AKP ភ្នំពេញ ថ្ងៃទី១៦ ខែតុលា ឆ្នាំ២០២៥ -- ប្រភពប៉ាឡេស្ទីនបាននិយាយថា ជនជាតិប៉ាឡេស្ទីន ២នាក់ត្រូវបានសម្លាប់ក្នុងការបាញ់ផ្លោងរបស់អ៊ីស្រាអែលនៅភាគខាងកើតទីក្រុងហ្គាហ្សា ខណៈដែលមនុស្ស២៤នាក់ផ្សេងទៀតត្រូវបានចាប់ខ្លួនដោយកងកម្លាំងអ៊ីស្រាអែលនៅតំបន់ហ្គាហ្សាស្ទ្រីបភាគខាងត្បូងកាលពីថ្ងៃពុធ។

ប្រភពវេជ្ជសាស្ត្រនៅមន្ទីរពេទ្យបាទីស្ទក្នុងទីក្រុងហ្គាហ្សាបានប្រាប់សារព័ត៌មាន Xinhua ថា អ្នកទាំងពីរបានស្លាប់នៅពេលដែលការបាញ់ផ្លោងរបស់អ៊ីស្រាអែលសំដៅលើការប្រមូលផ្តុំជនស៊ីវិលនៅក្នុងសង្កាត់ស៊ូចៃយ៉ាភាគខាងកើតទីក្រុង។

សាក្សីដែលបានឃើញផ្ទាល់ភ្នែកបាននិយាយថា យន្តហោះអ៊ីស្រាអែលមួយគ្រឿងបានបាញ់កាំជ្រួចយ៉ាងហោចណាស់មួយគ្រាប់ទៅកាន់ក្រុមអ្នកស្រុកដែលកំពុងព្យាយាមត្រឡប់ទៅសង្កាត់របស់ពួកគេវិញដើម្បីត្រួតពិនិត្យផ្ទះរបស់ពួកគេ។

ទន្ទឹមនឹងនេះ ប្រភពសន្តិសុខប៉ាឡេស្ទីនបាននិយាយថា កងកម្លាំងអ៊ីស្រាអែលបានចាប់ខ្លួនមនុស្ស ៩នាក់ ខណៈពេលដែលពួកគេកំពុងត្រួតពិនិត្យផ្ទះរបស់ពួកគេនៅតំបន់ Al-Fakhari ភាគខាងកើតនៃទីក្រុងខាន់យូនីស និង ១៥នាក់ទៀតនៅក្នុងទីប្រជុំជន Al-Nasr ភាគខាងកើតនៃទីក្រុងរ៉ាហ្វាហ៍។

កងទ័ព​អ៊ីស្រាអែល​មិន​បាន​ចេញ​សេចក្តី​អធិប្បាយ​ភ្លាមៗ​អំពី​ឧប្បត្តិហេតុ​ដែល​បាន​កើត​ឡើង​ទេ​ បើ​ទោះ​ជា​មាន​កិច្ច​ព្រម​ព្រៀង​ឈប់​បាញ់​ដែល​បាន​ចូល​ជា​ធរមាន​កាល​ពី​ថ្ងៃ​សុក្រ​ក៏​ដោយ។

យោងតាមតួលេខដែលចេញផ្សាយដោយអាជ្ញាធរសុខាភិបាលដែលមានមូលដ្ឋាននៅតំបន់ហ្គាហ្សាកាលពីថ្ងៃពុធ បានឱ្យដឹងថា ការវាយប្រហាររបស់អ៊ីស្រាអែលបានសម្លាប់ជនជាតិប៉ាឡេស្ទីនចំនួន ៦៧.៩៣៨នាក់ និងរបួស ១៧០.១៦៩នាក់ទៀត ចាប់តាំងពីសង្រ្គាមនៅតំបន់ហ្គាហ្សាបានផ្ទុះឡើងកាលពីថ្ងៃទី៧ ខែតុលា ឆ្នាំ២០២៣៕

ដោយ៖ មូល មិនា (ប្រភព៖ ស៊ីនហួ)