AKP កំពង់ចាម ថ្ងៃទី០៧ ខែកក្កដា ឆ្នាំ២០២៥--

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងថា មានក្រុមហ៊ុនចំនួន៦ នឹង ការងារជិត១ម៉ឺនកន្លែងសម្រាប់ទទួលប្រជាពលរដ្ឋ និង បងប្អូនពលករក្នុងខេត្តកំពង់ចាមដែលទើបត្រឡប់មកពីប្រទេសថៃ ហើយនឹងនាំយកមកនូវក្រុមហ៊ុនធំ ទាំង៦ មកដាក់ទីតាំងនៅស្រុកកំពង់សៀម ខេត្តកំពង់ចាមពេលនេះ ដើម្បីឱ្យប្រជាពលរដ្ឋ ពិសេសបងប្អូន ពលករខ្មែរដែលទើបត្រឡប់មកពីប្រទេសថៃ ជួបសម្ភាសដោយផ្ទាល់ជាមួយក្រុមហ៊ុន ក្នុងការចង់ស្វែងរកការងារធ្វើតាមបណ្តាក្រុមហ៊ុនទាំងនោះដោយទាក់ទងផ្ទាល់ជាមួយក្រុមហ៊ុនក្នុងកិច្ចសម្ភាស សម្រាប់ការងារនៅតាមបណ្តាក្រុមហ៊ុនដែល ខ្លួនចង់ធ្វើ ព្រោះយើងមានតម្រូវការកម្លាំងពលកម្មប្រមាណជិត១ម៉ឺនកន្លែង។

ឯកឧត្តមរដ្ឋមន្ត្រីបានថ្លែងដូចនេះក្នុងពិធីបើក «វេទិកាការងារ» របស់ទីភ្នាក់ងារជាតិមុខរបរ និងការងារ (NEA) នាព្រឹកថ្ងៃទី០៧ ខែកក្កដា ឆ្នាំ២០២៥ នេះដែលបាននាំតំណាងក្រុមហ៊ុនចំនួន៦ យកមកឱ្យប្រជាពលរដ្ឋធ្វើសម្ភាសដើម្បីស្វែងរកការងារនៅ ក្នុងបរិវេណវត្តនគរបាជ័យ ក្នុងស្រុកកំពង់សៀម ដោយមានការចូលរួមពីលោក គន់ សុភា អភិបាលរងនៃគណៈអភិបាលខេត្តកំពង់ចាម និងថ្នាក់ដឹកនាំខេត្ត មន្ទីរការងារ និងអាជ្ញាធរពាក់ព័ន្ធផងដែរ។

ឯកឧត្តម ហេង សួរ បានបញ្ជាក់ថាស្របតាមប្រសាសន៍ការណែនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ឱ្យក្រសួងការងារ និងបណ្តុះបណ្តាលវិជ្ជាជីវៈ ស្វែងការងារ និងផ្តល់ការងារឲ្យបងប្អូនប្រជាពលរដ្ឋខ្មែរដែលទើបវិលត្រឡប់ពីប្រទេសថៃ ដើម្បីឱ្យពួកគាត់មានការងារធ្វើ សម្រាប់លំនឹងក្នុងសេដ្ឋកិច្ចគ្រួសារ ហើយពេលនេះក្រសួងបាននាំយកក្រុមហ៊ុនធំៗចំនួន៦ មកដាក់ទីតាំងនៅស្រុកកំពង់សៀម ខេត្តកំពង់ចាម ដើម្បីឱ្យពលករខ្មែរដែលទើបត្រឡប់មកពីប្រទេសថៃ មកជួបផ្ទាល់ជាមួយក្រុមហ៊ុន សម្ភាសផ្ទាល់ ហើយចង់បានការងារធ្វើ មកទាក់ទងទៅក្រុមហ៊ុនធំៗ ដូចជា តំបន់សេដ្ឋកិច្ចពិសេសជាំងស៊ូ នៅស្រុកជើងព្រៃ ព្រមទាំង ក្រុមហ៊ុនធំៗផ្សេងទៀត រង់ចាំទទួលបងប្អូនប្រទេសមកពីប្រទេសថៃ ដើម្បីផ្តល់ឱកាសការងារថ្មីភ្លាមនៅតំបន់សេដ្ឋកិច្ចពិសេស ដែលសម្រាប់ខេត្តកំពង់ចាមមានប្រមាណជិត១ម៉ឺនកន្លែង និងសម្រាប់ទូទាំងប្រទេសកម្ពុជាមានការងាររាប់សិបម៉ឺនកន្លែង ការងារ សម្រាប់បងប្អូនពលករខ្មែរត្រឡប់ពីប្រទេសថៃមកប្រទេសកំណើតវិញដើម្បី ស្វែងរកការងារសម្រាប់ដោះស្រាយក្នុងជីវភាពប្រចាំថ្ងៃ និងសម្រាប់សេដ្ឋកិច្ចគ្រួសារផងដែរ៕

ដោយ ឆាយ ម៉ុត