AKP បន្ទាយមានជ័យ ថ្ងៃទី១៧ ខែឧសភា ឆ្នាំ២០២៦--

បញ្ហាភាពតានតឹងនៅតាមបណ្តោយព្រំដែនកម្ពុជា-ថៃ បានឈានដល់ដំណាក់កាលថ្មីមួយទៀត ដែលទាមទារឱ្យមានការយកចិត្តទុកដាក់ក្នុងកម្រិតតំបន់ បន្ទាប់ពីមានសកម្មភាពរំលោភបំពានជាបន្តបន្ទាប់ពីសំណាក់ភាគីយោធាថៃ មកលើបូរណភាពទឹកដីនៃព្រះរាជាណាចក្រកម្ពុជា៊។

នៅថ្ងៃអាទិត្យ ទី១៧ ខែឧសភា ឆ្នាំ២០២៦នេះ ឯកឧត្ដម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ រួមជាមួយក្រុមអ្នកសម្របសម្រួល (CLG) នៃព្រះរាជាណាចក្រកម្ពុជា បានធ្វើការសម្របសម្រួល និងដឹកនាំប្រធានបេសកកម្មក្រុមអ្នកសង្កេតការណ៍អាស៊ាន (HOM AOT) ដែលស្ថិតក្នុងអាណត្តិដឹកនាំរបស់ប្រទេសហ្វីលីពីន ចុះទៅពិនិត្យស្ថានភាពជាក់ស្តែងនៅតាមខ្សែបន្ទាត់ព្រំដែន។

បេសកកម្មរបស់អ្នកសង្កេតការណ៍អាស៊ាននាពេលនេះ គឺដើម្បីចុះមកសង្កេតការណ៍ ផ្ទៀងផ្ទាត់ និងរាយការណ៍អំពីការពិត ជុំវិញករណីដែលយោធាថៃបានលួចដាំបង្គោលថ្មីៗ បន្ថែមទៀត រំលោភចូលមកក្នុងដែនអធិបតេយ្យភាពរបស់កម្ពុជា ស្ថិតនៅចំណុចភូមិអាងសិលា ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។សកម្មភាពឯកតោភាគីរបស់យោធាថៃនេះ ត្រូវបានមើលឃើញថា ជាការប៉ុនប៉ងកែប្រែស្ថានភាពព្រំដែនដោយខុសច្បាប់។

មិនត្រឹមតែនៅភូមិអាងសិលាប៉ុណ្ណោះទេ ក្រុមអ្នកសង្កេតការណ៍អាស៊ាន (HOM AOT) ក៏បានបន្តដំណើរទៅកាន់ «ភូមិជោគជ័យ» ដែលជាចំណុចក្តៅមួយទៀត។ នៅទីនោះ យោធាថៃបានប្រើប្រាស់វិធានការណ៍រឹងត្អឹង ដោយយកទូកុងតឺន័រមកដាក់បាំង និងរាយបន្លាលួសហ៊ុំព័ទ្ធ ដើម្បីបន្តគ្រប់គ្រងទឹកដីនោះទាំងខុសច្បាប់។

សកម្មភាពរបស់យោធាថៃនេះ មិនត្រឹមតែល្មើសនឹងបទដ្ឋានគតិយុត្តិអន្តរជាតិ និងកិច្ចព្រមព្រៀងសន្តិភាពដែលកំពុងមានធរមានប៉ុណ្ណោះទេ ប៉ុន្តែវាបានបង្កើតជាវិបត្តិមនុស្សធម៌សម្រាប់ពលរដ្ឋមូលដ្ឋាន ដោយធ្វើឱ្យបងប្អូនប្រជាពលរដ្ឋខ្មែរ មិនអាចត្រឡប់ចូលទៅរស់នៅ និងប្រកបរបរចិញ្ចឹមជីវិតនៅលើដីធ្លីផ្ទាល់ខ្លួនវិញបានឡើយ មកទល់បច្ចុប្បន្ននេះ។

ការចុះផ្ទាល់របស់ក្រុមអ្នកសង្កេតការណ៍អាស៊ាន (HOM AOT) ក្រោមការសម្របសម្រួលពីអាជ្ញាធរខេត្តបន្ទាយមានជ័យ និងក្រុម CLG នាពេលនេះ គឺជាជំហានការទូតដ៏សំខាន់មួយ។ របាយការណ៍ផ្លូវការដែលនឹងត្រូវធ្វើឡើងដោយក្រុមសង្កេតការណ៍នេះ នឹងក្លាយជាភស្តុតាងវត្ថុគោលបំណងដ៏សំខាន់ក្នុងការបង្ហាញទៅកាន់សហគមន៍អន្តរជាតិ និងតំបន់ អំពីតថភាពពិតនៃទង្វើបំពានរបស់ភាគីថៃ និងដើម្បីស្វែងរកដំណោះស្រាយសន្តិវិធី ផ្អែកលើច្បាប់អន្តរជាតិ ដើម្បីការពារផលប្រយោជន៍ និងទឹកដីរបស់ប្រជាពលរដ្ឋខ្មែរ៕

ដោយ ឈុន សារ៉ាត