AKP ភ្នំពេញ ថ្ងៃទី១២ ខែកញ្ញា ឆ្នាំ២០២៥ -- សហភាពអឺរ៉ុបបានច្រានចោលយ៉ាងមានប្រសិទ្ធភាពនូវសំណើរបស់ប្រធានាធិបតីសហរដ្ឋអាមេរិក លោកដូណាល់ ត្រាំ (Donald Trump) ក្នុងការដាក់ពន្ធខ្ពស់ទៅលើទំនិញមួយចំនួនពីប្រទេសចិន និងឥណ្ឌា ដោយលើកហេតុផលថា ប្លុកនេះមិនប្រើប្រាស់ពន្ធគយជាឧបករណ៍ដាក់ទណ្ឌកម្មនោះទេ។ នេះបើយោងតាមកាសែត Wall Street Journal បានរាយការណ៍ដោយដកស្រង់សម្តីរបស់មន្ត្រីសហភាពអឺរ៉ុបពីររូប។

យោងតាមសារព័ត៌មាននោះ បានឱ្យដឹងថា លោក ត្រាំ បានបញ្ចេញសំណើរបស់លោកកាលពីថ្ងៃអង្គារនៅក្នុងកិច្ចប្រជុំមួយរបស់មន្ត្រីសហរដ្ឋអាមេរិក និងសហភាពអឺរ៉ុប ស្តីពីការដាក់ទណ្ឌកម្ម នៅក្នុងទីក្រុងវ៉ាស៊ីនតោន។ គោលដៅរបស់ប្រធានាធិបតីសហរដ្ឋអាមេរិក គឺដើម្បីបង្កើនសម្ពាធទៅលើរុស្ស៊ី ដោយកំណត់ការទិញប្រេងរបស់ឥណ្ឌា និងការគាំទ្ររបស់ប្រទេសចិនសម្រាប់សេដ្ឋកិច្ចរុស្ស៊ី។

បច្ចុប្បន្ន សហភាពអឺរ៉ុបកំពុងរៀបចំកញ្ចប់ទណ្ឌកម្មទី១៩ របស់ខ្លួនប្រឆាំងនឹងរុស្ស៊ី ដែលនឹងកំណត់គោលដៅទៅលើក្រុមហ៊ុនបរទេសមួយចំនួន ដែលយោងទៅតាមសហជីពដែលត្រូវបានចោទប្រកាន់ថា «ជួយដល់ទីក្រុងម៉ូស្គូ»។ ទោះជាយ៉ាងណាក៏ដោយ យោងតាមក្រុមអ្នកការទូតបានឱ្យដឹងថា ប្លុកនេះទំនងជាមិនដាក់កម្រិតបន្ថែមទៀតទៅលើការទិញប្រេង ឬឧស្ម័នទេ ដោយសារតែភាពខុសគ្នាខាងនយោបាយនៅក្នុងសហជីព។

នៅពេលមុននេះ សារព័ត៌មាន Financial Times បានរាយការណ៍ថាសហភាពអឺរ៉ុបកំពុងពិភាក្សាអំពីការដាក់ទណ្ឌកម្មប្រឆាំងនឹងប្រទេសចិន និងប្រទេសទីបីសម្រាប់ការទិញប្រេង និងឧស្ម័នរបស់រុស្ស៊ី។ មន្ត្រី និងអ្នកការទូតសហភាពអឺរ៉ុប បានចាប់ផ្តើមកិច្ចចរចារកាលពីពេលថ្មីៗនេះ ស្តីពីការដាក់បញ្ចូលនូវការរឹតបន្តឹងបែបនេះនៅក្នុងកញ្ចប់ទណ្ឌកម្មថ្មី។ យោងតាមប្រភពចំនួនបីនៃសារព័ត៌មាននោះ បានឱ្យដឹងថា ក្នុងអំឡុងពេលនៃកិច្ចពិភាក្សាបឋម បញ្ហានៃទណ្ឌកម្មបន្ទាប់បន្សំប្រឆាំងនឹងប្រទេសចិនត្រូវបានលើកឡើងម្តងហើយម្តងទៀត៕

ដោយ៖ យា ចិន្តាខន្តី (ប្រភព៖ តាសស៍)