AKP ភ្នំពេញ ថ្ងៃទី៣១ ខែតុលា ឆ្នាំ២០២៥ -- ប្រធានាធិបតីចិន លោក ស៊ី ជីនពីង (Xi Jinping) បានមានប្រសាសន៍កាលពីថ្ងៃព្រហស្បតិ៍ថា លោកបានត្រៀមខ្លួនរួចជាស្រេចដើម្បីបន្តធ្វើការជាមួយប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) ដើម្បីកសាងមូលដ្ឋានគ្រឹះដ៏រឹងមាំសម្រាប់ទំនាក់ទំនងទ្វេភាគី និងបង្កើតបរិយាកាសល្អសម្រាប់ការអភិវឌ្ឍប្រទេសទាំងពីរ។

នៅក្នុងជំនួបជាមួយលោក ត្រាំ លោក ស៊ី បានមានប្រសាសន៍ថា ក្រោមការដឹកនាំរួមគ្នារបស់ពួកគេ ទំនាក់ទំនងចិន-សហរដ្ឋអាមេរិក នៅតែមានស្ថិរភាព។ លោកបានមានប្រសាសន៍ថា «ប្រទេសចិន និងសហរដ្ឋអាមេរិកគួរតែជាដៃគូ និងជាមិត្តភក្តិ។ នោះហើយជាអ្វីដែលប្រវត្តិសាស្ត្របានបង្រៀនយើង និងអ្វីដែលការពិតត្រូវការ»។

លោក ស៊ី បានមានប្រសាសន៍ថា «អ្នក និងខ្ញុំជាអ្នកដឹកនាំទំនាក់ទំនងចិន-សហរដ្ឋអាមេរិក»។ «នៅចំពោះមុខខ្យល់ ទឹករលក និងបញ្ហាប្រឈម យើងគួរតែរក្សាផ្លូវត្រូវ និងធានាបាននូវការបន្តទៅមុខយ៉ាងរឹងមាំនៃទំនាក់ទំនងចិន-សហរដ្ឋអាមេរិក»។

លោក ស៊ី បានមានប្រសាសន៍ថា មានសន្ទុះល្អក្នុងការអភិវឌ្ឍសេដ្ឋកិច្ចរបស់ប្រទេសចិន ដោយលោកបានបន្ថែមថា ក្នុងរយៈពេលបីត្រីមាសដំបូងនៃឆ្នាំនេះ សេដ្ឋកិច្ចរបស់ប្រទេសចិនបានកើនឡើង ៥,២% ហើយពាណិជ្ជកម្មនាំចូល និងនាំចេញទំនិញជាមួយពិភពលោកបានពង្រីក ៤%។

លោក ស៊ី បានកត់សម្គាល់ថា នេះមិនមែនជាសមិទ្ធផលងាយស្រួលនោះទេ ដោយសារតែការលំបាកក្នុងស្រុក និងក្រៅស្រុក ដោយលោកបានបន្ថែមថា សេដ្ឋកិច្ចចិនគឺដូចជាមហាសមុទ្រដ៏ធំទូលាយ ធំ ធន់ និងមានសក្តានុពល។

លោក ស៊ី បានបន្ថែមថា «យើងមានទំនុកចិត្ត និងសមត្ថភាពក្នុងស្វែងរកហានិភ័យ និងបញ្ហាប្រឈមគ្រប់ប្រភេទ»៕

ដោយ៖ មូល មិនា (ប្រភព៖ ភីបផលដេលី)