AKPតាកែវ ថ្ងៃទី២៧ខែមេសា ឆ្នាំ២០២៦--លោកជំទាវ សិរីកាញ្ចនពង្សធីមុត្តរា អគ្គមហាឧបាសិកា ពុទ្ធសាសនូបត្ថម្ភក៍ កែ សួនសុភី សសុខា បានអញ្ជើញជាអធិបតីដ៏ខ្ពង់ខ្ពស់ ក្នុងពិធីបិទវគ្គវិបស្សនាញាណ លើកទី១៦ និងបុណ្យឆ្លងសមិទ្ធផលនានា ដែលស្ថិតនៅក្នុងវត្តត្រកៀត។

ក្នុងពិធីនោះក៏មានការអញ្ជើញចូលរួមពីសំណាក់ ឯកឧត្តម វ៉ី សំណាង អភិបាលនៃគណៈអភិបាល ខេត្តតាកែវ និងលោកជំទាវ ព្រមទាំងមានការចូលរួមពីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ចំណុះរដ្ឋបាលខេត្តតាកែវ ចំណុះរដ្ឋបាលស្រុកបាទី ព្រះសង្ឃ ពុទ្ធបរិស័ទជិតឆ្ងាយ និងប្រជាពលរដ្ឋចូលរួមយ៉ាងច្រើនកុះករ។ពិធីនេះប្រារព្ធឡើងនៅវត្តត្រកៀតភូមិត្រកៀតឃុំចំប៉ីស្រុកបាទីខេត្តតាកែវ កាលពីព្រឹកថ្ងៃអាទិត្យ ១០កើតខែពិសាខឆ្នាំមមីអដ្ឋស័កព.ស២៥៦៩ ត្រូវនឹងថ្ងៃទី២៦ខែមេសាឆ្នាំ២០២៦។

ក្នុងឱកាសនោះផងដែរ ឯកឧត្តម វ៉ី សំណាង អភិបាលនៃគណៈអភិបាល ខេត្តតាកែវ បានមានប្រសាសន៍សំណេះ សំណាលទៅកាន់អង្គពិធី ដោយបានលើកឡើងថា វិស័យពុទ្ធសាសនាបាននឹងកំពុងដើរតួនាទីយ៉ាងសំខាន់ ក្នុងការអប់រំចិត្តគំនិត និងសីលធម៌រស់នៅ របស់ប្រជាពលរដ្ឋឱ្យកាន់តែប្រសើរឡើង។ 

ជាមួយគ្នានោះដែរ ឯកឧត្តមអភិបាល ខេត្តតាកែវ បានបញ្ជាក់ថា សមិទ្ធផលនានាដែលបានកសាងឡើងនៅក្នុងវត្តត្រកៀតនាពេលនេះ គឺជាសក្ខីភាពយ៉ាងច្បាស់ ដែលបង្ហាញពីសទ្ធាជ្រះថ្លាដ៏ខ្ពង់ខ្ពស់របស់សប្បុរសជន និងពុទ្ធបរិស័ទជិតឆ្ងាយ ក្នុងការរួមចំ ណែកជាមួយរាជរដ្ឋាភិបាលដើម្បីលើកកម្ពស់វិស័យព្រះពុទ្ធសាសនា ដែលជាសាសនារបស់រដ្ឋឱ្យកាន់តែមានភាពរុងរឿង និងរីកចម្រើន។ 

 ឯកឧត្តម វ៉ី សំណាង បានមានប្រសាស ន៍បន្ថែមថា តាមរយៈការអនុវត្តវគ្គវិបស្ស នាញាណនេះ នឹងជួយឱ្យពុទ្ធបរិស័ទទទួលបាននូវសេចក្តីស្ងប់ក្នុងចិត្ត យល់ដឹងបុណ្យបាប និងរួមចំណែកកសាងសន្តិភាពផ្លូវចិត្ត ដែលជាមូលដ្ឋានគ្រឹះក្នុងការរក្សាសុខសន្តិភាព និងការអភិវឌ្ឍសង្គមជាតិទាំងមូល។

ជាចុងក្រោយ លោកជំទាវ អគ្គមហាឧបាសិកា កែ សួនសុភី សសុខា និងគណៈអធិបតី ក៏បានអញ្ជើញប្រកាសសម្ពោធឆ្លងសមិទ្ធផលនានាជាផ្លូវការ និងបានប្រគេនបច្ច័យ ក៏ដូចជាទេយ្យវត្ថុមួយចំនួនដល់ព្រះសង្ឃ ដើម្បីទុកជាកុសលផលបុណ្យ និងសម្រាប់ប្រើប្រាស់ក្នុងកិច្ចការវត្តអារាមបន្តទៅមុខទៀត៕

 ដោយ៖អ៊ុច សៀង