AKP ភ្នំពេញ ថ្ងៃទី១៤ ខែមករា ឆ្នាំ២០២៦ -- លោក ក្រាស៊ីមៀ វ៉ាល់ឆេវ (Krasimir Valchev) រដ្ឋមន្ត្រីក្រសួងអប់រំ និងវិទ្យាសាស្ត្រប៊ុលហ្គារីដែលជិតផុតអាណត្តិ បាននិយាយកាលពីថ្ងៃអង្គារថា គ្រូបង្រៀនទាំងអស់នៅប៊ុលហ្គារីកំពុងទទួលការបណ្តុះបណ្តាលដើម្បីបង្រៀនក្នុងបរិយាកាសSTEM។ លោកបានចូលរួមក្នុងពិធីបើកមជ្ឈមណ្ឌល STEM នៅក្នុងសាលារៀនមួយក្នុងទីក្រុង។

លោកបានចង្អុលបង្ហាញថា បរិយាកាស STEM ជាចម្បង គឺរូបវន្តជាមួយនឹងឧបករណ៍ទំនើបៗ មធ្យោបាយបច្ចេកទេស និងថ្នាក់រៀនទំនើបៗ។លោក វ៉ាល់ឆេវ បានកត់សម្គាល់ថា «ប៉ុន្តែការអប់រំ STEM ក៏បង្កប់ន័យពីវិធីសាស្រ្តបង្រៀនដែលបានផ្លាស់ប្តូរ ដែលសិស្សានុសិស្សមានភាពសកម្មជាងមុន រៀនតាមរយៈការសាកល្បង និងការពិសោធន៍» ដោយលោកបានបន្ថែមថា វិធីសាស្រ្តបង្រៀនបែបប្រពៃណីកំពុងតែមិនសមស្របកាន់តែខ្លាំងឡើង។ លោកបានសង្កត់ធ្ងន់ថា «យើងកំពុងស្ថិតក្នុងការប្រកួតប្រជែងដ៏លំបាកមួយសម្រាប់ការចាប់អារម្មណ៍របស់សិស្ស ហើយមជ្ឈមណ្ឌលSTEM បង្កើនការលើកទឹកចិត្តក្នុងការរៀន»។

រដ្ឋមន្ត្រីដែលជិតផុតអាណត្តិរូបនេះបានចង្អុលបង្ហាញថា សិស្សប៊ុលហ្គារីមានបញ្ហាជាមួយគណិតវិទ្យា និងវិទ្យាសាស្ត្រធម្មជាតិ ដែលបង្ហាញនៅក្នុងលទ្ធផល PISA ទាបរបស់ពួកគេ។ លោកបានកត់សម្គាល់ថា«មជ្ឈមណ្ឌល STEM មិនមែនជាលក្ខខណ្ឌតែមួយគត់សម្រាប់ការកែលម្អលទ្ធផលនោះទេ ការផ្លាស់ប្តូរគឺត្រូវការនៅក្នុងកម្មវិធីសិក្សា និងការវាយតម្លៃផងដែរ» ដោយលោកបានបន្ថែមថា ក្រសួងបានដកថយមួយជំហានពីការប្រឡងរួមបញ្ចូលគ្នាបន្ទាប់ពីថ្នាក់ទីប្រាំពីរ ប៉ុន្តែការប្រឡងដែលមានធាតុផ្សំនៃវិទ្យាសាស្ត្រធម្មជាតិបន្ទាប់ពីថ្នាក់ទីដប់នឹងនៅតែមានជាធម្មតា។

លោក វ៉ាល់ឆេវ បានសង្កត់ធ្ងន់ថា «រឿងសំខាន់បំផុត គឺសិស្សានុសិស្សត្រូវចេះភាសាប៊ុលហ្គារី។ យើងមានសិស្សមួយចំនួនដែលមានជំនាញមិនគ្រប់គ្រាន់នៅពេលចាប់ផ្តើមថ្នាក់ទីមួយ ប៉ុន្តែបន្ទាប់មកពួកគេមានភាពប្រសើរឡើង។ នោះហើយជាមូលហេតុដែលយើងបានស្នើឡើងនូវអ្វីដែលហៅថាការរួមបញ្ចូលភាសា ដែលក៏ទទួលបានការឯកភាពគ្នាក្នុងចំណោមក្រុមសភាផងដែរ»។ លោកក៏បានចង្អុលបង្ហាញផងដែរថា ភាសាបរទេសគឺជាមុខវិជ្ជាដែលត្រូវបានសិក្សាច្រើនបំផុតនៅពេលនេះ ដោយសិស្សានុសិស្សមានការលើកទឹកចិត្តក្នុងការសិក្សាភាសាទាំងនោះ ហើយធ្វើបានល្អមិនដូចគណិតវិទ្យា និងវិទ្យាសាស្ត្រធម្មជាតិនោះទេ៕

ដោយ៖ យា ចិន្ដាខន្ដី (ប្រភព៖ BTA)