AKP ភ្នំពេញ ថ្ងៃទី២៧ ខែតុលា ឆ្នាំ២០២៥ -- នាយករដ្ឋមន្ត្រីចិន លោក លីឈាង (Li Qiang) បានមានប្រសាសន៍កាលពីថ្ងៃសៅរ៍ថា ប្រទេសចិនមានឆន្ទៈក្នុងការធ្វើការជាមួយប្រទេសសិង្ហបុរី ដើម្បីអនុវត្តន៍គំនិតផ្តួចផ្តើមសកលសំខាន់ៗ ដែលស្នើឡើងដោយប្រធានាធិបតីចិន លោក ស៊ី ជីនពីង(Xi Jinping) ដើម្បីលើកកម្ពស់ការអភិវឌ្ឍសណ្តាប់ធ្នាប់អន្តរជាតិក្នុងទិសដៅយុត្តិធម៌ និងសមធម៌ជាងមុន។

លោក លី បានលើកឡើងក្នុងអំឡុងពេលពិភាក្សាជាមួយនាយករដ្ឋមន្ត្រីសិង្ហបុរី លោក ឡរ៉េន វង់ (Lawrence Wong) ថា ខណៈពេលដែលប្រព័ន្ធពាណិជ្ជកម្មពហុភាគីកំពុងស្ថិតក្នុងស្ថានភាពតានតឹងខ្លាំងប្រទេសចិនបានត្រៀមខ្លួនរួចជាស្រេចក្នុងការសហការជាមួយប្រទេសសិង្ហបុរី ដើម្បីពង្រឹងការទំនាក់ទំនង និងកិច្ចសហការនៅក្នុងអង្គការសហប្រជាជាតិ និងយន្តការផ្សេងទៀត ប្រឆាំងនឹងឯកតោភាគីនិយមនិងការការពារនិយម លើកកម្ពស់ពាណិជ្ជកម្មសេរី និងសកលភាវូបនីយកម្មសេដ្ឋកិច្ច។

លោក លី បានអំពាវនាវឱ្យភាគីទាំងពីរពង្រឹងទំនុកចិត្តគ្នាទៅវិញទៅមកខាងនយោបាយ ពង្រីកកិច្ចសហប្រតិបត្តិការជាក់ស្តែង និងបន្តពង្រឹងទំនាក់ទំនងទ្វេភាគី ដើម្បីបម្រើដល់ការជំរុញទំនើបកម្មរបស់ពួកគេឱ្យកាន់តែប្រសើរឡើង និងធ្វើការរួមចំណែកកាន់តែច្រើនដល់សន្តិភាពស្ថិរភាព និងការអភិវឌ្ឍក្នុងតំបន់។

លោកបានកត់សម្គាល់ថា ប្រទេសចិនមានឆន្ទៈក្នុងការពង្រឹងការសម្របសម្រួលអភិវឌ្ឍន៍ជាមួយប្រទេសសិង្ហបុរី ប្រើប្រាស់យន្តការសហប្រតិបត្តិការទ្វេភាគីយ៉ាងពេញលេញ រក្សាសន្ទុះរឹងមាំនៃកំណើនពាណិជ្ជកម្មទ្វេភាគី និងការវិនិយោគ បង្កើន និងពង្រីកគម្រោងសហប្រតិបត្តិការសំខាន់ៗដូចជា ឧទ្យានឧស្សាហកម្មស៊ូចូវ និងតំបន់អេកូធានជីន ពង្រឹងកិច្ចសហប្រតិបត្តិការក្នុងវិស័យដូចជា សេដ្ឋកិច្ចឌីជីថល សេដ្ឋកិច្ចបៃតង បញ្ញាសិប្បនិម្មិត ថាមពលថ្មី និងជីវវេជ្ជសាស្ត្រ និងស្វែងរកកិច្ចសហប្រតិបត្តិការភាគីទីបីយ៉ាងសកម្ម។

លោក វង់ បាននិយាយថា រដ្ឋាភិបាលសិង្ហបុរីប្រកាន់ខ្ជាប់នូវគោលការណ៍ចិនតែមួយ និងប្រឆាំងយ៉ាងម៉ឺងម៉ាត់ចំពោះ «ឯករាជ្យភាពតៃវ៉ាន់»។

លោក វង់ បាននិយាយថា ប្រទេសសិង្ហបុរីត្រៀមខ្លួនជាស្រេចដើម្បីរក្សាការផ្លាស់ប្តូរកម្រិតកំពូលយ៉ាងជិតស្និទ្ធជាមួយប្រទេសចិន បង្កើនការផ្លាស់ប្តូរបទពិសោធន៍ក្នុងការគ្រប់គ្រង លើកកម្ពស់គម្រោងសំខាន់ៗដូចជាឧទ្យានឧស្សាហកម្មស៊ូចូវ និងកិច្ចសហប្រតិបត្តិការលើការតភ្ជាប់ លើកកម្ពស់សម្រាប់កិច្ចសហប្រតិបត្តិការក្នុងវិស័យនានា រួមទាំងសេដ្ឋកិច្ចបៃតងសេដ្ឋកិច្ចឌីជីថល និងបញ្ញាសិប្បនិម្មិត អនុវត្តន៍កិច្ចសហប្រតិបត្តិការទ្វេភាគីយ៉ាងសកម្ម លើកកម្ពស់ការផ្លាស់ប្តូរប្រជាជន និងវប្បធម៌ និងបង្កើនអត្ថន័យនៃភាពជាដៃគូដែលមានគុណភាពខ្ពស់គ្រប់ជ្រុងជ្រោយសម្រាប់អនាគតរវាងប្រទេសសិង្ហបុរី និងប្រទេសចិនជាបន្តបន្ទាប់៕

ដោយ៖ មូល មិនា (ប្រភព៖ ភីបផលដេលី)