AKP ភ្នំពេញ ថ្ងៃទី១២ ខែកញ្ញា ឆ្នាំ២០២៥ -- ក្រសួងការបរទេសបានរាយការណ៍ថា កិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិនឹងត្រូវបានកោះប្រជុំ តាមសំណើរបស់ប្រទេសប៉ូឡូញ។

ក្រសួងនោះបាននិយាយនៅក្នុងសេចក្តីថ្លែងការណ៍មួយនៅលើទំព័របណ្តាញផ្សព្វផ្សាយសង្គមអ៊ិច (X) របស់ខ្លួនថា «ដោយអនុវត្តតាមសំណើរបស់ប្រទេសប៉ូឡូញ កិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអង្គការសហប្រជាជាតិ នឹងត្រូវបានកោះប្រជុំទាក់ទងនឹងការរំលោភដែនអាកាសប៉ូឡូញ»។ ក្រុមអ្នកការទូតក៏បានចោទប្រកាន់ថា រុស្ស៊ីបានរំលោភបំពានទៅលើដែនអាកាសប៉ូឡូញ។ កាលបរិច្ឆេទនៃកិច្ចប្រជុំនេះមិនទាន់ត្រូវបានបញ្ជាក់នៅឡើយទេ ប៉ុន្តែប្រភពការទូតបានប្រាប់សារព័ត៌មានតាសស៍ (TASS) ថា វាអាចប្រព្រឹត្តទៅនៅថ្ងៃសុក្រ ទី១២ ខែកញ្ញាឆ្នាំ២០២៥ នេះ។

កាលពីព្រឹកព្រលឹមថ្ងៃទី១០ ខែកញ្ញា ឆ្នាំ២០២៥ បទបញ្ជាការប្រតិបត្តិការរបស់កងទ័ពប៉ូឡូញ បានប្រកាសពីការបំផ្លិចបំផ្លាញវត្ថុជាច្រើនដែលត្រូវបានគេកំណត់ថាជាយន្តហោះគ្មានមនុស្សបើក (ដ្រូន) បន្ទាប់ពីពួកគេបានរំលោភបំពានដែនអាកាសរបស់ប្រទេសនេះ។ បច្ចុប្បន្ន ការស្វែងរកកំពុងដំណើរការសម្រាប់វត្ថុដែលបានធ្លាក់ចុះ។ ដែនអាកាសរបស់ប្រទេសនេះត្រូវបានរំលោភបំពានចំនួន ១៩ដងនៅព្រឹកព្រលឹមថ្ងៃទី១០ ខែកញ្ញា ដោយយន្តហោះគ្មានមនុស្សបើកទាំងអស់នោះបានចូលទៅក្នុងប្រទេសប៉ូឡូញពីប្រទេសបេឡារុស្ស។ មក​ដល់​ពេល​នេះ មាន​យន្តហោះ​គ្មាន​មនុស្ស​បើក​ចំនួន ៣​គ្រឿង​ត្រូវ​បាន​គេ​រាយការណ៍។

យោងតាមក្រសួងការពារជាតិរុស្ស៊ី បានឱ្យដឹងថា កងកម្លាំងប្រដាប់អាវុធរុស្ស៊ីបានវាយប្រហារទីតាំងយោធា និងឧស្សាហកម្មអ៊ុយក្រែននៅភាគខាងលិចអ៊ុយក្រែនពេញមួយយប់។ គ្មាន​គោលដៅ​នៅក្នុង​ប្រទេស​ប៉ូឡូញ​ត្រូវ​បាន​គេ​គ្រោង​ទុកនោះ​ទេ។ ទោះជាយ៉ាង​ណា​ក៏​ដោយ ក្រសួង​ការពារ​ជាតិ​រុស្ស៊ី​បាន​និយាយ​ថា ខ្លួន​បានត្រៀម​ខ្លួនរួច​ជា​ស្រេច​ដើម្បី​ពិគ្រោះ​យោបល់ជាមួយ​ប៉ូឡូញអំពី​បញ្ហា​នេះ៕

ដោយ៖ យា ចិន្តាខន្តី (ប្រភព៖ តាសស៍)