AKP ភ្នំពេញ ថ្ងៃទី៣០ ខែតុលា ឆ្នាំ២០២៥ -- សេវាសារព័ត៌មានអ៊ូសបេគីស្ថានកាលពីថ្ងៃអង្គារ បាននិយាយថា ប្រធានាធិបតីអ៊ូសបេគីស្ថាន លោកសាវកាត់ មៀហ្សីយ៉ូយ៉េវ (Shavkat Mirziyoyev) និងប្រធានាធិបតីស៊ែប៊ីលោក អាឡិចសាន់ដារ វូស៊ីក (Aleksandar Vucic) បានពិភាក្សាអំពីទស្សនវិស័យសម្រាប់ការពង្រឹងកិច្ចសហប្រតិបត្តិការជាក់ស្តែងបន្ថែមទៀតរវាងប្រទេសអ៊ូសបេគីស្ថាន និងស៊ែប៊ី។

សេវាសារព័ត៌មានបាននិយាយនៅក្នុងសេចក្តីថ្លែងការណ៍មួយថាដោយមានការចូលរួមពីគណៈប្រតិភូផ្លូវការ ការចរចារវាងមេដឹកនាំទាំងពីរបានធ្វើឡើងនៅឯវិមាន Kuksaroy ក្នុងទីក្រុងតាសកេន។

លោក មៀហ្សីយ៉ូយ៉េវ បានសង្កត់ធ្ងន់ថា កិច្ចប្រជុំកំពូលលើកដំបូងនៃកិច្ចសហប្រតិបត្តិការរវាងប្រទេសទាំងពីរនឹងក្លាយជាប្រវត្តិសាស្ត្រ និងនាំទំនាក់ទំនងអ៊ូសបេគីស្ថាន-ស៊ែប៊ី ទៅកាន់    «កម្រិតថ្មីប្រកបដោយគុណភាព»។

លោក មៀហ្សីយ៉ូយ៉េវ បានមានប្រសាសន៍ថា «ដំណើរទស្សនកិច្ចផ្លូវការរបស់អ្នកក្នុងខួបលើកទី៣០ នៃការបង្កើតទំនាក់ទំនងការទូតគឺជាព្រឹត្តិការណ៍ប្រវត្តិសាស្ត្រ។ ប្រទេសអ៊ូសបេគីស្ថានមានការអាណិតអាសូរយ៉ាងខ្លាំងចំពោះប្រទេសស៊ែប៊ី។ ប្រជាជនរបស់យើងត្រូវបានចងភ្ជាប់ដោយចំណងមិត្តភាពដ៏រឹងមាំ និងផ្នត់គំនិតស្រដៀងគ្នា»។

សេចក្តីថ្លែងការណ៍បាននិយាយថា ការយកចិត្តទុកដាក់ជាអាទិភាពកំពុងត្រូវបានអនុវត្តន៍ចំពោះការបង្កើនចំណូលពាណិជ្ជកម្ម និងការរៀបចំកម្មវិធីសហប្រតិបត្តិការដ៏ទូលំទូលាយនៅក្នុងវិស័យសំខាន់ៗដូចជា វិស្វកម្មមេកានិច ឱសថ ឧស្សាហកម្មគីមី បច្ចេកវិទ្យាព័ត៌មាន និងឌីជីថលូបនីយកម្មស្មុគស្មាញកសិ-ឧស្សាហកម្ម ទេសចរណ៍ និងផ្សេងៗទៀត៕

ដោយ៖ មូល មិនា (ប្រភព៖ ភីបផលដេលី)