AKP ភ្នំពេញ ថ្ងៃទី១១ ខែកញ្ញា ឆ្នាំ២០២៥ -- ក្រសួងការបរទេសរុស្ស៊ីបាននិយាយនៅក្នុងសេចក្តីថ្លែងការណ៍មួយថា ទីក្រុងម៉ូស្គូចាត់ទុកការវាយប្រហាររបស់អ៊ីស្រាអែលទៅលើរដ្ឋធានីដូហារបស់ប្រទេសកាតាថាជាការបំពានយ៉ាងធ្ងន់ធ្ងរទៅលើច្បាប់អន្តរជាតិ និងធម្មនុញ្ញអង្គការសហប្រជាជាតិ។

សេចក្តីថ្លែងការណ៍នោះបាននិយាយថា «រុស្ស៊ីចាត់ទុកឧបទ្ទវហេតុនេះថាជាការរំលោភច្បាប់អន្តរជាតិ និងធម្មនុញ្ញអង្គការសហប្រជាជាតិ ព្រមទាំងជាការវាយប្រហារទៅលើអធិបតេយ្យភាព និងបូរណភាពទឹកដីនៃរដ្ឋឯករាជ្យមួយ និងជាជំហានដែលបង្កើនភាពតានតឹង និងអស្ថិរភាពបន្ថែមទៀតនៅមជ្ឈិមបូព៌ា»។

ក្រសួងការបរទេសរុស្ស៊ីក៏បានគូសបញ្ជាក់ផងដែរថា ការវាយប្រហារដោយគ្រាប់មីស៊ីលទៅលើប្រទេសកាតា ដែលជាប្រទេសមួយដើរតួនាទីសម្រុះសម្រួលដ៏សំខាន់ក្នុងកិច្ចចរចាដោយប្រយោលរវាងក្រុមហាម៉ាស់និងថ្នាក់ដឹកនាំអ៊ីស្រាអែល ស្តីពីការបញ្ចប់សង្គ្រាមដែលមានរយៈពេលជិតពីរឆ្នាំនៅតំបន់ហ្គាហ្សាស្ទ្រីប និងការដោះលែងអ្នកដែលត្រូវបានឃុំឃាំងនោះ មិនត្រូវបានគេមើលឃើញថាជាសកម្មភាពអ្វីក្រៅតែពីសកម្មភាពដែលមានបំណងធ្វើឱ្យកិច្ចខិតខំប្រឹងប្រែងអន្តរជាតិចុះខ្សោយក្នុងការស្វែងរកដំណោះស្រាយដោយសន្តិវិធីនោះទេ។

សេចក្តីថ្លែងការណ៍នោះបានកត់សម្គាល់ថា «សារជាថ្មីម្តងទៀត ទីក្រុងម៉ូស្គូអំពាវនាវឱ្យភាគីពាក់ព័ន្ធទាំងអស់បន្តវិធីសាស្រ្តប្រកបដោយការទទួលខុសត្រូវ និងជៀសវាងសកម្មភាពដែលអាចធ្វើឱ្យស្ថានភាពនៅក្នុងតំបន់នៃជម្លោះប៉ាឡេស្ទីន និងអ៊ីស្រាអែលកាន់តែស្មុគស្មាញ និងធ្វើឱ្យរារាំងដល់ការស្វែងរកដំណោះស្រាយដោយសន្តិភាព»។ ក្រសួងនោះបានបន្ថែមថា «រុស្ស៊ីបញ្ជាក់ពីគោលជំហរជាមូលដ្ឋាន និងជាប់លាប់របស់ខ្លួនថា បទឈប់បាញ់នៅតំបន់ហ្គាហ្សាស្ទ្រីបគួរតែត្រូវបានប្រកាសឱ្យបានឆាប់តាមដែលអាចធ្វើទៅបាន ហើយគ្មានជម្រើសណាមួយក្នុងការដោះស្រាយបញ្ហាប៉ាឡេស្ទីនដោយផ្អែកលើក្របខ័ណ្ឌច្បាប់អន្តរជាតិនោះទេ»៕

ដោយ៖ យា ចិន្តាខន្តី (ប្រភព៖ តាសស៍)