AKP ភ្នំពេញ ថ្ងៃទី១៤ ខែមករា ឆ្នាំ២០២៦ -- រដ្ឋមន្ត្រីការបរទេសចិន លោកវ៉ាង យី (Wang Yi) កាលពីថ្ងៃចន្ទ បានឈប់សម្រាកនៅប្រទេសស្រីលង្កាក្នុងដំណើរត្រឡប់មកពីទស្សនកិច្ចទៅកាន់ទ្វីបអាហ្វ្រិក ហើយបានជួបជាមួយរដ្ឋមន្ត្រីការបរទេសស្រីលង្កា លោក វីជីថា ហេរ៉ាត់ (Vijitha Herath) ។

លោក វ៉ាង ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន បាននិយាយថា ប្រទេសចិនបានជួយប្រទេសស្រីលង្កាក្នុងឱកាសដំបូងបំផុត ដើម្បីទប់ទល់នឹងព្យុះស៊ីក្លូនដ៏សាហាវ ហើយលោកជឿជាក់ថា ប្រជាជនស្រីលង្កានឹងយកឈ្នះលើគ្រោះមហន្តរាយនេះ និងកសាងផ្ទះសម្បែងរបស់ពួកគេឡើងវិញឱ្យបានឆាប់តាមដែលអាចធ្វើទៅបាន។

លោក វ៉ាង បាននិយាយថា ប្រទេសចិនមានឆន្ទៈក្នុងការបង្កើនការផ្លាស់ប្តូរបទពិសោធន៍អភិបាលកិច្ចជាមួយប្រទេសស្រីលង្កា ពង្រីកកិច្ចសហប្រតិបត្តិការជាក់ស្តែងក្នុងវិស័យផ្សេងៗ សម្រួលដល់ការផ្លាស់ប្តូរប្រជាជន និងពង្រឹងភាពជាដៃគូសហប្រតិបត្តិការយុទ្ធសាស្ត្របន្ថែមទៀតដោយផ្អែកលើជំនួយទៅវិញទៅមកដោយស្មោះត្រង់ និងមិត្តភាពដ៏ល្អរវាងប្រទេសទាំងពីរ និងរួមគ្នាកសាងសហគមន៍ចិន-ស្រីលង្កា ដែលមានអនាគតរួមគ្នា។

លោក វ៉ាង បាននិយាយថា នៅចំពោះមុខស្ថានភាពអន្តរជាតិកាន់តែស្មុគស្មាញ និងងាយនឹងប្រែប្រួល ប្រទេសចិននឹងការពារយ៉ាងរឹងមាំនូវសិទ្ធិនិងផលប្រយោជន៍ស្របច្បាប់របស់ប្រទេសកំពុងអភិវឌ្ឍន៍ ជាពិសេសប្រទេសខ្នាតតូច និងមធ្យម គាំទ្រគោលបំណង និងគោលការណ៍នៃធម្មនុញ្ញអង្គការសហប្រជាជាតិ និងច្បាប់អន្តរជាតិ និងធ្វើការជាមួយប្រទេសដែលមានគំនិតដូចគ្នាដើម្បីប្រឆាំងនឹងការលេចចេញជាថ្មីនៃ «ច្បាប់ព្រៃ» ទប់ទល់នឹងនយោបាយអំណាច និងការធ្វើបាបគ្រប់ទម្រង់ ការពារពហុភាគីនិយមនិងយុត្តិធម៌អន្តរជាតិ។

លោក វ៉ាង បានកត់សម្គាល់ថា ប្រទេសចិនកោតសរសើរចំពោះការប្រកាន់ខ្ជាប់យូរអង្វែងរបស់ប្រទេសស្រីលង្កាចំពោះគោលការណ៍ចិនតែមួយហើយមានឆន្ទៈបន្តគាំទ្រប្រទេសស្រីលង្កាក្នុងការបន្តមាគ៌ាអភិវឌ្ឍន៍ដែលសមស្របទៅនឹងលក្ខខណ្ឌជាតិរបស់ខ្លួន។ លោកបានបន្ថែមថា ភាគីទាំងពីរអាចពង្រឹងកិច្ចសហប្រតិបត្តិការក្នុងតំបន់ដែលផ្តោតលើអាស៊ីខាងត្បូង និងរួមគ្នាលើកកម្ពស់ប្រព័ន្ធគ្រប់គ្រងសកលលោកដែលយុត្តិធម៌ និងសមធម៌ជាងមុន។

លោក ហេរ៉ាត់ បានថ្លែងអំណរគុណដល់ប្រទេសចិនចំពោះជំនួយដ៏មានតម្លៃរបស់ខ្លួនបន្ទាប់ពីគ្រោះមហន្តរាយព្យុះស៊ីក្លូន។ លោកបាននិយាយថា ប្រទេសស្រីលង្កាចាត់ទុកប្រទេសចិនជាដៃគូយុទ្ធសាស្ត្រដ៏គួរឱ្យទុកចិត្តបំផុតមួយរបស់ខ្លួន ហើយមានឆន្ទៈក្នុងការរក្សាការផ្លាស់ប្តូរកម្រិតកំពូលយ៉ាងជិតស្និទ្ធជាមួយប្រទេសចិន ពង្រឹងកិច្ចសហប្រតិបត្តិការក្នុងហេដ្ឋារចនាសម្ព័ន្ធកិច្ចការសមុទ្រ ទេសចរណ៍ និងការផ្លាស់ប្តូរវប្បធម៌ និងបង្កើនភាពជាដៃគូសហប្រតិបត្តិការយុទ្ធសាស្ត្រស្រីលង្កា-ចិន ជាបន្តបន្ទាប់។

លោកបានបញ្ជាក់ជាថ្មីអំពីការប្រកាន់ខ្ជាប់របស់ប្រទេសស្រីលង្កាចំពោះគោលការណ៍ចិនតែមួយ ដោយលោកបានសម្តែងការគាំទ្រយ៉ាងមុតមាំចំពោះកិច្ចខិតខំប្រឹងប្រែងរបស់ប្រទេសចិនក្នុងការការពារអធិបតេយ្យភាព និងបូរណភាពទឹកដីរបស់ខ្លួន ហើយលោកបាននិយាយថា ប្រទេសស្រីលង្កាមានឆន្ទៈក្នុងការពង្រឹងការទំនាក់ទំនង និងការសម្របសម្រួលជាមួយប្រទេសចិនក្នុងកិច្ចការពហុភាគីដើម្បីរួមគ្នាការពារសិទ្ធិ និងផលប្រយោជន៍ស្របច្បាប់របស់ប្រទេសកំពុងអភិវឌ្ឍន៍៕

ដោយ៖ មូល មិនា (ប្រភព៖ ភីបផលដេលី)