AKP សៀមរាប ថ្ងៃទី១០ ខែកុម្ភៈ ឆ្នាំ២០២៥--

ប្រជាពលរដ្ឋដែលរស់នៅតំបន់រមណីយដ្ឋានអង្គរ នៅតែរក្សា និងគោរពបានយ៉ាងល្អប្រសើរ នូវទំនៀមទំម្លាប់ ប្រពៃណីនៃការរស់នៅប្រចាំថ្ងៃតាមបែបបទពីបុរាណ។ ជាក់ស្តែង ប្រជាជនក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប ជារៀងរាល់ឆ្នាំក្រោយពេលបញ្ចប់ការងារប្រមូលផលស្រូវរួចរាល់ហើយ តែងតែធ្វើពិធីចាប់ត្រីរួមគ្នា សម្រាប់ធ្វើម្ហូបអាហារក្នុងពិធីឡើងមាឃ ឬឡើងអ្នកតា នៅរៀងរាល់ខែមាឃ តាមទម្លាប់ពីបុរាណមិនដែលអាក់ខានឡើយ។

ការរៀបចំធ្វើពិធីចាប់ត្រីរួមគ្នានេះ ធ្វើឡើងនៅក្នុងបឹងបុរាណមួយដែលអ្នកភូមិ រួមគ្នាអភិរក្សត្រីមិនឱ្យមានការនេសាទផ្តេសផ្តាស គឺទុកសម្រាប់តែរកត្រីរួមគ្នាមួយឆ្នាំម្តងក្នុងឱកាស ធ្វើពិធីឡើងមាឃ ឬឡើងអ្នកតាប៉ុណ្ណោះ។

អាជ្ញាធរស្រុកបា្រសាទបាគង ខេត្ដសៀមរាបបានបញ្ជាក់ឱ្យដឹងថា ការរៀបចំពិធីនេះឡើងរបស់ស្រុកគឺជាការចូលរួមថែរក្សាការពារនូវវប្បធម៌ ទំនៀមទម្លាប់ប្រពៃណីរបស់ដូនតាខ្មែរយើងដែលបានបន្សល់ទុកតាំងពីបុរាណកាលមក ជាពិសេសការជួបជុំគ្នាចាប់ត្រីនៅក្នុងបឹងនេះ ក្នុងគោលបំណងដើម្បីយកមកធ្វើជាម្ហូបអាហារ ឬធ្វើចង្ហាន់ ដើម្បីប្រគេនព្រះសង្ឃក្នុងថ្ងៃឡើងអ្នកតា នៅក្នុងភូមិស្រុកនេះ។

លោក សូ ប្លាតុង អភិបាលស្រុកប្រាសាទបាគង ខេត្តសៀមរាប បានឱ្យដឹងថា ដូចសព្វរាល់ដងនៅព្រឹកថ្ងៃទី០៩ ខែកុម្ភៈ ឆ្នាំ២០២៥នេះ ប្រជាពលរដ្ឋ ប្រុស ស្រី ចាស់ ក្មេង និងភ្ញៀវទេសចរបរទេសយ៉ាងច្រើនកុះករបានមកប្រមូលផ្តុំគ្នានៅបឹងអភិរក្សមួយ ស្ថិតនៅក្នុងភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប ចាប់ត្រីរួមគ្នាដើម្បីយកមកធ្វើជាចង្ហាន់ប្រគេនព្រះសង្ឃក្នុងថ្ងៃឡើងមាឃ ឬឡើងអ្នកតា និងធ្វើម្ហូបសម្រាប់គ្រួសារ ព្រមទាំងទទួលភ្ញៀវ ដែលជាទំនៀមរបស់ប្រជាពលរដ្ឋរស់នៅតំបន់រមណីយដ្ឋានអង្គរ ប្រារព្ធធ្វើជារៀងរាល់ឆ្នាំ។

លោកអភិបាលស្រុកបានលើកឡើងថា ពិធីនេះមានសារៈសំខាន់ណាស់ទី១ រក្សាបានវប្បធម៌ ប្រពៃណី ទំនៀមទម្លាប់ របស់ដូនតាយើង។ ទី២ទាក់ទាញភ្ញៀវទេសចរជាតិ និងអន្តរជាតិឱ្យពួកគាត់មកឃើញអំពីទំនៀមទម្លាប់ និងអ្វីដែលយើងបានអភិរក្សនេះ ព្រោះស្រុកប្រាសាទបាគង ជាស្រុកមរតកវប្បធម៌ និងទី៣នៅពេលគេស្គាល់កន្លែងយើងច្រើន ប្រជាសហគមន៍ និងទទួលបានចំណូល ហើយក៏មានការអភិវឌ្ឍនៅមូលដ្ឋានយើងជាបន្តបន្ទាប់ផងដែរ។ លោកអភិបាលស្រុកបានបញ្ជាក់ផងដែរថា កាលពីមុនពិធីចាប់ត្រីនេះ អ្នកមកចូលរួមគឺមានអ្នកភូមិបង្កោងប៉ុណ្ណោះ ប៉ុន្តែឥឡូវដោយមានការផ្សព្វផ្សាយបានទូលំទូលាយ ធ្វើឱ្យមានការចូលរួមច្រើនមកពីគ្រប់ទិសទី មានទាំងភ្ញៀវទេសចរបរទេសផងដែរ។ លោកអភិបាលស្រុកបានថ្លែងបញ្ជាក់ថា៖ «ដូចនេះ អាជ្ញាធរមានគម្រោងបន្តលេងកូនត្រីនៅក្នុងបឹងនេះបន្ថែម ហើយដល់ខែទឹកឡើងដាក់ព្រួលការពារកុំឱ្យត្រី នៅក្នុងបឹងនេះកុំឱ្យត្រីចេញទៅខាងក្រៅ ជាពិសេសនោះ គឺអាជ្ញាធរមានគម្រោងរៀបចំធ្វើយ៉ាងម៉េចឱ្យប្រជាពលរដ្ឋនៅក្នុងមូលដ្ឋាននេះទទួលបានចំណូលដោយផ្ទាល់»។

ចំណែកលោក ពេជ្រ ឃិន មេភូមិបង្កោងបានឱ្យដឹងដែរថា ពិធីចាប់ត្រីរួមគ្នានេះ បានធ្វើឡើងនៅម៉ោង៧ព្រឹក ដោយគណៈកម្មការភូមិបាញ់កាំជ្រួច បន្លឺស្នូរជាសញ្ញា អនុញ្ញាតឱ្យចុះចាប់ត្រីបាន។ លោកបានបញ្ជាក់ថា ការចាប់ត្រីនេះគឺអនុញ្ញាតដោយប្រើប្រាស់តែឧបករណ៍បុរាណទាំងអស់ រួមមានដូចជា ឈ្នាង អង្រុត និងសំណាញ់ជាដើម។ ចំពោះការចាប់ត្រីនេះដែរ គណៈកម្មការបានកំណត់ជាពីរផ្នែក ដែល ជាដំបូងប្រជាជនទាំងអស់អាចរកត្រីទុកសម្រាប់ខ្លួនឯងផ្ទាល់ រីឯមួយផ្នែកនៃបឹងដែលដាក់សម្រាស់ការពារមិនឱ្យចាប់ពីដំបូងនោះ ត្រូវទុកចាប់រួមសម្រាប់ធ្វើទឹកនំបញ្ចុកប្រគេនព្រះសង្ឃ។ លោកមេភូមិបន្ដថា សម្រាប់ទិន្នផលត្រីឆ្នាំនេះ មានប្រហាក់ប្រហែលឆ្នាំមុន ប៉ុន្តែដោយសារឆ្នាំនេះ អ្នកចុះចាប់មានចំនួនច្រើន អីចឹងហើយអ្នកចាប់បានម្នាក់បន្តិចៗ។

លោកមេភូមិបានអះអាងថា៖ «ការចាប់ត្រីឡើងមាឃនេះ មានជាយូរយារមកហើយ ឱ្យតែមកដល់ខែមាឃ បន្ទាប់ពីបញ្ចប់ការច្រូតកាត់ និងដាក់ស្រូវក្នុងជង្រុករួចរាល់។ ការរៀបចំពីធីនេះឱ្យមានភាពអឹកធឹកមានរយៈប្រមាណជាង១០ឆ្នាំកន្លងមកហើយ នៅពេលខ្ញុំមានតួនាទីជាមេភូមិក្នុងភូមិបង្កោង»។ លោកមេភូមិរូបនេះបានបន្ថែមថា លោកតែងតែអប់រំប្រជាជនក្នុងភូមិ និងអ្នកណាក៏ដោយ ដែលនឹងក្លាយជាអ្នកដឹកនាំបន្តវេនពីលោក ធ្វើយ៉ាងណាថែរក្សាទនៀមទម្លាប់នេះឱ្យបានគង់វង្សសម្រាប់កូនចៅជំនាន់ក្រោយ។ លោកមេភូមិបាននិយាយរាប់រាប់ទៀតថា៖ «ក្រៅពីថែរក្សាទំនៀមទម្លាប់ដូនតា កម្មវិធីនេះក៏បានបង្ហាញពីសាមគ្គីភាព ការសហការរវាងប្រជាជននៅក្នុងភូមិ ដោយហេតុថាបើខ្ញុំតែម្នាក់ឯង ក៏មិនអាចធ្វើឱ្យកម្មវិធីរលូនទៅមុខបានដែរ ដែលទាមទារឱ្យមានការគាំទ្រពីប្រជាជន ក្នុងនាមខ្ញុំជាអ្នកដឹកនាំ គ្រាន់តែបង្ហាញផ្លូវប៉ុណ្ណោះ»។

អ្នកចាប់ត្រីម្នាក់ដែលបានក្រោកងើបឡើងមកតាំងពីព្រឹកព្រលឹម លោក ហាន ញ៉ែម ដែលជាប្រជាពលរដ្ឋនៅភូមិបង្កោង បាននិយាយដោយទឹកមុខរីករាយថា     ពួកគាត់បានក្រោកមកជាមួយអ្នកភូមិ តាំងពីម៉ោង៥មកម្ល៉េះ ដើម្បីមករងចាំចាប់ត្រី។ លោកបន្ដថា ពួកគាត់ពិតជាមានការសប្បាយចិត្តនូវពេលអាជ្ញាធរស្រុកមានការគាំទ្រ និងមានគម្រោងរៀបចំទំនៀមទំម្លាប់នេះទៅ ជាព្រឹត្តិការណ៍ទេសចរណ៍ ព្រោះបានលើកស្ទួយទំនៀមទម្លាប់ដូនតារបស់យើង។ លោកបាននិយាយដោយសង្កត់ធ្ងន់ថា៖ «ពិធីចាប់ត្រីរួមគ្នានេះជាទំនៀមទំម្លាប់ របស់ប្រជាជនភូមិបង្កោង សម្រាប់យកត្រីទៅធ្វើម្ហូបឡើងមាឃ ឬឡើងអ្នកតា ហើយតាំងពីខ្ញុំដឹងក្តីរហូតដល់មានអាយុ៤៨ឆ្នាំ ឃើញគេធ្វើពិធីនេះរហូតមក។ ខ្ញុំចង់ឱ្យពិធីនេះមានជារៀងរហូតតកូនតចៅទៀត»៕

ដោយ៖ ឃុត សៅ