayyid Badr bin Hamad bin Hamood Albusaidi)កាលពីម្សិលមិញនេះ ដោយលោកបាននិយាយថា ប្រទេសអូម៉ង់​បាន​សម្របសម្រួល​យ៉ាងសកម្ម​សម្រាប់​ការចរចា​អ៊ីរ៉ង់-សហរដ្ឋអាមេរិក និង​បាន​ខិតខំ​ប្រឹងប្រែង​ជាច្រើន​ដើម្បី​ការពារ​សន្តិភាព​ក្នុង​តំបន់ ហើយ​ចិន​ពេញចិត្ត​ចំពោះ​រឿង​នេះ។

នៅក្នុងកិច្ចសន្ទនាតាមទូរសព្ទនោះ លោក អាប៊ូសៃឌី បាន​និយាយ​ថាក្រោម​ការសម្របសម្រួល​របស់​ប្រទេស​អូម៉ង់ កិច្ចចរចា​រវាង​អ៊ីរ៉ង់ និង​សហរដ្ឋអាមេរិក​បាន​រីកចម្រើន​មិន​ធ្លាប់​មាន​ពីមុនមក ប៉ុន្តែ​វា​ជា​រឿង​គួរឱ្យ​សោកស្ដាយ​ដែល​សហរដ្ឋអាមេរិក និង​អ៊ីស្រាអែល​​បោះបង់​ចោល​លទ្ធផល​នៃ​កិច្ចចរចា ហើយ​ងាកមកចាប់ផ្តើម​សង្គ្រាមវិញ។ ការបន្ត​នៃ​សង្គ្រាម​នេះ​នឹង​នាំឱ្យ​មាន​អ្នកស្លាប់ និង​របួស​កាន់តែច្រើន និង​ការខូចខាត​ទ្រព្យសម្បត្តិ។គ្រប់ភាគី​ទាំងអស់​ឥឡូវនេះ​គួរតែ​ធ្វើការ​រួមគ្នា​ដើម្បី​លើកកម្ពស់​បទឈប់បាញ់​មុន​កាលកំណត់។

លោកបានបន្ថែមថា ក្នុងនាម​ជា​សមាជិក​អចិន្ត្រៃយ៍​នៃ​ក្រុមប្រឹក្សាសន្តិសុខ​អង្គការសហប្រជាជាតិ ប្រទេសចិន​តែងតែ​ប្រកាន់ខ្ជាប់​នូវ​គោលបំណង និង​គោលការណ៍​នៃ​ធម្មនុញ្ញ​អង្គការសហប្រជាជាតិ ហើយ​ជា​កម្លាំង​វិជ្ជមាន​មួយ​ដែល​អាច​ពឹងផ្អែក​បាន។ នៅក្នុង​គ្រា​ដ៏​រសើប និង​ស្ថានភាព​ស្មុគស្មាញនាពេល​បច្ចុប្បន្ននេះ ប្រទេសចិន​ត្រូវបាន​គេ​រំពឹងថា​នឹង​ដើរតួនាទី​យ៉ាងសំខាន់។ ភាគីអូម៉ង់​នឹង​ខិតខំ​អស់ពី​សមត្ថភាព​ដើម្បី​ការពារ​សន្តិសុខ​របស់​ពលរដ្ឋ និង​ស្ថាប័ន​ចិន​នៅក្នុងប្រទេសអូម៉ង់។

លោក វ៉ាង យី បាន​និយាយ​ថា នៅក្នុងបរិបទនៃវឌ្ឍនភាពដែលសម្រេចបាននៅក្នុងកិច្ចចរចារវាងអ៊ីរ៉ង់ និងសហរដ្ឋអាមេរិកនោះសហរដ្ឋអាមេរិក និងអ៊ីស្រាអែលបានញុះញង់សង្គ្រាមប្រឆាំងនឹងអ៊ីរ៉ង់ដោយចេតនា ដែលផ្ទុយយ៉ាងច្បាស់ពីគោលបំណង និងគោលការណ៍នៃធម្មនុញ្ញអង្គការសហប្រជាជាតិ។ ប្រទេសចិនជឿជាក់ថា ការបញ្ឈប់ប្រតិបត្តិការយោធាជាបន្ទាន់ គឺជារឿងចាំបាច់ដើម្បីការពារការរីករាលដាលបន្ថែមទៀតនៃការប្រយុទ្ធ និងដើម្បីការពារស្ថានការណ៍ពីការធ្លាក់ចូលទៅក្នុងស្ថានភាពដែលមិនអាចត្រឡប់វិញបាន។ ប្រទេសចិនជំរុញឱ្យគ្រប់ភាគីទាំងអស់ខិតខំប្រឹងប្រែងរួមគ្នាដើម្បីសម្រេចគោលដៅនេះ និងគាំទ្រប្រទេសអូម៉ង់ក្នុងការបន្តកិច្ចខិតខំប្រឹងប្រែងស្វែងរកសន្តិភាពដោយមិនផ្លាស់ប្តូរចេតនាដើមរបស់ខ្លួន។ ប្រទេសចិនក៏មានឆន្ទៈក្នុងការដើរតួនាទីស្ថាបនាផងដែរ រួមទាំងការធ្វើជាម្ចាស់ផ្ទះនៃវេទិកាក្រុមប្រឹក្សាសន្តិសុខអង្គការសហប្រជាជាតិ ស្តីពីការប្រយុទ្ធដើម្បីសន្តិភាព និងការបញ្ឈប់សង្គ្រាម។

លោក វ៉ាង យី បានបន្ថែមថា ប្រទេសចិនឱ្យតម្លៃចំពោះការអំពាវនាវស្របច្បាប់របស់រដ្ឋឈូងសមុទ្រ និងគាំទ្រពួកគេក្នុងការរក្សាអធិបតេយ្យភាពនិងសន្តិសុខជាតិរបស់ពួកគេ។ ការរីករាលដាលនៃសង្គ្រាមមិនបានបម្រើផលប្រយោជន៍ជាមូលដ្ឋាន និងយូរអង្វែងរបស់រដ្ឋឈូងសមុទ្រទេ។ ប្រទេសចិនរំពឹងថា រដ្ឋឈូងសមុទ្រនឹងបង្កើនឯករាជ្យភាពរបស់ពួកគេ ប្រឆាំងនឹងការជ្រៀតជ្រែកពីខាងក្រៅ អភិវឌ្ឍភាពជាអ្នកជិតខាងល្អ ព្រមទាំងពង្រឹងសាមគ្គីភាព និងការសម្របសម្រួល ដើម្បីអាចកាន់អនាគតរបស់ពួកគេយ៉ាងរឹងមាំនៅក្នុងដៃរបស់ពួកគេផ្ទាល់៕

ដោយ៖ យា ចិន្ដាខន្ដី (រូបភាព៖ ក្រសួងការបរទេសចិន)