AKP ភ្នំពេញ ថ្ងៃទី២៦ ខែធ្នូ ឆ្នាំ២០២៥ -- រដ្ឋាភិបាលឥណ្ឌូណេស៊ី តាមរយៈក្រុមការងារត្រួតពិនិត្យតំបន់ព្រៃឈើ និងរ៉ែ (Satgas PKH) បានរកឃើញសញ្ញាណនៃអង្គភាពសាជីវកម្ម និងបុគ្គលមួយចំនួនដែលរួមចំណែកដល់ការកើតឡើងនៃគ្រោះទឹកជំនន់ និងការរអិលបាក់ដីនៅក្នុងខេត្តអាឆេ កោះស៊ូម៉ាត្រាខាងជើង និងកោះស៊ូម៉ាត្រាខាងលិច។ នេះបើយោងតាមលោក ST Burhanuddin អគ្គរដ្ឋអាជ្ញា បាននិយាយកាលពីពេលថ្មីៗនេះ។

យោងតាមការតាមដាននៃការរកឃើញនេះ ក្រុមការងារបានស្នើសុំព័ត៌មានពីក្រុមហ៊ុនចំនួន២៧ ដែលស្ថិតនៅក្នុងខេត្តទាំងបីខាងលើ។

យោងតាមលោក Burhanuddin បានឱ្យដឹងថា លទ្ធផលនៃការសិក្សារបស់ក្រុមការងារ PKH និងការវិភាគរបស់មជ្ឈមណ្ឌលស្រាវជ្រាវអន្តរវិញ្ញាសា ITB ក៏បានរកឃើញនូវទំនាក់ទំនងយ៉ាងខ្លាំងមួយថា គ្រោះទឹកជំនន់ភ្លាមៗនៅកោះស៊ូម៉ាត្រាមិនត្រឹមតែជាបាតុភូតធម្មជាតិប៉ុណ្ណោះទេ ប៉ុន្តែវាក៏បណ្តាលមកពីការផ្លាស់ប្តូរការប្រើប្រាស់ដីធ្លីយ៉ាងច្រើននៅផ្នែកខាងលើនៃអាងទន្លេផងដែរ។ បន្ទាប់មក រឿងនេះកាន់តែធ្ងន់ធ្ងរឡើងដោយសារភ្លៀងធ្លាក់ខ្លាំង។

រហូតមកដល់បច្ចុប្បន្ន ក្រុមការងារ Satgas PKH បានស្តារដីព្រៃឈើឡើងវិញប្រហែល ៤លានហិកតា និងប្រមូលបានប្រាក់ពិន័យរដ្ឋបាលចំនួន២,៣ទ្រីលានរូពី (១៣៧,៤៩លានដុល្លារអាម៉េរិក) ពីក្រុមហ៊ុនប្រេងដូងចំនួន២០ និងក្រុមហ៊ុនរ៉ែមួយ។ លើសពីនេះទៀត តាមរយៈការចោទប្រកាន់អំពីករណីអំពើពុករលួយទាក់ទងនឹងការនាំចេញប្រេងដូងឆៅ និងការនាំចូលស្ករ រដ្ឋទទួលបានមកវិញនូវថវិកាចំនួន ៤,២ទ្រីលានរូពីបន្ថែមទៀត៕

ដោយ៖ យា ចិន្ដាខន្ដី (ប្រភព៖ VNA)