AKP ភ្នំពេញ ថ្ងៃទី១២ ខែកញ្ញា ឆ្នាំ២០២៥ -- ក្រសួងសុខាភិបាល និងប្រជាជននៃប្រទេសនេប៉ាល់ បាននិយាយកាលពីថ្ងៃព្រហស្បតិ៍ថា ចំនួនអ្នកស្លាប់ដោយសារការតវ៉ាដោយហិង្សាចាប់តាំងពីដើមសប្តាហ៍នេះនៅក្នុងប្រទេសនេប៉ាល់បានកើនឡើងដល់ ៣៤នាក់ហើយ ខណៈដែលមនុស្ស១.៣៦៨នាក់ផ្សេងទៀតបានរងរបួស។

យោងតាមសារព័ត៌មាន OnlineKhabar អ្នកនាំពាក្យក្រសួងសុខាភិបាល លោកវេជ្ជបណ្ឌិត ប្រាកាស់ ប៊ុតដាថូគី (Prakash Budhathoki) បាននិយាយថា ក្នុងចំណោមអ្នករងរបួសចំនួន ១.៣៦៨នាក់នោះ មាន ៩៤៩នាក់ត្រូវបានអនុញ្ញាតិឱ្យចេញពីមន្ទីរពេទ្យហើយ។

លោក​បាន​និយាយបន្ថែម​ថា ចំនួន​អ្នក​ស្លាប់នេះ ​គឺ​ផ្អែកទៅ​លើ​ទិន្នន័យ​ដែល​ប្រមូល​បាន​ពី​ទូទាំង​ប្រទេស។

ប្រទេសនេប៉ាល់បានឃើញការផ្លាស់ប្តូរយ៉ាងខ្លាំងចាប់តាំងពីថ្ងៃច័ន្ទដើមសប្តាហ៍នេះ នៅពេលដែលមានការតវ៉ាបានអង្រួនប្រទេសមួយនេះ បន្ទាប់ពីមានការដាក់បម្រាមទៅលើប្រព័ន្ធផ្សព្វផ្សាយសង្គមមួយចំនួន។ ក្រុមបាតុករ «យុវជនជំនាន់ Z (Gen Z)» បានចាប់ផ្តើមចលនាតវ៉ាកាន់តែទូលំទូលាយប្រឆាំងនឹងអំពើពុករលួយដែលត្រូវបានចោទប្រកាន់ដោយបានទម្លាក់រដ្ឋាភិបាលរបស់លោកនាយករដ្ឋមន្ត្រី ស្សាម៉ា អូលី (Sharma Oli)។

កិច្ចពិភាក្សាកំពុងដំណើរការដើម្បីបង្កើតរដ្ឋបាលបណ្តោះអាសន្ន។

កងទ័ព​បាន​ទទួល​ការ​បញ្ជា​ការ​សន្តិសុខ​ក្នុង​ប្រទេស​បន្ទាប់​ពី​ការ​តវ៉ា​បាន​បង្ខំ​ឱ្យ​លោក អូលី លាលែង​ពី​តំណែង។

កងទាហាននេប៉ាល់ត្រូវបានដាក់ពង្រាយនៅទូទាំងប្រទេស ចំពេលដែលមានបម្រាមគោចរដើម្បីស្ដារច្បាប់ និងសណ្តាប់ធ្នាប់ឡើងវិញ។

យ៉ាងហោចណាស់ មនុស្សពីរនាក់ត្រូវបានសម្លាប់កាលពីព្រឹកថ្ងៃព្រហស្បតិ៍ នៅពេលដែលកងទ័ពបានបើកការបាញ់ប្រហារដើម្បីរារាំងការហែកគុក។

ការប៉ុនប៉ងហែកគុកចុងក្រោយបំផុត បានកើតឡើងនៅក្នុងស្រុករ៉ាមេឆាប នៃខេត្តបាកម៉ាទី នៅពេលដែលអ្នកទោសបានទម្លុះសោខាងក្នុងជាច្រើន ហើយព្យាយាមវាយបំបែកទ្វារធំ មុនពេលកងកម្លាំងសន្តិសុខបានបើកការបាញ់ប្រហារ។

ប៉ូលិស​បាន​និយាយ​ថា ស្ថានការណ៍​ស្ថិត​នៅ​ក្រោម​ការ​គ្រប់​គ្រងហើយ​គ្មាន​អ្នក​ទោស​ណា​អាច​រត់​គេច​ខ្លួន​បាន​ឡើយ។

យោងតាមអ្នកនាំពាក្យការិយាល័យកណ្តាលប៉ូលិសនេប៉ាល់ លោក ប៊ីណូដ ហ្គីមីរេ (Binod Ghimire) បាននិយាយថា «អ្នកទោសចំនួន១៤.៣០៧នាក់បានរត់គេចចេញពីពន្ធនាគារផ្សេងៗគ្នានៅទូទាំងប្រទេស»ក្នុងអំឡុងពេលនៃការតវ៉ានេះ។ នេះបើយោងតាមសារព័ត៌មាននេប៉ាល់បានរាយការណ៍កាលពីថ្ងៃព្រហស្បតិ៍។

នៅក្នុងការស្ទង់មតិតាមប្រព័ន្ធអនឡាញមួយ យុវជនដែលតវ៉ាបានជ្រើសរើសអតីតប្រធានចៅក្រម ស៊ូស្ស៊ីឡា កាគី (Sushila Karki) ជាបេក្ខភាពសម្រាប់ប្រមុខរដ្ឋាភិបាលបណ្តោះអាសន្ន។

ប៉ុន្តែ​នៅមិនទាន់មានសេចក្តី​សម្រេច​ចុង​ក្រោយ​នៅ​ឡើយ​ទេ៕

ដោយ៖ យា ចិន្តាខន្តី (ប្រភព៖ AA-AKP)