AKP ភ្នំពេញ ថ្ងៃទី២៥ ខែកញ្ញា ឆ្នាំ២០២៥ -- ដោយលាតសន្ធឹងក្នុងចម្ងាយ១.០៣៥គីឡូម៉ែត្រពីទីក្រុងគុនមីងក្នុងខេត្តយូណាននៅភាគនិរតីរបស់ប្រទេសចិនទៅកាន់ទីក្រុងវៀងចន្ទន៍ក្នុងប្រទេសឡាវ ផ្លូវដែកចិន-ឡាវបានក្លាយជា «ច្រករបៀងមាស» ក្នុងការតភ្ជាប់ប្រទេសចិន និងអាស៊ាន ដែលជំរុញដល់កំណើនសេដ្ឋកិច្ចក្នុងតំបន់តាមបណ្តោយផ្លូវរបស់វា។

ចាប់តាំងពីវាបើកដំណើរការកាលពីក្នុងខែធ្នូ ឆ្នាំ២០២១ មក ទំហំដឹកទំនិញបានបង្ហាញពីកំណើនពីរខ្ទង់សម្រាប់រយៈពេល ៣ឆ្នាំជាប់ៗគ្នាខណៈដែលលំហូរអ្នកដំណើរឆ្លងកាត់ព្រំដែនប្រចាំថ្ងៃបានកើនឡើងពីប្រហែល ៣០០ជើងរហូតដល់ ១.៣០០ជើង។ គិតត្រឹមខែសីហា ឆ្នាំ២០២៥ផ្លូវដែកនេះបានដឹកជញ្ជូនទំនិញជាង ៦៦,៥លានតោន ដែលរួមមានទាំងទំនិញឆ្លងកាត់ព្រំដែនជាង ៣.០០០ប្រភេទ។

យោងតាមលោក ចាង ដេហ័ន អ្នកដឹកជញ្ជូននៅលើផ្លូវដែកនោះដែលមមាញឹកខ្លាំងក្នុងរដូវកាលផ្លែ​ទុរេន បានឱ្យដឹងថា លោកមិនដែលរំពឹងថា ផ្លូវដែកនៃការដឹកជញ្ជូនទំនិញឆ្លងព្រំដែនចិន-ឡាវនៅក្នុងខេត្តយូណាននេះនឹងមានប្រជាប្រិយភាពខ្លាំងនោះទេ។ នៅក្នុងដំណើរការដឹកជញ្ជូនទៅកាន់ប្រទេសឡាវក្នុងឆ្នាំ២០២២ បានជំរុញឱ្យលោក​ ចាង ជួលទូរទឹកកកចំនួន១០០គ្រឿងដើម្បីដាក់ផ្លែទុរេនសម្រាប់ការដឹកជញ្ជូន ហើយវាមិនមានភាពងាយស្រួលទេនៅដើមដំបូង។ លោក ចាង បានផ្សព្វផ្សាយអំពីសេវាកម្មរបស់លោកនៅទីផ្សារលក់ដុំផ្លែឈើក្នុងទីក្រុងគុនមីងអស់រយៈពេលជាច្រើនថ្ងៃ ប៉ុន្តែលោកមិនបានទទួលការបញ្ជាទិញណាមួយទេ។

អ្នក​នាំ​ចូលផ្លែ​ទុរេន​ម្នាក់​បាន​ប្រាប់​លោក​ថា «វា​មិន​មែនមកពីថ្លៃ​ដឹក​ជញ្ជូន​នោះ​ទេ»។ ជាមួយនឹងកុងតឺន័រដឹកផ្លែទុរេនដែលមានតម្លៃប្រហែល១លានយន់ (១៤០.៧៧៣ដុល្លារអាម៉េរិក) អ្នកនាំចូលមិនហ៊ានប្រថុយទៅនឹងការខូចគុណភាពផ្លែទុរេនដោយសារការដឹកជញ្ជូនយូរនោះទេ។ ការគិតថ្លៃដឹកជញ្ជូនចំនួន ៤០.០០០យន់ គឺជារឿងតូចតាចទេបើធៀបទៅនឹងការបាត់បង់សក្តានុពលនៃការដឹកជញ្ជូនទាំងមូល ប្រសិនបើភាពស្រស់របស់ផ្លែទុរេនមិនអាចត្រូវបានធានា។

ដោយ​សារ​គ្មាន​អ្នក​នាំ​ចូល​ណា​ហ៊ាន​ប្រថុយ​នោះ លោក ចាង បាន​សម្រេច​ចិត្ត​ទិញផ្លែ​ទុរេន​ដោយ​ខ្លួន​ឯងដើម្បីដឹកជញ្ជូនដើម្បី​បង្ហាញ​ពី​សេវាកម្ម។

នៅពេលដែលការដឹកជញ្ជូនកំពុងដំណើរការ លោក ចាង បានត្រួតពិនិត្យទីតាំង និងសីតុណ្ហភាពនៃក្នុងកុងតឺន័ររៀងរាល់ពីរបីម៉ោងម្តង។បន្ទាប់ពីរយៈពេល ២៦ម៉ោងនៃការធ្វើដំណើរ ផ្លែទុរេនដែលបានដឹកជញ្ជូនតាមកុងតឺន័រទូរទឹកកកថ្មីនៅលើផ្លូវដែកចិន-ឡាវបានទៅដល់ទីក្រុងគុនមីងក្នុងលក្ខខ័ណ្ឌមួយល្អឥតខ្ចោះ ហើយនៅពេលនោះ ពាណិជ្ជករ​ដែល​មាន​ការ​ចាប់អារម្មណ៍​ម្នាក់​បាន​ចុះ​ហត្ថលេខា​លើ​កិច្ច​ព្រម​ព្រៀង​មួយ​នៅ​នឹងកន្លែង​ សម្រាប់ការដឹកជញ្ជូនផ្លែទុរេនចំនួន ៦កុងតឺន៍រ ​ដែល​ដឹក​ជញ្ជូន​ដោយ​ក្រុមហ៊ុនរបស់លោក ចាង។

មុនពេលមានផ្លូវរថភ្លើងនេះ ផ្លែទុរេនភាគច្រើនត្រូវបានដឹកជញ្ជូនតាមរថយន្តដឹកទំនិញ ដែលចំណាយពេលយូរ និងងាយរំខានដោយសារការរអិលបាក់ដី ការបិទផ្លូវ ឬការកកស្ទះក្នុងរដូវវស្សា។ សព្វថ្ងៃនេះ ជាមួយនឹងទូរទឹកកកដ៏ឆ្លាតវៃនៅលើផ្លូវដែកចិន-ឡាវ ដែលអនុញ្ញាតឱ្យមានការតាមដានGPS និងការត្រួតពិនិត្យសីតុណ្ហភាពពីចម្ងាយនោះ បានធ្វើឱ្យការធ្វើដំណើរកាន់តែលឿន ការចំណាយអាចប្រៀបធៀបបាន និងអត្រានៃការខូចគុណភាពទាបជាងពីមុនឆ្ងាយ។

ពាក្យនេះបានរីករាលដាលយ៉ាងឆាប់រហ័សនៅក្នុងរង្វង់ពាណិជ្ជកម្មផ្លែឈើរបស់ខេត្តយូណានថា «ផ្លូវដែកចិន-ឡាវ គឺជាផ្លូវដែកដែលមានសុវត្ថិភាពជាងមុនសម្រាប់ការដឹកជញ្ជូនផ្លែទុរេន» ដែលធ្វើឱ្យអាជីវកម្មមានការកើនឡើង។

នៅក្នុងឆ្នាំ២០២៣ ការដឹកជញ្ជូនទំនិញឆ្លងកាត់ព្រំដែននៅលើខ្សែផ្លូវដែកនេះបានឈានដល់ប្រមាណ ៤,២២លានតោន ដែលកើនឡើងជិត៩៥% ពីមួយឆ្នាំទៅមួយឆ្នាំ៕

ដោយ៖ យា ចិន្តាខន្តី (ប្រភព៖ BRNN)