AKP ភ្នំពេញ ថ្ងៃទី១៥ ខែតុលា ឆ្នាំ២០២៥ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) និងមេដឹកនាំផ្សេងទៀតដែលសម្របសម្រួលចំពោះដំណោះស្រាយជម្លោះមជ្ឈិមបូព៌ា បានចុះហត្ថលេខាលើកិច្ចព្រមព្រៀងសន្តិភាពតំបន់ហ្គាហ្សាកាលពីដើមសប្តាហ៍នេះ។

ក្រៅពីលោក ត្រាំ ឯកសារនោះត្រូវបានចុះហត្ថលេខាដោយប្រធានាធិបតីអេហ្ស៊ីប លោក អាប់ឌែល ហ្វាតតាហ៍ ស៊ីស៊ី (Abdel Fattah Sisi) ប្រធានាធិបតីតួកគី លោក រេសេប តាយយីប អឺដូហ្គែន (Recep Tayyip Erdogan) និងនាយករដ្ឋមន្ត្រីកាតា ព្រះអង្គម្ចាស់ ស្សៀក ម៉ូហាំម៉េដ ប៊ីន អាប់ឌុលរ៉ាម៉ាន់ អាល់-ថានី (Sheikh Mohammed bin Abdulrahman Al-Thani)។

លោក ត្រាំ ក៏បានប្រកាសផងដែរថា សង្គ្រាមលោកលើកទី៣ នឹងមិនចាប់ផ្តើមទេនៅមជ្ឈិមបូព៌ានៅពេលនេះ ខណៈដែលកិច្ចព្រមព្រៀងសន្តិភាពត្រូវបានសម្រេច ដែលនាំមកនូវការបញ្ចប់ជម្លោះនៅតំបន់ហ្គាហ្សាស្ទ្រីប។

លោក ត្រាំ បានប្រាប់អ្នកសារព័ត៌មានក្នុងអំឡុងពេលពិធីចុះហត្ថលេខាលើកិច្ចព្រមព្រៀងសន្តិភាពហ្គាហ្សា ថា «វាជាកិច្ចព្រមព្រៀងដ៏ធំបំផុត និងស្មុគស្មាញបំផុត ហើយវាអាចនាំឱ្យមានបញ្ហាយ៉ាងខ្លាំង ដូចជាសង្គ្រាមលោកលើកទីបីជាដើម»។

លោក ត្រាំ បាននិយាយបន្ថែមថា «ពួកគេតែងតែនិយាយអំពីសង្គ្រាមលោកលើកទីបីដែលនឹងចាប់ផ្តើមនៅមជ្ឈិមបូព៌ា ហើយវានឹងមិនកើតឡើងទេ។ យើងមិនចង់ឱ្យវាចាប់ផ្តើមនៅកន្លែងណានោះទេ ប៉ុន្តែវានឹងមិនកើតឡើងនោះទេ»៕

ដោយ៖ យា ចិន្តាខន្តី (ប្រភព៖ ស្ពុតនីក)