AKP ភ្នំពេញ ថ្ងៃទី០៨ ខែសីហា ឆ្នាំ២០២៥ -- ក្រសួងការពារជាតិកូរ៉េខាងត្បូងបាននិយាយថា ប្រមុខការពារជាតិកូរ៉េខាងត្បូង និងជប៉ុនបានពិភាគ្នាតាមទូរស័ព្ទកាលពីថ្ងៃព្រហស្បតិ៍ ហើយបានយល់ព្រមបន្តកិច្ចសហប្រតិបត្តិការសន្តិសុខទ្វេភាគី ក៏ដូចជាកិច្ចសហប្រតិបត្តិការត្រីភាគីដែលពាក់ព័ន្ធនឹងសហរដ្ឋអាមេរិកផងដែរ។

យោងតាមក្រសួងបានឱ្យដឹងថា រដ្ឋមន្ត្រីការពារជាតិកូរ៉េខាងត្បូង លោក អាន យូបាក (Ahn Gyu-back) និងសមភាគីជប៉ុនលោក ជេន ណាកាតានី (Gen Nakatani) បានឈានដល់ការឯកភាពគ្នាលើកិច្ចសហប្រតិបត្តិការបែបនេះនៅក្នុងការសន្ទនាតាមទូរស័ព្ទលើកដំបូងរបស់ពួកគេ ចាប់តាំងពីលោក អាន ចូលកាន់តំណែងជាប្រមុខការពារជាតិថ្មីរបស់ទីក្រុងសេអ៊ូលកាលពីខែមុន។

លោក អាន បានគូសបញ្ជាក់អំពីសារៈសំខាន់នៃការសម្របសម្រួលទ្វេភាគីយ៉ាងជិតស្និទ្ធក្នុងការប្រឈមមុខនឹងភាពមិនប្រាកដប្រជានៃភូមិសាស្ត្រនយោបាយ និងហានិភ័យសន្តិសុខ ខណៈដែលប្រទេសទាំងពីរប្រារព្ធខួបលើកទី៦០ នៃការធ្វើឱ្យទំនាក់ទំនងការទូតមានលក្ខណៈប្រក្រតីឡើងវិញនៅឆ្នាំនេះ។

ក្រសួងបាននិយាយថា ជាការឆ្លើយតប លោក ណាកាតានី បានអបអរសាទរលោក អានក្នុងពិធីចូលកាន់ដំណែងរបស់លោក ហើយលោកបានបានសង្កត់ធ្ងន់ថា ប្រទេសកូរ៉េខាងត្បូងគឺជាដៃគូដ៏សំខាន់សម្រាប់ប្រទេសជប៉ុនក្នុងការដោះស្រាយបញ្ហាផ្សេងៗនៅក្នុងសហគមន៍អន្តរជាតិ។

ភាគីទាំងពីរក៏បានឯកភាពគ្នាក្នុងការជួបប្រជុំគ្នានៅដើមកាលបរិច្ឆេទ ដើម្បីធ្វើការពិភាក្សាស៊ីជម្រៅលើកិច្ចសហប្រតិបត្តិការការពារជាតិទ្វេភាគី៕

ដោយ៖ មូល មិនា (ប្រភព៖ យ៉ុនហាប់)