AKP ភ្នំពេញ ថ្ងៃទី១១ ខែកញ្ញា ឆ្នាំ២០២៥ -- រដ្ឋមន្ត្រីក្រសួងមហាផ្ទៃម៉ាឡេស៊ី លោក សៃហ្វុដឌីន ណាស៊ូតុន អ៊ីស្មែល (Saifuddin Nasution Ismail) បាននិយាយថា អាស៊ានត្រូវតែប្រើប្រាស់បញ្ញាសិប្បនិម្មិត (AI) និងពង្រឹងការចែករំលែកទិន្នន័យក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន។

នៅក្នុងកិច្ចប្រជុំថ្នាក់រដ្ឋមន្ត្រីអាស៊ានលើកទី១៩ ស្តីពីឧក្រិដ្ឋកម្មឆ្លងដែន(AMMTC) កាលពីថ្ងៃទី០៩ ខែកញ្ញា ឆ្នាំ២០២៥ លោកបាននិយាយថា ការរំខានជាសកល និងបច្ចេកវិទ្យាថ្មីកំពុងកំណត់ឡើងវិញនូវសន្តិសុខ ជាមួយនឹងឧក្រិដ្ឋជនដែលប្រើប្រាស់ប្រព័ន្ធឌីជីថល រូបិយប័ណ្ណគ្រីបតូ និងAI ដើម្បីពង្រីកប្រតិបត្តិការរបស់ពួកគេឆ្លងព្រំដែន។

បច្ចេកវិទ្យា AI ជំនាន់ថ្មី គឺជាការផ្លាស់ប្តូរសម្រាប់ការសម្រេចបាននូវគោលដៅមួយចំនួន ប៉ុន្តែបច្ចេកវិទ្យានេះមានប្រយោជន៍តែជាមួយនឹងទិន្នន័យត្រឹមត្រូវ និងគ្រប់គ្រាន់ប៉ុណ្ណោះ។

លោកបានគូសបញ្ជាក់ថា «នោះហើយជាមូលហេតុដែលការចែករំលែកទិន្នន័យគឺជាកត្តាចាំបាច់ ប្រសិនបើយើងចង់ធ្វើការរួមគ្នាដើម្បីបញ្ឈប់ឧក្រិដ្ឋកម្មឆ្លងដែន»។

អគ្គលេខាធិការអាស៊ាន លោក កៅ គឹមហួន បានព្រមានថា ការធ្វើសមាហរណកម្មកាន់តែស៊ីជម្រៅ និងឌីជីថលនីយកម្ម ក៏បង្កើតហានិភ័យផងដែរដោយសារបណ្តាញឧក្រិដ្ឋកម្មកេងប្រវ័ញ្ចសេដ្ឋកិច្ចបើកចំហ បញ្ហាព្រំដែនដ៏ផុយស្រួយ និងបច្ចេកវិទ្យាដែលកំពុងរីកចម្រើនសម្រាប់សកម្មភាពរាប់ចាប់ពីការជួញដូរមនុស្ស និងឧក្រិដ្ឋកម្មតាមអនឡាញ រហូតដល់ការលាងលុយកខ្វក់ និងបទល្មើសបរិស្ថានជាដើម។

លោក​បាន​សង្កត់​ធ្ងន់​ថា ការ​គំរាម​កំហែង​បែប​នេះ​ធ្វើឱ្យ​ប៉ះពាល់​ដល់​ស្ថិរភាព​សេដ្ឋកិច្ច ធ្វើឱ្យ​ស្ថាប័ន​ចុះ​ខ្សោយ និង​បំផ្លាញ​ទំនុក​ចិត្ត​សាធារណៈដែល​បង្ក​ផល​ប៉ះពាល់​យ៉ាង​ខ្លាំង​ដល់​សហគមន៍​ដែល​ងាយ​រងគ្រោះ​បំផុត។លោកបានជំរុញឱ្យសមាជិកអាស៊ានប្រែក្លាយការប្តេជ្ញាចិត្តទៅជាកិច្ចសហប្រតិបត្តិការជាក់ស្តែង សកម្មភាពសម្របសម្រួល និងលទ្ធផលជាក់ស្តែង។

ដោយ៖ យា ចិន្តាខន្តី (ប្រភព៖ VNA)